រាជធានីភ្នំពេញ ៖ រយៈពេលប៉ុន្មានថ្ងៃកន្លងមកនេះភ្លៀងបានធ្លាក់រាល់ថ្ងៃដែលជាហេតុបង្កឲ្យមានជំនន់ទឹកភ្លៀងជន់លិចតំបន់ទំនាបជាច្រើននៅក្នុងភូមិសាស្ត្រខណ្ឌចំនួន៣ នៅជាយប៉ែកខាងលិច និងខាងត្បូងរាជធានីភ្នំពេញ ដូចជា ខណ្ឌពោធិ៍សែនជ័យ ដង្កោ និងកំបូល ។
ដោយឡែកខណ្ឌពោធិ៍សែនជ័យ គឺនៅក្នុងភូមិត្រពាំងថ្លឹង សង្កាត់ចោមចៅទី១ ត្រូវបានទឹកជនលិចខ្លាំង ហើយអ្វីដែលកោះសន្តិភាពទទួលបានពីប្រជាពលរដ្ឋនៅផ្សារត្រពាំងថ្លឹងប្រាប់ថា ខណៈដែលទឹកលិចផ្ទះសម្បែង និងផ្លូវថ្នល់អស់មានអ្នករកស៊ីដាក់ទូកចម្លងច្រើនគ្រឿង ដោយគិតថ្លៃក្នុងម្នាក់២ពាន់រៀល ។
ប្រភពដដែលបានបន្តទៀតថា ទឹកបានលិចខ្លាំង ចាប់ពីវេលាល្ងាច ថ្ងៃទី១៣ ខែតុលា ឆ្នាំ២០២០ បន្ទាប់ពីមានភ្លៀង១មេយ៉ាងចាស់ដៃ ពេលនោះពួកគាត់មិនអាចដើរកើតហើយក៏មិនអាចជិះម៉ូតូទាបៗកាត់ទឹករួចក៏បានជួលទូកចម្លងជិះចេញពីផ្ទះទៅកាន់កន្លែងនានាដែលត្រូវទៅដោយមនុស្ស១នាក់២ពាន់រៀលបូករួមជាមួយម៉ូតូ២ពាន់រៀលទៀត៤ពាន់ ហើយទៅ៤ពាន់រៀល និងមក៤ពាន់រៀល ។
លុះរហូតមកដល់វេលាព្រឹកថ្ងៃទី១៤ ខែតុលា បន្ទាប់ពីការចុះពិនិត្យឃើញពីការលំបាករបស់អ្នកភូមិខាងលើ ទើបអាជ្ញាធរ សង្កាត់ចោមចៅទី១ រួមជាមួយកងកម្លាំងនគរបាលប៉ុស្តិ៍នគរបាលខណ្ឌ និងរាជអាវុធហត្ថខណ្ឌពោធិ៍សែនជ័យ សហការណ៍ជាមួយកម្លាំងក្រុមសង្គ្រោះអង្គភាព៧១១ កងពលតូចលេខ៧០ បានចុះជួយអន្តរាគមន៍ ដោយខាងអង្គភាព៧១១មានកម្លាំងប្រមាណ៤០នាក់ បាននាំយកទូកជាច្រើនគ្រឿងចម្លងប្រជាពលរដ្ឋ ចំណែកឯក្រុមអ្នកដែលរកស៊ីដាក់ទូកចម្លងយកលុយនោះបានដកថយបាត់អស់ ។
មន្ត្រីមួយរូបបានបង្ហើបប្រាប់ឲ្យដឹងថា ដោយសារតែប៉ុន្មានថ្ងៃកន្លងមកនេះមានធ្លាក់ភ្លៀងខ្លាំងជាប់រាល់ថ្ងៃបានធ្វើឲ្យទឹកបានលិចភូមិត្រពាំងថ្លឹងយ៉ាងខ្លាំង ជាពិសេសនៅក្នុងផ្សារត្រពាំងថ្លឹង មិនត្រឹមតែលិចផ្លូវប៉ុណ្ណោះទេ តែបានលិចចូលដល់ក្នុងផ្ទះប្រជាពលរដ្ឋតែម្ដង ។
ចំណែកនៅតាមផ្លូវត្រូវទឹកលិចកន្លែងខ្លះត្រឹមជង្គង់ និងកន្លែងខ្លះទៀតរហូតត្រឹមចង្កេះទៅហើយដែលជាហេតុបណ្ដាលឲ្យប្រជាពេលរដ្ឋលំបាកធ្វើដំណើរតាមរថយន្ត ឬម៉ូតូទាបៗ បើរថយន្តត្រូវចូលទឹក រីឯម៉ូតូត្រូវរលត់ម៉ាស៊ីនមិនអាចធ្វើដំណើរបានឡើយ ។ ហើយនៅខណៈដែលមិនទាន់មានអន្តរាគមន៍ពីអាជ្ញាធរ និងសមត្ថកិច្ចព្រមទាំងកម្លាំងក្រុមសង្គ្រោះអង្គភាព៧១១ គឺមានក្រុមអ្នករកស៊ីដាក់ទូលចម្លងមែន តែនៅពេលកម្លាំងទៅដល់ក្រុមនោះបានដកថយបាត់អស់៕
ចែករំលែកព័តមាននេះ