រាជធានីភ្នំពេញ ៖ ក្រសួងទេសចរណ៍ សូមជម្រាបជូនដំណឹងដល់មន្ទីរទេសចរណ៍រាជធានី-ខេត្ត ម្ចាស់មូលដ្ឋានអាជីវកម្ម សេវាកម្មទេសចរណ៍ ប្រតិបត្តិករទេសចរណ៍ទាំងអស់ មេត្តាជ្រាបថា ចាប់ពីថ្ងៃទី១៤ ដល់ថ្ងៃទី២០ ខែតុលា ឆ្នាំ២០២០ ស្ថានភាពអាកាសធាតុប្រព័ន្ធសម្ពាធទាបបន្តលាតសន្ធឹងមកលើព្រះរាជាណាចក្រកម្ពុជានឹងនៅលើ សមុទ្រចិនខាងត្បូង បានកើតព្យុះទី១៦ (Tropical Torm) ឈ្មោះ Nangka ហើយព្យុះនេះនឹងចូលទៅឈូងសមុទ្រតុងកឹង ឆ្លងកាត់កោះហៃណាំ និងបន្តចូលទៅភាគខាងជើងប្រទេសវៀតណាម នៅថ្ងៃទី១៥ ខែតុលា ។
នៅថ្ងៃទី១៦-១៧ ខែតុលា មានព្យុះថ្មីទី១៧ ឈ្មោះ Saudel ដែលមានកំលាំងខ្លាំង ព្យុះនេះនឹងចូលប្រទេសវៀតណាម ត្រង់ចំនុច Qui Nhon រួចបន្តឥទ្ធិពលចូលមកប្រទេសកម្ពុជា តាមខេត្តរតនគិរី នៅថ្ងៃទី១៨-១៩ ខែតុលា ក្នុងកម្លាំងជាវិសម្ពាធ និងសម្ពាធទាប ធ្វើឱ្យមានភ្លៀងធ្លាក់រាយប៉ាយពីបង្គួរទៅច្រើននៅតំបន់វាលទំនាបទំនាបកណ្តាល តំបន់ជួរភ្នំដងរែក តំបន់ខ្ពង់រាប តំបន់មាត់សមុទ្រ ជាពិសេសខេត្តនៅភាគពាយ័ព្យ ។
ដូច្នេះដើម្បីធានាសន្តិសុខ និងសុវត្ថិភាពដល់ភ្ញៀវទេសចរជាតិ និងអន្តរជាតិ សូមមន្ទីរទេសចរណ៍រាជធានី-ខេត្ត ម្ចាស់មូលដ្ឋានអាជីវកម្មសេវាកម្មទេសចរណ៍ ប្រតិបត្តិករទេសចរណ៍ មេត្តាបញ្ជូនព័ត៌មានទៅដល់ភ្ញៀវទេសចរជាតិ និងអន្តរជាតិទាំងអស់ឱ្យបង្កើនការប្រុងប្រយ័ត្ន និងយកចិត្តទុកដាក់ខ្ពស់ ដើម្បីជៀសវាងនូវគ្រោះថ្នាក់ទាំងឡាយដែលអាចកើតឡើងជាយថាហេតុ ៕
ចែករំលែកព័តមាននេះ