រាជធានីភ្នំពេញ ៖ សេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានធ្វើការបំភ្លឺចំពោះព័ត៌មានទាក់ទងនឹងការប្រកាសរបស់អ្នកនាំពាក្យក្រសួងការបរទេសឥណ្ឌូណេស៊ី នៅថ្ងៃទី២៤ មីនា តាមរយៈការផ្សាយរបស់ទីភ្នាក់ងារ AFP ដែលនិយាយថា កម្ពុជា និងថៃ មិនទាន់យល់ព្រមអំពីការដាក់អ្នកសង្កេតការណ៍ឥណ្ឌូណេស៊ីនៅតាមព្រំដែននោះ គឺផ្ទុយពីការពិតទាំងស្រុង ។ សេចក្តីថ្លែងការណ៍បានបញ្ជាក់ថា កម្ពុជាបានយល់ព្រមភ្លាមៗអំពីការដាក់អ្នកសង្កេតការណ៍មកខាងកម្ពុជា ព្រមទាំងបានបង្ហាញពីចំណុចដែលអ្នកសង្កេតការណ៍ឈរជើងទៀតផង ។ ផ្ទុយទៅវិញ ភាគីថៃទេ ដែលទាត់ចោលអ្នកសង្កេតការណ៍មិនឱ្យមានលើទឹកដីរបស់ខ្លួន ។
អ្នកនាំពាក្យក្រសួងការបរទេសកម្ពុជាបានប្រកាសទាត់ចោលយ៉ាងដាច់ខាតនូវការប្រកាសដ៏អកុសលរបស់អ្នកនាំពាក្យក្រសួងការបរទេសឥណ្ឌូណេស៊ីនេះ ។ លោកកុយ គួង អ្នកនាំពាក្យក្រសួងការបរទេសបានមានប្រសាសន៍កាលពីព្រឹកថ្ងៃទី២៥ មីនា ២០១១ ថា ក្រសួងការបរទេសកម្ពុជារហូតដល់ពេលនេះនៅមិនទាន់ទទួលព័ត៌មានពីវត្តមានរបស់មន្ត្រីនៃក្រុមអ្នកសង្កេតការណ៍របស់ឥណ្ឌូណេស៊ីមកកាន់ប្រទេសកម្ពុជា ដើម្បីធ្វើការត្រួតពិនិត្យនៅតាមព្រំដែនកម្ពុជា-ថៃនៅឡើយទេ ។ លោកបានថ្លែងប្រាប់កោះសន្តិភាពតាមទូរស័ព្ទបន្តទៀតថា លោកមិនបានទទួលព័ត៌មានអ្វីជាផ្លូវការពីបញ្ហាវត្តមានអ្នកសង្កេតការណ៍ឥណ្ឌូណេស៊ីថា តើពួកគេនឹងមកដល់កម្ពុជានៅពេលណានោះទេ ។ ទោះបីយ៉ាងណា លោកមិនបានបញ្ជាក់ពីមូលហេតុឱ្យបានច្បាស់លាស់នៅឡើយទេ ដោយគ្រាន់តែបញ្ជាក់យ៉ាងខ្លីថា ក្រសួងការបរទេសនៅមិនទាន់បានទទួលព័ត៌មានជាផ្លូវការទេ ។
ក្រុមអ្នកវិភាគបានកត់សម្គាល់ថា បញ្ហាអ្នកសង្កេតការណ៍ឥណ្ឌូណេស៊ីអាចត្រូវជាប់គាំងដោយសារតែភាគីសៀមក្រឡិចក្រឡុចហើយបានធ្វើការប្រកាសមិនទទួលយកអ្នកសង្កេតការណ៍ឥណ្ឌូណេស៊ី និងបានហាមមិនឱ្យអ្នកសង្កេតការណ៍ចូលទៅកាន់តំបន់ដែលសៀមអះអាងថា ជាដី៤,៦គីឡូម៉ែត្រ នៅតំបន់ប្រាសាទព្រះវិហារផងដែរ ។ គួររំឭកថា កាលពីថ្ងៃទី២២ កុម្ភៈ ឆ្នាំ២០១១ មានការកោះប្រជុំថ្នាក់រដ្ឋមន្ត្រីការបរទេសអាស៊ានជាបន្ទាន់មួយនៅទីក្រុងហ្សាការតា ប្រទេសឥណ្ឌូណេស៊ី ។ រដ្ឋមន្ត្រីការបរទេសឥណ្ឌូណេស៊ីដែលជាប្រធានអាស៊ាន និងប្រធានកិច្ចប្រជុំបានអះអាងថា អាស៊ានគ្រោងនឹងបញ្ជូនអ្នកសង្កេតការណ៍អាស៊ានមកកាន់តំបន់ដែលមានការប៉ះទង្គិចគ្នារវាងប្រទេសកម្ពុជា និងថៃ ។ ការបញ្ជូននេះត្រូវបានគេអះអាងថា អ្នកសង្កេតការណ៍ទាំងនោះគ្រោងនឹងបញ្ជូនមកដល់កម្ពុជានៅថ្ងៃទី២៥ កុម្ភៈ ឆ្នាំ២០១១ កន្លងទៅនោះ ប៉ុន្តែរហូតមកដល់ពេលនេះគេនៅមិនទាន់បានឃើញវត្តមានអ្នកទាំងនោះទេ ៕
ចែករំលែកព័តមាននេះ