ខេត្តកំពង់ស្ពឺ ៖ នារី២នាក់បានបាត់បង់ជីវិតក្នុងថ្ងៃតែមួយ តែក្នុងករណី២ផ្សេងគ្នា ដោយក្មេងស្រីម្នាក់ទៅរៀន ហើយក៏នាំគ្នាជិះទូកត្នោតលេងធ្វើឱ្យលិចបាត់ បណ្តាលឱ្យលង់ទឹកបាត់បង់ជីវិតតែម្តង ចំណែកនារីម្នាក់ទៀតជិះម៉ូតូឆ្លងកាត់ប្រឡាយដែលមានទឹកហូរខ្លាំង ធ្វើឱ្យនារីរងគ្រោះធ្លាក់ចូលក្នុងទឹកស្រះ បណ្តាលលង់ទឹកបាត់បង់ជីវិតផងដែរ។…
ខេត្តកំពង់ស្ពឺ ៖ នារី២នាក់បានបាត់បង់ជីវិតក្នុងថ្ងៃតែមួយ តែក្នុងករណី២ផ្សេងគ្នា ដោយក្មេងស្រីម្នាក់ទៅរៀន ហើយក៏នាំគ្នាជិះទូកត្នោតលេងធ្វើឱ្យលិចបាត់ បណ្តាលឱ្យលង់ទឹកបាត់បង់ជីវិតតែម្តង ចំណែកនារីម្នាក់ទៀតជិះម៉ូតូឆ្លងកាត់ប្រឡាយដែលមានទឹកហូរខ្លាំង ធ្វើឱ្យនារីរងគ្រោះធ្លាក់ចូលក្នុងទឹកស្រះ បណ្តាលលង់ទឹកបាត់បង់ជីវិតផងដែរ។ ក្រោយកើតហេតុនេះកើតឡើង សមត្ថកិច្ចជំបាញបានចុះស្រង់ក្មេងស្រីរងគ្រោះ និងធ្វើកំណត់ហេតុ រួចប្រគល់សពទៅឱ្យក្រុមគ្រួសារទទួលយកទៅធ្វើបុណ្យរាមប្រពៃណីផងដែរ។
ដោយករណីទី១- មានក្មេងស្រីម្នាក់បានមករៀននៅវត្តអង្គតាភេម ហើយក៏នាំគ្នាជិះទូកត្នោតលេងនៅក្នុងស្រះទឹក ដែលមានគ្នាចំនួន៥នាក់ ខណៈពេលកំពុងជិះទូកត្នោតលេងសុខៗ ក៏ស្រាប់លិចទូកតែម្តង ធ្វើឱ្យក្មេងស្រីរងគ្រោះលង់ទឹកបាត់បង់ជីវិត ចំណែក៤នាក់ទៀតបានហែលរត់រួច ហេតុការណ៍បានកើតឡើងកាលពីព្រឹកថ្ងៃទី១៣ ខែតុលា ឆ្នាំ២០២០ នៅចំណុចស្រះទឹកវត្តអង្គតាភេម ស្ថិតនៅភូមិក្បាលដំរី ឃុំទឹកល្អក់ ស្រុកគងពិសី ខេត្តកំពង់ស្ពឺ។
ប្រភពដដែលបន្តថា ក្មេងស្រីរងគ្រោះមានឈ្មោះសុន ចរិយា ភេទស្រី អាយុ១៣ឆ្នាំ ដែលមានទីលំនៅភូមិក្បាលដំរី ឃុំទឹកល្អក់ស្រុកគងពិសី ខេត្តកំពង់ស្ពឺ។ មានឪពុកជាគ្រូបង្រៀនឈ្មោះ តុប ជ្រុន និងអ្នកគ្រូឈ្មោះ ហ៊ុន សុជាតិ ជាគ្រូបង្រៀននៅសាលាបឋមសិក្សាវត្តក្រាំងគម្ពីរ ឃុំស្រង់ ស្រុកគងពិសី ។
យោងតាមសាច់ញាតិក្មេងស្រីរងគ្រោះបានឱ្យដឹងថា មុនពេលកើតហេតុ គឺនាងបានចេញពីផ្ទះដើម្បីទៅរៀនដូចសព្វដង លុះពេលទៅដល់សាលា នាងនិងមិត្តភក្តិ៤នាក់ទៀតក៏នាំគ្នាជិះទូកត្នោតលេង ប៉ុន្តែគាប់ជូនទូកត្នោតក៏លិចធ្វើឱ្យនាងលិចទៅតាមទូកបាត់ ចំណែកមិត្តភក្តិនាង៤នាក់ទៀតបានហែលទឹកមកគោកវិញបាន។ បន្ទាប់ពីកើតហេតុ មិត្តរបស់នាងបានស្រែកឱ្យគេជួយ ខណៈពេលនោះសមត្ថកិច្ចក៏បានអន្តរាគមន៍រាវរកដែរ តែអ្វីៗបានហួសពេលអស់ទៅហើយ។ ក្រុមគ្រួសាពិតជាមានការសោកស្តាយណាស់ដែលបាត់បង់កូនស្រីច្បង ក្នុងករណីលង់ទឹកស្រះនេះ។ ហើយក្នុងនាមជាសាច់ញាតិសូមបួងសួងឱ្យដួងវិញ្ញាណក្ខន្ធនាងទៅកាន់សុគតិភពកុំបីឃ្លៀងឃ្លាតឡើយ ។
ដោយឡែកករណីទី២- គឺនៅរសៀលថ្ងៃដដែលនោះ មានគេប្រទះឃើញសាកសពនារីម្នាក់អណ្តែតក្នុងស្រះទឹក ស្ថិតនៅភូមិព្រៃដងទឹក ឃុំព្រះនិព្វាន ស្រុកគងពិសី ខេត្តកំពង់ស្ពឺ។ ជនរងគ្រោះមានឈ្មោះ ចេននី ពាលី ភេទស្រី អាយុ20ឆ្នាំ រស់នៅភូមិត្រពាំងវែង ឃុំវាល ស្រុកគងពិសី ខេត្តកំពង់ស្ពឺ ។
បើតាមការបំភ្លឺនៅកន្លែងកើតហេតុបានឱ្យដឹងថា មុនពេលកើតហេតុ គឺនារីរងគ្រោះបានជិះម៉ូតូមួយគ្រឿងម៉ាកវ៉េវ ពណ៌ខ្មៅ ស៊េរី2020 ពាក់ស្លាកលេខ កំពង់ស្ពឺ 1Q1377 ដោយនារីរងគ្រោះបានជិះម៉ូតូឆ្លងកាត់ប្រឡាយដែលមានទឹកហូរខ្លាំង លុះពេលជិះដល់ចំណុចកើតហេតុខាងលើ ក៏ស្រាប់តែនារីរងគ្រោះបានធ្លាក់ចូលក្នុងស្រះទឹកមួយកន្លែង នៅភូមិព្រៃដងទឹក ឃុំព្រះនិព្វាន ស្រុកគងពិសី បណ្ដាលឲ្យលង់ទឹកបាត់បង់ជីវិតនៅក្នុងស្រះទឹកតែម្តង ដោយគ្មានអ្នកណាម្នាក់ជួយទាន់ឡើយ។
ក្រោយពេលកើតហេតុ សមត្ថកិច្ចមូលដ្ឋានបានចុះធ្វើកំណត់ហេតុ រួចប្រគល់សពនារីរងគ្រោះទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ