ខេត្តកណ្តាល ៖ គ្រូដោះអំពើម្នាក់ត្រូវបាននគរបាលស្រុកលើកដែក ចាប់វាយខ្នោះ ខណៈពេលដែលម្តាយរបស់នារីរងគ្រោះដាក់ពាក្យបណ្តឹងថា គ្រូដោះអំពើរូបនេះបានប្រើល្បិចដោះអំពើឱ្យកូនរបស់គាត់ រួចធ្វើសកម្មភាពបំពានសេពសន្ថវៈរហូតបានសម្រេច។ ហេតុការណ៍នេះបានកើតឡើងនៅថ្ងៃទី១១ ខែតុលា ឆ្នាំ២០២០…
ខេត្តកណ្តាល ៖ គ្រូដោះអំពើម្នាក់ត្រូវបាននគរបាលស្រុកលើកដែក ចាប់វាយខ្នោះ ខណៈពេលដែលម្តាយរបស់នារីរងគ្រោះដាក់ពាក្យបណ្តឹងថា គ្រូដោះអំពើរូបនេះបានប្រើល្បិចដោះអំពើឱ្យកូនរបស់គាត់ រួចធ្វើសកម្មភាពបំពានសេពសន្ថវៈរហូតបានសម្រេច។ ហេតុការណ៍នេះបានកើតឡើងនៅថ្ងៃទី១១ ខែតុលា ឆ្នាំ២០២០ វេលាចន្លោះម៉ោង៨ព្រឹក ដល់ម៉ោង១២ថ្ងៃត្រង់ នៅចំណុចនផ្ទះជនសង្ស័យស្ថិតក្នុងភូមិព្រែកតូច ឃុំព្រែកដាច់ ស្រុកលើកដែក ហើយជនសង្ស័យត្រូវបានឃាត់ខ្លួនបាននៅថ្ងៃទី១៣ ខែតុលា ឆ្នាំ២០២០។
ជនសង្ស័យដែលជាគ្រូដោះអំពើខាងលើឈ្មោះ យឿន យឿ ភេទប្រុស អាយុ៣៥ឆ្នាំ មានទីលំនៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល។ ចំណែកនារីរងគ្រោះអាយុ១៥ឆ្នាំ មុខរបរសិស្ស ស្នាក់នៅស្រុកកៀនស្វាយ មានម្តាយអាយុ៣៧ឆ្នាំ មុខរបរកម្មកររោងចក្រ រីឯឪពុកវិញបានលែងលះគ្នាហើយ។
មន្ត្រីនគរបាលស្រុកលើកដែកបានឱ្យដឹងថា កាលពីវេលាកើតហេតុខាងលើ ម្តាយរបស់ជនរងគ្រោះបានមកដោះអំពើនៅផ្ទះរបស់ជនសង្ស័យ ហើយបន្ទាប់មកជនសង្ស័យបានប្រាប់ម្តាយជនរងគ្រោះឱ្យនាំកូនស្រីដែលជាជនរងគ្រោះមកដោះអំពើ បើមិនមកដោះអំពើ នឹងប្រសិទ្ធីទេ អំពើនោះនឹងឡងមកលើកូនហើយ។
ប្រភពដដែលបន្តថា ពេលនោះម្តាយរបស់ជនរងគ្រោះក៏នាំក្មេងស្រីជាជនរងគ្រោះមកផ្ទះជនសង្ស័យដែលជាគ្រូដោះអំពើ លុះពេលមកដល់ជនសង្ស័យក៏នាំក្មេងស្រីរងគ្រោះ និងម្តាយឡើងលើផ្ទះ ហើយឱ្យក្មេងស្រីរងគ្រោះដោះអាវចេញរួចឱ្យស្លៀកសារុង ហើយឱ្យម្តាយជនរងគ្រោះនៅឱ្យឆ្ងាយប្រហែល៤ទៅ៥ម៉ែត្រ ដោយអង្គុយតាំងសមាធិ រួចឱ្យបែរមុខចេញ ។
ប្រភពដដែលបន្តទៀតថា ខណៈពេលនោះជនសង្ស័យដែលជាគ្រូដោះអំពើក៏ធ្វើសកម្មភាពបំពានសេពសន្ថវៈទៅលើជនរងគ្រោះបានសំរេចតែម្ដង ដោយគំរាមមិនឱ្យស្រែកនោះទេ បើមិនដូច្នោះទេអំពើនឹងកាច់ស្លាប់ទាំងគ្រួសារ។ ក្រោយពីកើតហេតុរួចជនរងគ្រោះពុំបានប្រាប់ម្តាយខ្លួនឱ្យដឹងឡើយ។
ប្រភពដដែលបន្តថា លុះរហូតដល់ថ្ងៃ១៣ ខែតុលា ម៉ោង១១ព្រឹក ពេលម្តាយជនរងគ្រោះចេញពីធ្វើការរោងចក្រ ជនរងគ្រោះបានប្រាប់នូវរឿងរ៉ាវដែលគ្រូដោះអំពើរូបនេះបានចាប់បំពានមកលើរូបខ្លួន ។ ហើយមូលហេតុដែលប្រាប់ម្តាយនេះ ដោយសារតែជនរងគ្រោះពិបាកចិត្តខ្លាំងពេក ព្រោះខ្លាចមានកូនទើបដាច់ចិត្តប្រាប់ទៅនូវហេតុការណ៍ខាងលើឱ្យម្តាយដឹងតែម្តង។ ក្រោយពេលម្តាយជនរងគ្រោះបានដឹងហើយ ក៏នាំជនរងគ្រោះមកដាក់ពាក្យបណ្តឹងនៅអធិការដ្ឋាននគរបាលស្រុកលើកដែកតែម្តង។
ក្រោយពីសាកសួរជនរងគ្រោះរួចមក កម្លាំងនគរបាលជំនាញព្រហ្មទណ្ឌស្រុកបានសហការជាមួយកម្លាំងប៉ុស្តិ៍ព្រែកដាច់ ចុះទៅឃាត់ខ្លួនជនសង្ស័យមកសាកសួរនៅអធិការដ្ឋាននគរបាលស្រុកលើកដែកភ្លាមៗ និងកសាងសំណុំរឿងបញ្ជូនតាមនីតិវិធី។
ចែករំលែកព័តមាននេះ