ខេត្តកណ្តាល ៖ នៅព្រឹកថ្ងៃទី១៣ ខែតុលា ឆ្នាំ២០២០នេះ លោក ទិន សុចិត្រា ព្រះរាជអាជ្ញារងសាលាដំបូងខេត្តកណ្តាល បានសម្រេចធ្វើការចោទប្រកាន់ម្ចាស់ផ្ទះយកវែកសម្ល…
ខេត្តកណ្តាល ៖ នៅព្រឹកថ្ងៃទី១៣ ខែតុលា ឆ្នាំ២០២០នេះ លោក ទិន សុចិត្រា ព្រះរាជអាជ្ញារងសាលាដំបូងខេត្តកណ្តាល បានសម្រេចធ្វើការចោទប្រកាន់ម្ចាស់ផ្ទះយកវែកសម្ល និងកាបិតប៉័ងតោ វាយធ្វបាបយ៉ាងឃោរឃៅលើអ្នកបំរើក្រោមបទចោទ «ទារុណកម្ម និងអំពើឃោរឃៅ» តាមមាត្រា២១០ នៃក្រមព្រហ្មទណ្ឌ ។ ហើយចំពោះសំណុំរឿងនេះ ត្រូវបានបញ្ជូនទៅលោកចៅក្រម ដើម្បីចាត់ការបន្តតាមនីតិវិធីច្បាប់នៅរសៀលនេះផងដែរ ។
ជនត្រូវចោទខាងលើឈ្មោះ ដាំង រស្មី ភេទស្រី អាយុ២៧ឆ្នាំ ជាជនជាតិខ្មែរ មានទីលំនៅក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរមេផ្ទះ។ ចំណែកជនរងគ្រោះឈ្មោះ ផាត សុរីន ភេទស្រី អាយុ១៧ឆ្នាំ ជនជាតិខ្មែរ មុខរបរអ្នកបំរើនៅតាមផ្ទះ មានស្រុកកំណើតនៅខេត្តកំពង់ធំ។ បច្ចុប្បន្នស្នាក់នៅភូមិថ្មី សង្កាត់តាខ្មៅ ក្រុងតាខ្មៅ មានឪពុកឈ្មោះ សោម ផាត អាយុ៤២ឆ្នាំ មុខរបរកសិករ និងមា្តយឈ្មោះ សន សុក ភេទស្រី អាយុ៤៧ឆ្នាំ។
គួរបញ្ជាក់ថា តាមមាត្រា២១០ នៃក្រមព្រហ្មទណ្ឌ បទល្មើស «ធ្វើទារុណកម្ម និងអំពើឃោរឃៅ» ចែងថា ការធ្វើទារុណកម្ម ឬអំពើឃោរឃៅដែលប្រព្រឹត្តទៅលើបុគ្គលណាមួយ ត្រូវផ្តន្ទាទោសដាក់ពន្ធនាគារចាប់ពី៧ (ប្រាំពីរ) ឆ្នាំ រហូតទៅ ១៥ (ដប់ប្រាំ) ឆ្នាំ ។
គួររំលឹកថា បើតាមសមត្ថកិច្ចនគរបាលក្រុងតាខ្មៅបានឱ្យដឹងថា នៅថ្ងៃទី៦ ខែមិថុនា ឆ្នាំ២០២០ មីងបង្តើតរបស់ជនរងគ្រោះដែលមានមុខរបរជាកសិករមានទីលំនៅភូមិ-ឃុំជាមួយគ្នាបាននាំក្មួយ (ជនរងគ្រោះ) មកធ្វើការជាអ្នកបំរើរនៅផ្ទះរបស់ឈ្មោះដាំង រស្មី នៅភូមិថ្មី សង្កាត់ តាខ្មៅ ក្រុងតាខ្មៅ ។ ពេលដែលរូបនាងមកធ្វើការជាអ្នកបំរើនៅផ្ទះ ថៅកែស្រីរូបនេះតែងតែវាយដំមកលើរូបនាងរហូត គឺយកវែកសម្លវាយក្បាល វាយមុខ បណ្តាលឱ្យ បែកហូរឈាម ពេលខ្លះទៀតបានកាបិតប៉័ងតោវាយក្បាល និងដាច់មុខ ធ្វើឱ្យយបែកហូរឈាមជាច្រើនលើកច្រើនសារ ហើយមិនបាននាំនាងទៅពេទ្យ ឬទិញថ្នាំឱ្យនាងលេបទេ ថែមទាំងបង្ខំឱ្យនាងធ្វើការងារផ្ទះ ទោះបីជានា ឈឺក៏ដោយ ។
គួររំលឹកទៀតថា ៖ ស្រីស្អាតមុខស្រស់ ចូលចិត្តប្រើហិង្សាលើអ្នកបម្រើនៅផ្ទះ ទ្រាំលែងបាននាងតូចរត់ចេញមកប្តឹង ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ