ADផ្ទាំងផ្សព្វផ្សាយពាណិជ្ជកម្ម

ទឹកស្ទឹងព្រែកត្នោតហក់ឡើងខ្លាំងជន់លិចច្រើនសង្កាត់ក្នុងខណ្ឌដង្កោ

3 ឆ្នាំ មុន

ភ្នំពេញ
១៤ ខែ តុលា ឆ្នាំ ២០២០ ម៉ោង ១៥:៥៩

រាជធានីភ្នំពេញ ៖ ទឹកស្ទឹងព្រែកត្នោតបានបន្តកើនឡើងកាន់តែខ្លាំងឡើងៗក្នុងកម្រិតប្រកាសអាសន្ន ដោយបានហៀរច្រាំងហូរកាត់ផ្លូវទំនប់សណ្ដរស្ទឹងដ៏សំខាន់ ដែលជាហេតុធ្វើឲ្យមានការព្រួយបារម្ភយ៉ាងខ្លាំង ហើយអាជ្ញាធរគ្រប់លំដាប់ថ្នាក់ រួមជាមួយកងកម្លាំងប្រដាប់អាវុធទាំងកងនគរបាល កងរាជអាវុធហត្ថ កងយោធាតាមបណ្ដាអង្គភាពនានារួមជាមួយកម្លាំងសណ្ដាប់ធ្នាប់និងប្រជាការពារបានចេញអន្តរាគមន៍ជួយដល់ប្រជាពលរដ្ឋនិងទប់ទឹកយ៉ាងសកម្មបំផុត។ សមត្ថកិច្ចបានប្រាប់ឲ្យដឹងថា…

សមត្ថកិច្ចបានប្រាប់ឲ្យដឹងថា ទឹកបានឡើងខ្លាំងបណ្ដាលឲ្យហៀរហូរលើផ្លូវទំនប់សណ្តរស្ទឹងព្រែកត្នោតប្រវែងជាច្រើនម៉ែត្រ ដែលស្ថិតក្នុងភូមិថ្ម សង្កាត់ទៀន ខណ្ឌដង្កោ តាំពី វេលាយប់ថ្ងៃទី១៣ ខែតុលា ម្ល៉េះ ដែលជាហេតុបបណ្ដាលឲ្យមានការប្រមូលផ្ដុំកម្លាំងទាំងយប់ក្រោមការដឹកនាំដោយលោកឃួង ស្រេង អភិបាលរាជធានីភ្នំពេញ សហការណ៍ជាមួយក្រសួងធនធានទឹកនិងឧតុនិយមទប់ទាំងយប់ ព្រោះតែមានការព្រួយបារម្ភខ្លាចលិចភូមិលង់ឋានផ្ទះសម្បែងប្រជាពលរដ្ឋរាប់រយខ្នង។ នៅក្នុងគ្រោះជំនន់ទឹកស្ទឹងនេះបានបង្កឡើងដោយសារតែភ្លៀងធ្លាក់រាល់ថ្ងៃមិនឈប់ទាំងនៅក្នុងមូលដ្ឋានខណ្ឌដង្កោផង នៅតំបន់ផ្សេងៗផងនិងជាពិសេសនៅក្នុងខេត្តកំពង់ស្ពឺផង ហើយទឹកបានហូរចាក់ពីក្នុងខេត្តកំពង់ស្ពឺនោះចូលមកស្ទឹងព្រែកត្នោតនេះយ៉ាងគំហុកដែលជាហេតុធ្វើឲ្យទឹកស្ទឹងហក់ឡើងលឿននិងខ្លាំង។

ប្រភពដដែលបានបន្តទៀតថា នៅក្នុងភូមិសាស្ត្រខណ្ឌដង្កោមានប្រជាពលរដ្ឋរាប់រយគ្រួសាររស់នៅក្នុងសង្កាត់ចំនួន៤របស់ខណ្ឌដែលកំពុងទទួលរងការប៉ះពាល់ខ្លាំងពីទឹកជំនន់ស្ទឹងព្រែកត្នោតនេះ ក្នុងនោះរួមមាន ១-សង្កាត់ទៀន ចំនួន៤៧គ្រួសារ ស្មើនឹង៣៣ខ្នងផ្ទះ, ២-សង្កាត់សាក់សំពៅ ចំនួន១០៧គ្រួសារស្មើនឹង៦៦ខ្នងផ្ទះ, ៣-សង្កាត់ស្ពានថ្ម ចំនួន៥៤គ្រួសារ ស្មើនឹង២៧ខ្នងផ្ទះ និង៤-សង្កាត់គងនយ ចំនួន១១៣គ្រួសារ ស្មើរ១០៦ខ្នងផ្ទះ។

ទោះបីជាបែបណា មិនទាន់បណ្ដាលឲ្យមានប្រជាពលរដ្ឋណាម្នាក់បាត់បង់ជីវិតនោះឡើយ ពួកគាត់ត្រូវបានជួយសង្គ្រោះដោយអាជ្ញាធរ និងកងកម្លាំងប្រដាប់អាវុធរាជធានីភ្នំពេញ អាជ្ញាធនិងកងកម្លាំងប្រដាប់អាវុធខណ្ឌដង្កោ ដឹកនាំដោយលោកអភិបាលរាជធានីភ្នំពេញ លោក ឃួង ស្រេង សហការណ៍ជាមួយកម្លាំងបញ្ជាការដ្ឋានអង្គរក្ស កងរាជអាវុធហត្ថលើផ្ទៃប្រទេស។

តាមប្រភពខាងលើបានបន្តថា នៅវេលាព្រឹកថ្ងៃទី១៤ ខែតុលា ឆ្នាំ២០២០ កំណើនទឹកស្ទឹងបានធ្វើឲ្យទឹកហូរកាត់លើផ្លូវលេខ១២០អា ស្ថិតនៅក្នុងភូមិគងនយ សង្កាត់គងនយ ខណ្ឌដង្កោ ប្រវែងប្រមាណជាង១០០ម៉ែត្រ ដែលជាហេតុបង្កឲ្យប្រជាពលរដ្ឋមានការភ័យខ្លាចនិងព្រួយបារម្ភពីសុវត្ថិភាពរបស់ពួកគាត់ ។

ព្រោះប្រសិនបើគ្មានវិធានការទប់ស្កាត់ទេនោះផ្លូវអាចនិងត្រូវកាត់ផ្ដាច់ដោយកម្លាំងទឹកបុកខ្លាំង ហើយទឹកនិងជន់លិចផ្ទះសម្បែងរាប់ពាន់ខ្នងនិងដីស្រែរាប់រយហិចតានៅខាងក្រោមប៉ែកខាងត្បូង ហើយមិនត្រឹមតែលិចនៅខណ្ឌដង្កោប៉ុណ្ណោះទេ ប៉ុន្តែនិងបណ្ដាលឲ្យលិចលង់ដល់ភូមិសាស្ត្រខេត្តកណ្ដាលថែមទៀតផង ។

បន្ទាប់ពីមានហេតុការណ៍បែបនេះ ក្រសួងធនធានទឹកនិងឧតុនិយមរួមជាមួយកម្លាំងប្រដាប់អាវុធទាំងអស់ខាងលើបានយកលូដាក់ទប់ទឹកត្រង់ចំណុចដែលហូរកាត់ផ្លូវនោះបានដោយជោគជ័យ ប៉ុន្តែការព្រួយបារម្ភនៅតែមាន ព្រោះទឹកនៅតែបន្តកើនឡើងហើយផ្លូវទំនប់សណ្ដរស្ទឹងខាងលើនៅតែទទួលរងការគម្រាមកំហែងជាច្រើនកន្លែងទៀត។

ប្រជាពលរដ្ឋបាននិយាយថា ស្ថិតនៅក្នុងស្ថានភាពបែបនេះពួកគាត់មិនអាចយករបស់របរចេញពីក្នុងផ្ទះបានទាំងអស់នោះទេ គឺយកចេញបានខ្លះៗតែប៉ុណ្ណោះហើយរបស់ខ្លះត្រូវបានអណ្ដែតទៅតាមទឹកហូរបាត់អស់ ហើយនៅក្នុងឆ្នាំ២០២០នេះទឹកជំនន់មានកម្រិតខ្លាំងជាងកាលពីអំឡុងឆ្នាំ២០០០ទៅទៀត ដោយទឹកបានជន់ឡើងយ៉ាងគំហុកដោយមិននិងស្មានដល់។ទោះបីបែបណាអ្នកដែលមានផ្ទះខ្ពស់លិចតែខាងក្រោមមិនបានចាកចេញពីផ្ទះនោះទេ នៅតែបន្តរស់នៅលើផ្ទះប៉ុន្តែចំពោះអ្នកដែលផ្ទះត្រូវទឹកទាំងស្រុងនោះគឺត្រូវបានជម្លៀសទៅរកទទួលសុវត្ថិភាពហើយ ៕ (កែសម្រួលដោយ ៖ ធីតា)