ខេត្តកណ្ដាល ៖ កាលពីល្ងាចថ្ងៃទី១២ ខែតុលា ឆ្នាំ២០២០ លោក អាត ចន្ទ័ដារា ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីការឃុំខ្លួនជនសង្សយ័ម្នាក់ផ្តាច់ជីវិតមិត្តភក្តិម្នាក់…
ខេត្តកណ្ដាល ៖ កាលពីល្ងាចថ្ងៃទី១២ ខែតុលា ឆ្នាំ២០២០ លោក អាត ចន្ទ័ដារា ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីការឃុំខ្លួនជនសង្សយ័ម្នាក់ផ្តាច់ជីវិតមិត្តភក្តិម្នាក់ នៅស្រុកកោះធំ ផ្តើមឡើងដោយសារការជក់គ្រឿងញៀន ដាក់ពន្ធនាគារបណ្តោះអាសន្នពីបទ «ឃាតកម្ម» តាមមាត្រា១៩៩ នៃក្រមព្រហ្មទណ្ឌ ដែលប្រព្រឹត្តនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល កាលពីថ្ងៃទី១៧ ខែកុម្ភៈ ឆ្នាំ២០២០ ។
ជនត្រូវចោទឈ្មោះវិច ឆៃ ភេទប្រុស.អាយុ២៣ឆ្នាំ សញ្ជាតិខ្មែរ មានទីលំនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល។
ជនរងគ្រោះឈ្មោះ ផន សុខខន (ហៅ អឹប) ភេទប្រុស អាយុ២៧ឆ្នាំ មានទីលំនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល។
គួររំលឹកថា មុននឹងឈានដល់ការចាប់ខ្លួនជនសង្ស័យជាឃាតករខាងលើនេះ កាលពីថ្ងៃទី១៧ ខែកុម្ភៈ ឆ្នាំ២០២០ ក្រុមគ្រួសារជនរងគ្រោះបានបាត់ជនរងគ្រោះ ដោយពុំឃើញត្រឡប់មកផ្ទះវិញ ក៏ទៅដាក់ពាក្យបណ្ដឹងនៅអធិការដ្ឋាននគរបាលស្រុកកោះធំ ដើម្បីស្វែងរក។
បន្ទាប់ពីបានពាក្យបណ្ដឹងពីក្រុមគ្រួសារជនរងគ្រោះរួច កម្លាំងនគរបាលស្រុកកោះធំ រាយការណ៍បន្តទៅនគរបាលជំនាញនៃស្នងការដ្ឋាននគរបាលខេត្តកណ្ដាល រួចធ្វើការស្រាវជ្រាវ និងស៊ើបអង្កេតអស់រយៈពេលជាង៨ខែ ជាលទ្ធផលដឹងថា ជនរងគ្រោះបាត់បង់ជីវិតដោយអំពើឃាតកម្ម រួចកំណត់មុខសញ្ញាជនដៃដល់ជាឃាតករព្យាយាមទៅរស់នៅខេត្តតាកែវ ។
បន្ទាប់មកកម្លាំងនគរបាលការិយាល័យព្រហ្មទណ្ឌកម្រិតស្រាល និងការិយាល័យព្រហ្មទណ្ឌកម្រិតធ្ងន់ រួមទាំងកម្លាំងជំនាញពាក់ព័ន្ធ ដោយសហការជាមួយកម្លាំងនគរបាលស្រុកកោះធំ និងកម្លាំងនៃស្នងការដ្ឋាននគរបាលខេត្តតាកែវ ក្រោមការចង្អុរបង្ហាញរបស់លោកឧត្តមសេនីយ៍ទោ ឈឿនសុចិត្ត ស្នងការនគរបាលខេត្តកណ្ដាល និងមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញានៃអយ្យការអមសាលាដំបូងខេត្តតាកែវ និងលោក ទិន សុចិត្រា ព្រះរាជអជ្ញារង នៃអយ្យការអមសាលាដំបូងខេត្តកណ្ដាល ចាប់ខ្លួនជនសង្ស័យជាឃាតករបាននៅថ្ងៃទី៨ ខែតុលា ឆ្នាំ២០២០ នៅចំណុចភូមិសែនបន ឃុំលាយបូរ ស្រុកត្រាំកក់ ខេត្តតាកែវ រួចបញ្ជូនមកស្នងការដ្ឋាននគរបាលខេត្តកណ្ដាល ហើយយកជនសង្ស័យនោះមកធ្វើត្រាប់ពីសកម្មភាពដែលខ្លួនបានផ្តាច់ជីវិតជនរងគ្រោះ ។
យោងតាមចម្លើយសារភាពរបស់ជនសង្ស័យបានឲ្យដឹងថា ខ្លួនពិតជាបានចូលរួមធ្វើសកម្មភាពផ្តាច់ជីវិតជនរងគ្រោះឈ្មោះ ផន សុខខន (ហៅ អឹប) ភេទប្រុស អាយុ២៧ឆ្នាំ មានទីលំនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល និងបានអូសយកសពទៅកប់ចោលនៅក្នុងចម្ការស្វាយត្រង់ព្រំប្រទល់ដីរបស់ឈ្មោះ សល់ និងឈ្មោះ ប្រុស ស្ថិតនៅខាងកើតទំនប់ទទឹងថ្ងៃ រំលង៣ក្បាលដី ស្ថិតក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល ប្រាកដមែន ។
ការផ្តាច់ជីវិតជនរងគ្រោះឈ្មោះ ផន សុខខន នោះគឺមិត្តភក្តិរបស់ឈ្មោះ ដូយ ផៃ (ហៅនិល) ភេទប្រុស អាយុ២៥ឆ្នាំ ជាអ្នកផ្តាច់ជីវិតនៅពេលដែលពួកគេទាំង៣នាក់ កំពុងជក់គ្រឿងញៀនជាមួយគ្នា ដោយកាលនោះគឺឈ្មោះ ដូយ ផៃ បានខឹងជនរងគ្រោះនិយាយថា បឺតជក់យូរជាងគេ រួចក៏បានចាប់សក់ក្បាលជនរងគ្រោះបោកទៅក្រោយបុកទៅនឹងគល់ស្វាយ បណ្ដាលឲ្យបាត់បង់ជីវិតតែម្ដង ៕ (កែសម្រួលដោយ ៖ ធីតា)
ចែករំលែកព័តមាននេះ