នគរបាលស្រុកថាឡាបរិវ៉ាត់ តាមចាប់ឆ្មាំកាំភ្លើងម្នាក់
- ស្ទឹងត្រែង
ខេត្តស្ទឹងត្រែង ៖ លោកវរសេនីយឯក សែម ស៊ីថា អធិការស្រុកថាឡាបរិវ៉ាត់ បានបញ្ជាក់ថា បុរសម្នាក់ឈ្មោះ សុខ កៀត…
ខេត្តស្ទឹងត្រែង ៖ លោកវរសេនីយឯក សែម ស៊ីថា អធិការស្រុកថាឡាបរិវ៉ាត់ បានបញ្ជាក់ថា បុរសម្នាក់ឈ្មោះ សុខ កៀត អាយុ៤២ឆ្នាំ រស់នៅភូមិអន្លង់ក្រមួន ឃុំអន្លង់ ជ្រៃស្រុកថាឡាបរិវ៉ាត់ ខេត្តស្ទឹងត្រែង ត្រូវបានសមត្ថកិច្ចតាមចាប់ខ្លួនយកមកអនុវត្តតាមនីតិវិធីច្បាប់ បន្ទាប់បុរសនោះប្រើប្រាស់អាវុធកែច្នៃបាញ់ទៅលើបងថ្លៃរបស់ខ្លួន គ្រាឈ្លោះប្រកែកគ្នាក្នុងវង់ផឹកស្រា កាលពីពេលថ្មីៗនេះ។
លោកអធិការស្រុកបន្តថា ជនរងគ្រោះឈ្មោះសូ សើយ ត្រូវជាបងថ្លៃជនសង្ស័យ រស់នៅភូមិ-ឃុំជាមួយគ្នា។
លោកបន្ថែមថា ករណីនេះបានកើតឡើងនៅភូមិអន្លង់ក្រមួន ឃុំអន្លង់ជ្រៃ កាលពីវេលាម៉ោង២រសៀល ថ្ងៃទី០៩ តុលា ដោយសារជនដៃដល់បានយកអាវុធកែច្នៃបាញ់ជនរងគ្រោះ ហើយរត់ចូលព្រៃបាត់។ បច្ចុប្បន្នសមត្ថកិច្ចពុំមិនទាន់ឃើញទេ ព្រោះនៅភូមិសាស្ត្រនោះ សម្បូរទៅដោយព្រៃ ហើយកំពុងមានជំនន់ទឹកភ្លៀងផង។
ពេលនេះ លោកសូ សើយ ជាជនរងគ្រោះកំពុងសម្រាកព្យាបាលនៅមន្ទីរពេទ្យខេត្ត បានបញ្ជាក់ថា នៅថ្ងៃ១៣ តុលានេះថា ខ្លួនត្រូវឈ្មោះសុខ កៀត ជាប្អូនថ្លៃយកកាំភ្លើងកែច្នៃបាញ់ចំនួន៣គ្រាប់ ត្រូវពីក្រោយខ្នង និងជិតគល់ចង្កេះ។
ហើយជនសង្ស័យបានផលិតកាំភ្លើងច្នៃសំរាប់បាញ់ជ្រូកព្រៃ លុះថ្ងៃកើតហេតុនោះបាញ់បានជ្រូកព្រៃមួយ រួចក៏នាំគ្នាធ្វើជ្រូកនោះហូប ក៏កើតមានជម្លោះពាក្យសម្តីតូចធំដាក់គ្នាតិចតួច ស្រាប់តែប្អូនថ្លៃរូបនេះយកកាំភ្លើងមកបាញ់តែម្តង រួចរត់ចូលព្រៃបាត់។
អ្នកភូមិអន្លង់ក្រមួនបាននាំគ្នានិយាយថា ជនសង្ស័យរូបនេះធ្លាប់ជាប់ពន្ធនាគាចំនួនពីរលើកមកហើយ ព្រោះតែប្រើអំពើហិង្សាបែបនេះ ពួកគាត់សង្ឃឹមថាទោះគេចខ្លួនយ៉ាងណាក៏ដោយ ព្រោះថា (ជុងមិនដែលភ្លេចកុកទេ មានតែកុកទេដែលភ្លេចជុង) ៕
ចែករំលែកព័តមាននេះ