រាជធានីភ្នំពេញ ៖ ពលរដ្ឋនៅរាជធានីភ្នំពេញបានកំពុងជួបបញ្ហាសំរាមគរនៅពាសវាលពាសកាល គ្មានអ្នកប្រមូលរយៈពេលជាច្រើនថ្ងៃមកហើយ ដោយសារបុគ្គលិកក្រុមហ៊ុនស៊ិនទ្រី បាននាំគ្នាធ្វើកូដកម្មទាមទារសំណងមួយចំនួនជាអត្ថប្រយោន៍ការងារ ដែលពួកគាត់បានធ្វើការឲ្យក្រុមហ៊ុននេះ ១០ ឬ២០ឆ្នាំមកហើយនោះ ។…
រាជធានីភ្នំពេញ ៖ ពលរដ្ឋនៅរាជធានីភ្នំពេញបានកំពុងជួបបញ្ហាសំរាមគរនៅពាសវាលពាសកាល គ្មានអ្នកប្រមូលរយៈពេលជាច្រើនថ្ងៃមកហើយ ដោយសារបុគ្គលិកក្រុមហ៊ុនស៊ិនទ្រី បាននាំគ្នាធ្វើកូដកម្មទាមទារសំណងមួយចំនួនជាអត្ថប្រយោន៍ការងារ ដែលពួកគាត់បានធ្វើការឲ្យក្រុមហ៊ុននេះ ១០ ឬ២០ឆ្នាំមកហើយនោះ ។
កម្មករប្រមូលសំរាមមួយចំនួនបានចែករំលែកពីបទពិសោធន៍ការងាររបស់ពួកគាត់ឲ្យពលរដ្ឋបានដឹងនៅពេលនេះ ។ អ្នកប្រមូលសំរាម បានត្អូញត្អែរការងារប្រមូលសំរាមជាប្រភេទការងារដែលមានហានិភ័យខ្ពស់មានគ្រោះថ្នាក់ច្រើនប៉ះពាល់សុខភាព ដោយសារកាកសំណល់ដែលពួកគាត់ប្រមូលមានចម្រុះ និងមានក្លិនស្អុយមានមេរោគ ។ បើតាមអ្នកស្រី ស្រីមុំ ជាបុគ្គលិកស៊ិន ទ្រី ខាងបោសសំរាមតាមផ្លូវដែលមានវ័យជាង៥០ឆ្នាំ ។អ្នកស្រីបានធ្វើការប្រមូលសំរាមរយៈពេលជាង២០ឆ្នាំមកហើយ ។ ពេលចូលធ្វើការដំបូង គាត់ទទួលបានប្រាក់ខែតែ៣ ម៉ឺនរៀលប៉ុណ្ណោះ ក្នុងមួយខែ ។ បច្ចុប្បន្នអ្នកស្រី ទទួលបានប្រាក់បៀរវត្ស៥៩ម៉ឺនរៀងក្នុងមួយខែ ដែលជិតជាប្រាក់ដុល្លារជិត១៥០ដុល្លារ ។ ពាក់អាវយឺតរបស់ក្រុមហ៊ុនស៊ិនទ្រី ស្លៀកខោខ្មៅជើងវែង ស្ត្រីដែលមានសប្បុលស្រអែម បានរៀបរាប់ពី ហានិភ័យការងារដែលគាត់ប្រឈមនាពេលកន្លងមកថា គាត់ត្រូវក្រោកមកធ្វើការតាំងពីម៉ោង៤ទៀបភ្លឺ ។ «ខ្ញុំក្រោកពីផ្ទះមកធ្វើការងារទាំងសភាពស្ងាត់ ។ មនុស្សជាទូទៅគេនៅគេងនៅឡើយទេ។ ពេលធ្វើការ ខ្ញុំប្រឈមគ្រោះថ្នាក់ណាស់ ពីព្រោះអ្នកធ្វើដំណើរនៅពេលទៀបភ្លឺនោះ បើកបរលឿនៗណាស់ ។ មិនគោរពភ្លើងស្តុបឡើយ ។ យើងអាចត្រូវគេបុកបើមិនប្រយ័ត្ន» ។
ជាទម្លាប់ អ្នកស្រី ស្រីមុំ ធ្វើការពីម៉ោង៤ទាបភ្លឺ ដល់ម៉ោង៩ព្រឹក នៅពេលព្រឹកចំណែកពេលរសៀលគាត់ចូលធ្វើការពីម៉ោង១២ថ្ងៃត្រង់ដល់ម៉ោ៣រសៀល ។ «ខ្ញុំធ្វើការរាល់ថ្ងៃមិនពិបាកប៉ុន្មានទេ តែអ្វីដែលព្រួបារម្ភនោះ គឺខ្លាចគ្រោះថ្នាក់ចរាចរណ៍ ។ គេបើកមកបុកយើង ។ ខ្ញុំធ្លាប់ម៉ូតូបុកបាក់ជើងម្តង។ អ្នកធ្វើការផ្នែកបោកសំរាមតាមផ្លូវខ្លះទៀតក៍ជួបមានគ្រោះថ្នាក់ដូចខ្ញុំដែរ ព្រោះពួកយើងត្រូវក្រោកមកធ្វើការពីព្រលឹមៗ ដែលអ្នកធ្វើដំណើរ គេបើកបរលឿនៗ ហើយមានអ្នកខ្លះនៅស្រវឹងផង »។
អ្នកស្រី ស្រីមុំ ថាគាត់បានធ្វើការជាមួយក្រុមហ៊ុនស៊ិនទ្រី បានជាង១០ឆ្នាំហើយ ។ ប្រាក់ខែ ត្រូវបានដំឡើងជាបន្តបន្ទាប់ ម្តង៥ម៉ឺន ម្តង១០ម៉ឺន ទំរាំបានជិត១៥០ដុល្លារដូចពេលនេះប្រើពេលច្រើនឆ្នាំ ។ «ពេលខ្ញុំធ្វើការដំបូងៗ ខ្ញុំបានប្រាក់ខែតែ៣ម៉ឺនរៀលទេ ។ បន្ទាប់មកឡើងជាង៨ម៉ឺនរៀល ហើយឡើងជាង១០ម៉ឺនរៀល មកដល់បច្ចុប្បន្ននេះបាន៥៩ម៉ឺនរៀល ។ តែបើយើង ធ្វើការនៅថ្ងៃ បុណ្យថ្ងៃឈប់នឹងយើងបានច្រើនជាងនេះបន្តិច ដោយសារក្រុមហ៊ុនបន្ថែមប្រាក់ឲ្យ» ។
ចំណែកលោក ឈឿង ណុប កម្មករប្រមូលសំរាមដាក់ក្នុងឡានវិញថា ការងារគាត់កាន់តែប្រឈមគ្រោះថ្នាក់ជាងអ្នកប្រមូលសំរាមឆ្ងាយណាស់ ។ គ្រោះថ្នាក់របស់អ្នកលើកសំរាម ដាក់ឡាន គឺត្រូវប៉ះពាល់នឹងសំរាមឬស្បោងសំរាមដោយផ្ទាល់ដៃ ។ ជាទូទៅសំរាមដែលពលរដ្ឋបោះចោលជាកាកសំណល់រឹង និងរាវគ្រប់ប្រភេទ មានសំណល់ផ្ទះបាយរបស់របរផ្សេងៗ មានខោទឹកនោម ខោលាមក របស់ទារក និងមនុស្ស ហើយក៏មានដែលខ្មោចឆ្កែ ខ្មោឆ្មា ជាដើមនោះ ។
លោកណុប បានកត់សម្គាល់ថា សំរាមខ្លះពលរដ្ឋមិនបានទុកដាក់វេចខ្ចប់ កាកសំណល់របស់ខ្លួន ឲ្យបានត្រឹមត្រូវនោះឡើយ ។ «ទោះវាជាប្រភេទសំរាមអ្វីក៏ដោយខ្ញុំកាន់វាដោយពេញៗដៃ ។ វាមានក្លិនមិនល្អ ពីដំបូងៗខ្ញុំចង់ក្អួតតែយូរទៅបានស៊ាំទៅហើយ «លោក ឈឿង ណុប បាននិយាយទាំងទឹកមុខស្ងួត ។ លោកបន្ថែមថា ជាទម្លាប់លោកចេញប្រមូលសំរាមពេលម៉ោងជិតភ្លឺ ហើយពេលខ្លះពេលកណ្តាលយប់តាម វេន ឈ្លាស់គ្នា ។ លោក ឈឿង ណុប មានកូន៥នាក់ក្នុងបន្ទុក ។ លោកធ្វើការដំបូងបានប្រាក់ខែ២៥ម៉ឺនរៀល ១០ឆ្នាំក្រោយមកនៅពេលនេះលោកទទួលបានប្រាក់ខែ៦០ម៉ឺនរៀល ស្មើ១៥០ដុល្លារក្នុងមួយខែ ។
អ្នកប្រមូលសំរាមរូបនេះ បានឲ្យដឹងបន្ថែមថា ក្រៅពីប្រឈមក្លិនស្អុយ ដែលសំរាមអាចជាប្រភពមេរោគផងនោះ ពេលខ្លះអាចមានគ្រោះថ្នាក់ដោយសារអំបែងដប ដែក ដែលនៅក្នុងសំរាមទៀតផង ។ «យើងប្រើដៃទៅប្រមូល កើបសំរាម ពេលខ្លះបានមុត នឹងអំបែងដប ទៀត» និយាយដល់ចំនុចនេះ លោក ឈឿង ណុបបានបង្ហាញដៃរបស់គាត់ ហើយបាននិយាយថា “មុតដល់ថ្នាក់សោះសាច់ហើយ» ។ ពលរដ្ឋនៅរាជធានីភ្នំពេញបានបោះចោលសំរាម រាវ រឹង ក្នុងមួយថ្ងៃប្រមាណ៣ពាន់តោន ។
បុគ្គលិកក្រុមហ៊ុនស៊ិនទ្រី បានធ្វើកូដកម្មតាំងពីថ្ងៃទី២ តុលាមក ដើម្បីទាមទារអត្ថប្រយោជន៍ការងារ ដោយពួកគាត់បារម្ភថា នៅពេលរាជធានីភ្នំពេញធ្វើការផ្លាស់ប្តូរប្រព័ន្ធប្រមូលសំរាមថ្មី ដែលអាចមានក្រុមហ៊ុនលើសពី១ នៅចុងខែតុលានេះ ធ្វើឲ្យពួកគាត់បង់ប្រាក់អត្ថប្រយោជន៍នានា ពិសេសប្រាក់អតីតភាពកាងារនោះ ។
ការមិនចេញប្រមូលសំរាមរបស់បុគ្គលិកស៊ិនទ្រី បានធ្វើឲ្យទីក្រុងភ្នំពេញពោលពេញដោយសំរាម មានក្លិនស្អុយ រុយរោម សឹងគ្រប់ទិសទៅ ។ មានពលរដ្ឋខ្លះ នៅពេលសំរាមនៅផ្ទះរបស់ខ្លួនធុំក្លឹនស្អុយ នៅពេលឃើញទីសាធារណមានសុទ្ធតែសំរាម ក៍បានឹកឃើញដល់អ្នកប្រមូលសំរាម ដែលមួយថ្ងៃៗ ពួកគាត់នៅជាមួយកាកសំណល់ដែលគេបោះចោលនោះ៕
ចែករំលែកព័តមាននេះ