ខេត្តសៀមរាប ៖ បើគ្មានអ្វីប្រែប្រួលទេ លោកវរសេនីយ៍ឯក ប៉ោ វណ្ណនឹត នឹងឡើងកាន់តំណែងជាមេបញ្ជាការកងរាជអាវុធហត្ថខេត្តសៀមរាបជំនួសលោកឧត្តមសេនីយ៍ត្រី ម៉ន សាម៉ុន នៅពេលឆាប់ៗខាងមុខ។
ខេត្តសៀមរាប ៖ បើគ្មានអ្វីប្រែប្រួលទេ លោកវរសេនីយ៍ឯក ប៉ោ វណ្ណនឹត នឹងឡើងកាន់តំណែងជាមេបញ្ជាការកងរាជអាវុធហត្ថខេត្តសៀមរាបជំនួសលោកឧត្តមសេនីយ៍ត្រី ម៉ន សាម៉ុន នៅពេលឆាប់ៗខាងមុខ។ នេះបើតាមការអះអាងរបស់អ្នកនាំពាក្យកងរាជអាវុធហត្ថលើផ្ទៃប្រទេស លោកខេង ទីតូ កាលពីរសៀលថ្ងៃទី២២ មេសា ២០១៥នេះ។
ទោះជាយ៉ាងណា លោកមិនបានប្រាប់ឲ្យដឹងពីកាលបរិច្ឆេទនៃការប្រកាសឡើងកាន់តំណែងជាផ្លូវការនៅឡើយទេ គ្រាន់តែបញ្ជាក់ថា ក្រសួងការពារជាតិបានសម្រេចទៅលើលិខិតស្នាមរួចរាល់ហើយ ដោយផ្ទេរលោកឧត្តមសេនីយ៍ត្រី ម៉ន សាម៉ុន ឲ្យទៅកាន់មុខតំណែងថ្មី ជាមេបញ្ជាការរងកងរាជអាវុធហត្ថលើផ្ទៃប្រទេស ទទួលបន្ទុកខាងផ្នែកហ្វឹកហ្វឺន ហើយលោកវរសេនីយ៍ឯក ប៉ោ វណ្ណនឹត បច្ចុប្បន្នមានតួនាទីជាមេបញ្ជាការរងកងរាជអាវុធហត្ថរាជធានីភ្នំពេញ ជាអ្នកជំនួសតំណែងរបស់លោកឧត្តមសេនីយ៍ត្រី ម៉ន សាម៉ុន ។
ប្រភពពីមន្ត្រីម្នាក់បានបង្ហើបថា លោកវរសេនីយ៍ឯក ប៉ោ វណ្ណនឹត ដែលគ្រោងនឹងឡើងកាន់តំណែងជាមេបញ្ជាការកងរាជអាវុធហត្ថខេត្តសៀមរាប ទើបតែមានអាយុជាង៣០ឆ្នាំប៉ុណ្ណោះ ។ លោកគឺជាកូនប្រុសបង្កើតរបស់លោឧត្តមសេនីយ៍ ប៉ោ វណ្ណៈ មេបញ្ជាការកងរាជអាវុធហត្ថខេត្តបាត់ដំបង និងជាកូនប្រសារបស់លោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុហត្ថលើផ្ទៃប្រទេសផងដែរ។
ចំណែកលោកឧត្តមសេនីយ៍ត្រី ម៉ន សាម៉ុន ត្រូវបានគេរាយការណ៍ថា ជាមនុស្សតែម្នាក់គត់ដែលបានក្តាប់មុខតំណែងជាមេបញ្ជាការកងរាជអាវុធហត្ថខេត្តសៀមរាប ចាប់តាំងពីថ្ងៃបង្កើតអង្គភាពកងរាជអាវុធហត្ថ ក្នុងឆ្នាំ១៩៩៥ មកម្ល៉េះ។លោកបានពង្រឹង និងក្តាប់អំណាចយ៉ាងរឹងមាំនៅក្នុងទីបញ្ជាការរបស់ខ្លួនអស់រយៈកាលជិត២០ឆ្នាំ ក៏ប៉ុន្តែរយៈពេលប្រមាណ២ឆ្នាំចុងក្រោយនេះគេឃើញមានការផ្ទុះវិវាទផ្ទៃក្នុងយ៉ាងចម្រូងចម្រាស់នៅក្នុងអង្គភាពរបស់ខ្លួនរហូតដល់មានការប្តឹងតទល់គ្នាទៅអង្គភាពប្រឆាំងអំពើពុករលួយថែមទៀត៕
ចែករំលែកព័តមាននេះ