រាជធានីភ្នំពេញ ៖ ក្នុងរយៈពេល១៤ថ្ងៃ ជំនន់ទឹកភ្លៀងបានឆក់យកជីវិតមនុស្សអស់ចំនួន១២នាក់ ក្នុងចំណោមខេត្តចំនួន៥ដែលរងប៉ះពាល់ខ្លាំង។ នេះបើតាមការឱ្យដឹងពីអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
លោកសុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យកោះសន្តិភាពដឹងនៅថ្ងៃទី១៤ខែតុលា ឆ្នាំ២០២០ថាគិតចាប់ពីថ្ងៃទី១ ដល់ថ្ងៃទី១៤ ខែតុលា ឆ្នាំ២០២០មានអ្នកស្លាប់ដោយសារជំនន់ទឹកភ្លៀងចំនួន១២នាក់ ក្នុងខេត្តចំនួន៥ ។
អ្នកនាំពាក្យបានរៀបរាប់ថា អ្នកដែលបាត់បង់ជីវិតទាំង១២នាក់ រួមមាន ១-នៅខេត្តបន្ទាយមានជ័យមានអ្នកបាត់បង់ជីវិតចំនួន៥នាក់ ក្នុងនោះក្មេងចំនួន២នាក់ និងមនុស្សធំចំនួន៣នាក់ ។ ចំពោះមូលហេតុដែលបណ្តាលឲ្យបាត់បង់ជីវិត គឺលង់ទឹកពេលចេញពីសាលារៀន មួយករណី លង់ទឹកបាត់បង់ជីវិតចំនួន២ករណី ទឹកគួចពេលដើរ កំសាន្តជាក្រុម មួយករណី និងចិញ្ចាត់ត្រីរអិលជើងធ្លាក់ទឹកមួយករណី។
២-នៅខេត្តព្រះសីហនុមានអ្នកបាត់បង់ជីវិតចំនួន២ករណី ក្នុងនោះក្មេងម្នាក់បានបាត់បង់ជីវិតដោយសាររបូតពីដៃឪពុកធ្លាក់ចូលទឹក និងមនុស្សធំម្នាក់ទៀតដើររអិលធ្លាក់ប្រឡាយទឹកគួច ។
៣-នៅខេត្តពោធិ៍សាត់មានអ្នកបាត់បង់ជីវិតចំនួន៣នាក់ (ក្មេង១នាក់ និងធំ២នាក់) ករណីចុះលេងទឹកប្រឡាយពេលហូរខ្លាំង, ករណីមានជំងឺធ្លាក់ចូលទឹកលង់បាត់បង់ជីវិត និងករណីរអិលជើងធ្លាក់ទឹកលង់បាត់បង់ជីវិត។
៤-នៅខេត្តប៉ៃលិនមានអ្នកបាត់បង់ជីវិតម្នាក់ ជាពលករឆ្លងទឹកអូរព្រំដែនទឹកគួច និង៥-នៅខេត្តកំពង់ធំមានអ្នកបាត់បង់ជីវិតក្មេងម្នាក់បានលង់ទឹកនៅសាលារៀន។
អ្នកនាំពាក្យបានឲ្យដឹងទៀតថាជំនន់ទឹកភ្លៀងបានធ្វើឲ្យខេត្តចំនួន១៩ប៉ះពាល់ខួចខាត ស្មើនឹង៦៨ក្រុង/ ស្រុក/ ខណ្ឌ/ សង្កាត់រួមមាន៖ខេត្តពោធិ៍សាត់ ខេត្តប៉ៃលិន ខេត្តបន្ទា យមានជ័យ រាជធានីភ្នំពេញ ខេត្តបាត់ដំបង ខេត្តស្វាយរៀង ខេត្តឧត្តមានជ័យ ខេត្តសៀមរាប ខេត្តតាកែវ ខេត្តកំពង់ស្ពឺ ខេត្តមណ្ឌលគិរី ខេត្តព្រះសីហនុ ខេត្តកោះកុង ខេត្តព្រះវិហារ ខេត្តស្ទឹងត្រែង ខេត្តកំពង់ចាម ខេត្តកណ្តាល ខេត្តកំពង់ឆ្នាំ និងខេត្តកំពង់ធំ។
លោកបានបន្ថែមក្នុងចំណោមខេត្តទាំងនេះជំនន់ទឹកភ្លៀងបានប៉ះពាល់ប្រជាជនប្រមាណ៣៩,៧០២គ្រួសារ ស្មើប្រមាណ១៥៨,៨០៨នាក់ ប្រជាជនស្លាប់១២នាក់(ក្មេង៥នាក់) ។ ផ្ទះប៉ះពាល់ប្រមាណ៣៩,៤៨៥ខ្នង ផ្ទះខូតខាត៣០ខ្នង សាលារៀនលិចទឹក៤០២កន្លែង ស្រូវលិចទឹកប្រមាណ១១៦,៧៦៤ហិកតា ក្នុងនេះខូចខាតប្រមាណ៤,៩៤៦ហិកតា ។
ជាមួយគ្នានោះដែរ អ្នកនាំពាក្យក៏បានឲ្យដឹងថា ជំនន់ទឹកភ្លៀងនេះក៏បានប៉ះពាល់ដល់ដំណាំរួមផ្សំលិចទឹកមានប្រមាណ៥៥,៣៣៥ហិកតា ក្នុងនេះខូចខាតប្រមាណ៦,២៨៦ហិកតា ។ ផ្លូវជាតិ ផ្លូវខេត្ត ផ្លូវគ្រួសក្រហម ប៉ះពាល់ប្រមាណ១៩៧,១៧១ម៉ែត្រ ។ ផ្លូវលំលិចទឹកប្រមាណ២៦២,៥២០ម៉ែត្រ និង៣១ខ្សែ ។ ស្ពានលិចទឹកប្រមាណ២៤កន្លែង ទំនប់ប៉ះពាល់ប្រមាណ២១,១៤២ម៉ែត្រ ប្រឡាយមេ ប្រឡាយរង ប្រឡាយស្រោចស្រព ប៉ះពាល់ប្រមាណ២៤៤,៣១៣ម៉ែត្រ៕ (កែសម្រួលដោយ ៖ ធីតា)
ចែករំលែកព័តមាននេះ