ខេត្តកំពង់ចាម ៖ ម៉ូតូម៉ាកវ៉េវមួយគ្រឿង ដែលមានតម្លៃប្រមាណជាង២០០ដុល្លារ បានធ្លាក់កប់នៅក្នុងរណ្តៅលូជាង៦ម៉ែត្រ រយៈពេលមួយខែមកហើយទើបប្រទះឃើញ ។ ម៉ូតូដែលធ្លាក់កប់បាត់ក្នុងលូ ដោយសារតែការបាក់ស្រុតកម្រាលបេតុងសួនច្បារមាត់ទន្លេក្រុងកំពង់ចាម ក្បែរស្ពានគីហ្សុ៊ណា…
ខេត្តកំពង់ចាម ៖ ម៉ូតូម៉ាកវ៉េវមួយគ្រឿង ដែលមានតម្លៃប្រមាណជាង២០០ដុល្លារ បានធ្លាក់កប់នៅក្នុងរណ្តៅលូជាង៦ម៉ែត្រ រយៈពេលមួយខែមកហើយទើបប្រទះឃើញ ។ ម៉ូតូដែលធ្លាក់កប់បាត់ក្នុងលូ ដោយសារតែការបាក់ស្រុតកម្រាលបេតុងសួនច្បារមាត់ទន្លេក្រុងកំពង់ចាម ក្បែរស្ពានគីហ្សុ៊ណា នាពេលកន្លងមក ។ ទោះបីជាបែបណា ក៏អាចចាត់ទុកជាសំណាងមួយក្នុងមួយម៉ឺនគ្រោះថ្នាក់ ដែលបុរសម្ចាស់ម៉ូតូចេះស្រវារឡើងលើគោកចេញពីក្នុងរណ្ដៅលូដ៏ជ្រៅនោះរួចក្រោយបាក់ស្រុតនិងបាត់តែម្តង ។
ពេលនោះមន្ត្រីជំនាញ មន្ត្រីសាធារណការខេត្ត អះអាងថាដោយសារតែប្រព័ន្ធលូសាងសង់ក្នុងសម័យបារាំងចាស់ណាស់ទៅហើយ ទើបបណ្ដាលឱ្យមានការផុងស្រុតបាក់យ៉ាងដូច្នេះ ។
បុរសរងគ្រោះឈ្មោះ នេន សុខឃីន អាយុ៤៤ឆ្នាំ អ្នកលក់បបរសប្រាប់ឲ្យដឹងនៅព្រឹកថ្ងៃទី១២ តុលា ២០២០កន្លងមកថា កាលពីយប់រំលងអធ្រាត្រថ្ងៃទី១២ ឈានចូលព្រឹកថ្ងៃទី១៣ កញ្ញា ២០២០ គាត់បានជិះម៉ូតូរបស់បងស្រីនៅលើសួនច្បារមាត់ទន្លេ ក្បែរក្រោមស្ពានគីហ្ស៊ុណា ចៃដន្យស្រាប់តែបេតុងកម្រាលលូដ៏ធំបង្ហូរចូលទន្លេបានបាក់ស្រុត សំណាងល្អមិនបណ្ដាលឱ្យគ្រោះថ្នាក់ ដល់អាយុជីវិតនោះទេ ប៉ុន្តែម៉ូតូម៉ាកវ៉េវត្រូវបានស្រូបចូលទៅក្នុងដីលិចបាត់ ។ ក្នុងគ្រានោះមិនមានអ្នកណាម្នាក់នៅក្បែរកន្លែងបាក់ស្រុតរណ្ដៅនេះទេ គឺមានតែគាត់ម្នាក់ប៉ុណ្ណោះ។
បុរសម្ចាស់ម៉ូតូជាអ្នកលក់បបរស មានផ្ទះជួលនៅក្នុងសង្កាត់វាលវង់ ក្រុងកំពង់ចាម បានរៀបរាប់បន្តឲ្យដឹងទៀតថា ដំបូងគាត់ឃើញកម្រាលបេតុងនេះបានបាក់ស្រុត បន្តិចតែក្រោយមកក៏បានបាក់ស្រុតកាន់តែធំឡើង ធ្វើឱ្យម៉ូតូធ្លាក់កប់នៅក្នុងបាតរណ្ដៅលូ ។ លុះមកដល់ព្រឹកថ្ងៃទី១៣ កញ្ញា អាជ្ញាធរបានមកពិនិត្យ និងយាមមិនឱ្យមនុស្សម្នាទៅក្បែរព្រោះខ្លាចគ្រោះថ្នាក់ ។
ក្រោយមកទៀតក្រុមការងារនៃមន្ទីរសាធារណការនិងដឹកជញ្ជូនខេត្តបានបញ្ជូនកម្លាំងចុះមករៀបចំសាងសង់ប្រព័ន្ធលូបង្ហូរទឹកសាជាថ្មីជំនួសនោះចាស់ដែលបានបែកបាក់ ។
លុះមកដល់ព្រឹកថ្ងៃទី១២តុលា២០២០ ក៏បានឃើញម៉ូតូដែលកប់នៅបាតរណ្ដៅនោះត្រូវបានគ្រឿងចក្រជីករកឃើញ តែម៉ូតូនោះត្រូវច្រែះស៊ីប្រើលែងកើតទៅហើយ ។ ដោយមិនអាចយក មកកែច្នៃដើម្បីជិះវិញបាននោះទេ គឺមានតែលក់ឲ្យអេតចាយតែប៉ុណ្ណោះ ។ ដោយសារតែកត្តាជីវភាពរបស់គាត់មិនធូរធានោះទេហើយម៉ូតូដែលគាត់ជិះនេះ គឺជាម៉ូតូរបស់បងស្រីដែលឲ្យជិះគ្រាន់នឹងទៅផ្សារ ទិញបន្លែនិងម្ហូបមកសម្រាប់ធ្វើលក់នៅជិតគល់ស្ពានគីហ្ស៊ុណា ដើម្បីដោះស្រាយជីវភាពគ្រួសារ គាត់បានសុំការពីឯកឧត្តម អ៊ុន ចាន់ដា អភិបាលខេត្ត សូមជួយឧបត្ថម្ភថវិកាខ្លះ ដើម្បីឱ្យគាត់មានលទ្ធភាពទិញម៉ូតូមួយគ្រឿង ក្នុងតម្លៃថោកល្មមសម្រាប់ធ្វើជាមធ្យោបាយជិះទៅផ្សារទិញរបស់របរគ្រាន់ហ្នឹងមកលក់ដូរ ។
លោក សុខ ស្រ៊ុន ប្រធានមន្ទីរសាធារណការនិងដឹកជញ្ជូនខេត្តមានប្រសាសន៍ឲ្យដឹងថា ប្រព័ន្ធលូធំសម្រាប់បង្ហូរទឹកសម្អុយ ចេញពីតាមបណ្ដាលូជាច្រើនខ្សែ ដោយបានហូរកាត់លូនេះចូលទៅក្នុងទន្លេមេគង្គ ។ ចំពោះមូលហេតុដែលបណ្ដាលឲ្យបាក់ស្រុតបេតុង និងមានរណ្ដៅធំទំហំ៧ម៉ែត្របួនជ្រុង និងជម្រៅ៦ម៉ែត្រ ដោយសារតែបាក់លូចាស់ ដែលមានសភាពទ្រុឌទ្រោម កសាងឡើងតាំងពីសម័យបារាំង ។
លោកប្រធានមន្ទីរសាធារណការខេត្តមានប្រសាសន៍បន្តថា ក្នុងពេលដែលឯកឧត្តមអ៊ុន ចាន់ដាអភិបាលខេត្ត អញ្ជើញចុះពិនិត្យដោយផ្ទាល់នាព្រឹកថ្ងៃទី១៤ កញ្ញា បានណែនាំដល់ស្ថាប័នមន្ទីរសាធារណការខេត្ត ឲ្យបញ្ជូនក្រុមបច្ចេកទេសមកសិក្សាជាបន្ទាន់ និងត្រៀមសាងសង់ប្រព័ន្ធលូស្តង់ដាថ្មីដែលមានមុខកាត់៨តឹកចំនួន៣ខ្សែ មានលក្ខណៈធំទូលាយជាងលូចាស់ ហើយបណ្ដោយប្រវែង៨០ម៉ែត្រ ដើម្បីសម្រួលក្នុងការបង្ហូរទឹកសម្អុយចេញពីក្នុងក្រុង ចូលទៅទន្លេមេគង្គ ។ ចាប់ផ្ដើមបើកការដ្ឋានសាងសង់ប្រព័ន្ធលូតាមលក្ខណៈបច្ចេកទេសថ្មីដោយធ្វើយ៉ាងណាឱ្យមានគុណភាព និងប្រើប្រាស់បានយូរអង្វែងតទៅមុខទៀត ៕
ចែករំលែកព័តមាននេះ