ស្ថានភាពទឹកជំនន់លិចផ្លូវ៥៧Bថយបន្តិច ខណៈកន្លែងដទៃនៅតែធ្ងន់ធ្ងរ
- បាត់ដំបង
ខេត្តបាត់ដំបង ៖ អធិការនគរបាលស្រុកបវេល លោក សុខ សារិន បានផ្ដល់ព័ត៌មានបឋមដល់កោះសន្តិភាព នៅព្រឹកថ្ងៃទី១៣ តុលា នេះថា…
ខេត្តបាត់ដំបង ៖ អធិការនគរបាលស្រុកបវេល លោក សុខ សារិន បានផ្ដល់ព័ត៌មានបឋមដល់កោះសន្តិភាព នៅព្រឹកថ្ងៃទី១៣ តុលា នេះថា កំណាត់ផ្លូវជាតិលេខ៥៧B ដែលឆ្លងកាត់ស្រុកបវេល ឆ្ពោះទៅកាន់ស្រុកសំពៅលូន ដែលត្រូវជំនន់ទឹកភ្លៀងវាយប្រហារយ៉ាងធ្ងន់ធ្ងរ កាលពីម្សិលមិញ ពេលនេះ ហាក់បានធូរស្រាលបន្តិចហើយ។ ប៉ុន្តែកន្លែងដទៃទៀត នៅតែលិចលង់ធ្ងន់ធ្ងរនៅឡើយ រាប់ទាំងកំណាត់ផ្លូវ និង លំនៅឋានរបស់ពលរដ្ឋនៅម្ដុំផ្សារ ចំកណ្ដាលទីរួមស្រុកបវេលផង។
លោកសុខ សារិន បានថ្លែងថា កំណាត់ផ្លូវជាតិលេខ៥៧B ដែលប្រឈមនឹងគ្រោះទឹកជំនន់ជាងគេ គឺនៅចំណុចអូរកញ្ចុះ ស្ថិតនៅក្នុងភូមិកំពង់ឆ្នាំង១ ឃុំបវេល ស្រុកបវេល។ កំណាត់ផ្លូវនេះ បានរងគ្រោះធ្ងន់ធ្ងរកាលពីម្សិលមិញ តែនៅព្រឹកនេះ (១៣ តុលា ២០២០) ហាក់បានធូរស្រាលបន្តិចហើយ ។ លោកបានបញ្ជាក់ថា ពេលនេះ យានយន្តនានា អាចធ្វើដំណើរឆ្លងកាត់បានខ្លះៗហើយ តែចំណែកខ្លះនៃផ្លូវបានបាក់ស្រុកដាច់តែម្ដង។
ដោយឡែក នៅកន្លែងដទៃទៀតនៃស្រុកបវេលនេះ បើតាមលោកសុខ សារិន បានបញ្ជាក់ថា កំពុងលិចលង់ធ្ងន់ធ្ងរនៅឡើយ ។ ដូចជានៅម្ដុំផ្សារបវេល លិចទាំងក្នុងផ្សារ លិចទាំងកំណាត់ផ្លូវរាប់រយម៉ែត្រ។ ចំណុចខ្លះ អាចធ្វើដំណើរបាន តែកន្កែងខ្លះត្រូវបានបិតជាបណ្ដោះអាសន្នមិនឱ្យធ្វើដំណើរឆ្លងកាត់ឡើយ ចៀសវាងគ្រោះថ្នាក់ដោយយថាហេតុ។
សូមបញ្ជាក់ថា ជារៀងរាល់ឆ្នាំស្រុកបវេល ហាក់មិនធ្លាប់ជួបប្រទះនូវជំនន់ទឹកភ្លៀងធ្ងន់ធ្ងរដូចឆ្នាំនេះទេ។ នេះបើតាមការប្រកាសព័ត៌មានរបស់រដ្ឋបាលស្រុកបវេល។ សម្រាប់ឆ្នាំនេះ ស្រុកបវេលដែលជាស្រុកមួយ មានពលរដ្ឋស្ទើរ៩០% ពឹងផ្អែកលើកសិកម្មដំណាំស្រូវ បានរងគ្រោះយ៉ាងធ្ងន់ធ្ងរ ដោយសារជំនន់ទឹកភ្លៀង ហើយពេលនេះដំណាំកសិកម្មស្ទើរគ្រប់ទីកន្លែងអាចប្រឈមនឹងការខូចខាត។
លោកសុខ សារិន អធិការស្រុកបវេល បានបញ្ជាក់ថា ពេលនេះ លោកកំពុងដឹកនាំកម្លាំងអធិការ និងកម្លាំងមូលដ្ឋានផង ចុះពិនិត្យស្ថានភាពទឹកជំនន់ នៅតាមដងផ្លូវនានា ដែលកំពុងលិចលង់ និងចុះជួយសង្គ្រោះពលរដ្ឋបន្តទៀត នៅតាមឃុំមួយចំនួនដែលកំពុងប្រឈមខ្លាំងនៅឡើយ ។
ចែករំលែកព័តមាននេះ