ខេត្តមណ្ឌលគិរី ៖ ទីបំផុត មេខ្លោងរុករានដីព្រៃនៅខេត្តមណ្ឌលគិរី ត្រូវសមត្ថកិច្ចឃាត់ខ្លួនបានហើយនៅឯខេត្តកំពត កាលពីថ្ងៃទី១៣តុលា ឆ្នាំ២០២០ រួចបញ្ជូនទៅសាលាដំបូងខេត្តក្រចេះដើម្បីបន្តនីតិវិធី ។
ប្រភពព័ត៌មានក្រៅផ្លូវការបានឲ្យដឹងថា មន្ត្រីយោធាម្នាក់ឈ្មោះ ចាន់ ធី ដែលជាមេដឹកនាំការទន្ទ្រានដីព្រៃនៅចំណុចភ្នំរហាំ ក្នុងភូមិពូឆបឃុំដាក់ដាំ ស្រុកអូររាំង ខេត្តមណ្ឌលគិរី បានត្រូវចាប់ខ្លួន ក្រោយពីគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ បើកការស៊ើបអង្កេតទ្រង់ទ្រាយធំ ស្រាវជ្រាវជីកឫសគល់ឈានដល់ការកំណត់អត្តសញ្ញាណរបស់អ្នកពាក់ព័ន្ធជាច្រើននាក់ ។
ប្រភពដដែលបន្តថា ក្នុងសំណុំរឿងដ៏កក្រើកនេះ គណៈកម្មការបានរកឃើញមានអ្នកពាក់ព័ន្ធជាង១០នាក់ ឃាត់ខ្លួនបាន៥នាក់ហើយ ឯអ្នកនៅសល់ពីនេះកំពុងគេចខ្លួន ហើយភាគច្រើនពួក
គេជាមន្ត្រីរាជការ និងកងកម្លាំងប្រដាប់អាវុធ ។
ជនពាក់ព័ន្ធដែលសមត្ថកិច្ចឃាត់ខ្លួននាពេលកន្លងមករួមមាន ៖
១-ឈ្មោះ ចាន់ ធី ជាមន្ត្រីយោធា
២-ឈ្មោះ ពៅ សុធារ៉ាន់ ជាមន្ត្រីនគរបាល
៣-ឈ្មោះ ហង់ ជុង ជាមន្ត្រីនគរបាល
៤-ឈ្មោះ ម៉ា ម៉េងធី ជាចាងហ្វាងកាសែតព្រហ្មខ័ន្ធអនឡាញ និង
៥-មិនទាន់ស្គាល់អត្តសញ្ញាណ ។
សូមរំឭកថា គណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ ដឹកនាំដោយនាយឧត្តមសេនីយ៍ ហ៊ូ សាគុណ និងឧត្តមសេនីយ៍ឯក ហុង វិណុល បានចុះទៅត្រួតពិនិត្យដីព្រៃមួយកន្លែង ដែលត្រូវគេឈូសឆាយរាប់រយហិកតា នៅចំណុចភ្នំក្បាលខ្មោច និងភ្នំរហាំ ជិតព្រំដែនកម្ពុជា-វៀតណាម ក្នុងភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី ក្រោយពីឃាត់ខ្លួនមនុស្សមួយចំនួនដាក់ពន្ធនាគារ ដែលជាប់ពាក់ព័ន្ធនឹងករណីរុករានដីព្រៃយកធ្វើជាកម្មសិទ្ធិ ។
គេសង្កេតឃើញកម្លាំងសមត្ថកិច្ចចម្រុះប្រមាណជាង១០០នាក់ កាលពីព្រឹកថ្ងៃទី៣០ ខែកញ្ញា ឆ្នាំ២០២០ បានបើកប្រតិបត្តិការដ៏ធំដោយប្រើប្រាស់រថយន្តរាប់សិបគ្រឿង ចុះទៅកន្លែងកើតមានករណីរុករានដីព្រៃរបស់រដ្ឋដ៏ធំសម្បើមនេះ ៕
ចែករំលែកព័តមាននេះ