រាជធានីភ្នំពេញ ៖ ទឹកស្ទឹងព្រែកត្នោតក្នុងភូមិសាស្ត្រខណ្ឌដង្កោ រាជធានីភ្នំពេញ បានកើនឡើងកាន់តែខ្លាំងគួរឲ្យបារម្ភ ដែលតាមរបាយការណ៍នគរបាលខណ្ឌដង្កោបញ្ជាក់ថា គិតមកត្រឹមថ្ងៃទី១២ ខែតុលា ឆ្នាំ២០២០ ទឹកបានឡើង៣តឹកកន្លះថែមទៀត…
រាជធានីភ្នំពេញ ៖ ទឹកស្ទឹងព្រែកត្នោតក្នុងភូមិសាស្ត្រខណ្ឌដង្កោ រាជធានីភ្នំពេញ បានកើនឡើងកាន់តែខ្លាំងគួរឲ្យបារម្ភ ដែលតាមរបាយការណ៍នគរបាលខណ្ឌដង្កោបញ្ជាក់ថា គិតមកត្រឹមថ្ងៃទី១២ ខែតុលា ឆ្នាំ២០២០ ទឹកបានឡើង៣តឹកកន្លះថែមទៀត បណ្ដាលឲ្យជំនន់លិចភូមិឋាននានានៅប្របមាត់ស្ទឹងកើនឡើងចំនួន៨សង្កាត់ទៅហើយ ។ មិនតែប៉ុណ្ណោះ កម្ពស់ទឹកស្ទឹងខាងលើនៅខ្វះតែ៣តឹកទៀតប៉ុណ្ណោះ និងដល់កម្រិតត្រូវប្រកាសអាសន្នហើយ ចំណែកឯនៅស្ថាននីយ៍ទំនប់ទឹក៧មករា ទឹកមានកម្ពស់៥,៦០ម៉ែត្រ ហើយនៅខ្វះតែ៥តឹកទៀតប៉ុណ្ណោះនិងត្រូវប្រកាសអាសន្នដែរ។ គួររំលឹកថា គិតត្រឹមរសៀលនេះ! ស្ថានភាពទឹកស្ទឹងព្រែកត្នោតនៅតែបន្តឡើង
តាមប្រភពដដែលបានបន្តទៀតថា សង្កាត់ទាំង៨ដែលត្រូវទឹកជន់លិចនោះស្មើនឹងចំនួន១៧ភូមិ ដែលមានផ្ទះចំនួន២៧០ខ្នង ព្រមទាំងប៉ះពាល់ប្រជាពលរដ្ឋចំនួន៨៩២នាក់ ក្នុងនោះរួមមាន ១-សង្កាត់សាក់សំពៅ ជន់លិចចំនួន៦ភូមិ មានផ្ទះចំនួន៤២ខ្នង មនុស្ស១៦០នាក់ ២-សង្កាត់គងនយជន់លិចចំនួន២ភូមិមានផ្ទះចំនួន៩២ខ្នងមនុស្សចំនួន៤២៧នាក់ ៣-សង្កាត់ព្រៃសជន់លិច១ភូមិមានចំនួន៣៥ខ្នងមនុស្សចំនួន១២៩នាក់ ៤-សង្កាត់ដង្កោជន់លិច១ភូមិមានផ្ទះចំនួន២១ខ្នងមនុស្ស៥ចំនួន០នាក់។
៥-សង្កាត់ទៀនជន់លិចភូមិមានផ្ទះចំនួន២៣ខ្នង មនុស្សចំនួន៩១នាក់ ៦-សង្កាត់ស្ពានថ្មជន់លិចចំនួន៤ភូមិមានផ្ទះចំនួន២៦ខ្នង ៧-សង្កាត់ព្រៃវែង ជនលិច១ភូមិមានផ្ទះចំនួន២១ខ្នង ៨-សង្កាត់ជើងឯក ជន់លិច១ភូមិមានផ្ទះចំនួន១០ខ្នងនិងមនុស្សចំនួន៣៥នាក់ ។
តាមប្រភពខាងលើបានឲ្យដឹងបន្តទៀតថា ក្រៅពីភូមិឋាននិងផ្ទះសម្បែងខាងលើ នៅមានសាលាបឋមសិក្សាវត្ដហា,ប៉ុស្ដិ៍នគរបាលរដ្ឋបាលគងនយ និងសាលាសង្កាត់គងនយ រួមជាមួយផ្លូវថ្នល់មួយចំនួនទៀតផង ក៏ត្រូវបានទឹកជន់លិចផងដែរ ប៉ុន្តែទោះជាបែបណានៅក្នុងគ្រោះធម្មជាតិនេះមិនបានបណ្ដាលឲ្យមានមនុស្សណាម្នាក់ស្លាប់នោះឡើយ។
ទន្ទឹមនឹងនេះ កម្លាំងនគរបាលនៃអធិការដ្ឋានខណ្ឌដង្កោរួមជាមួយអាជ្ញាធរខណ្ឌនិងសង្កាត់បានតាមដានពីស្ថានភាពទឹកស្ទឹងជាប់ជានិច្ច ហើយក៏បានត្រៀមដើម្បីជួយសង្គ្រោះ ប្រជាពលរដ្ឋក្នុងករណីមានហេតុការណ៍ធ្ងន់ធ្ងរណាមួយកើតឡើង។
ដោយឡែកប្រជាពលរដ្ឋបានឲ្យដឹងថា ពេលនេះទឹកនៅតែបន្តកើនឡើង ដែលបានហូរជន់លិចចូលផ្ទះអ្នកស្រុកជាបន្តបន្ទាប់ ប៉ុន្តែនៅកន្លែងដែលស្ថិតនៅជាប់ផ្ទាល់និងមាត់ស្ទឹងឬវាលទំនាបនោះនិងត្រូវលិចជ្រៅមិនអាចនៅបានទេ តែចំពោះផ្ទះភាគច្រើនទៀតស្ថិតនៅឆ្ងាយបន្តិចពីមាត់ស្ទឹងនោះត្រូវទឹកលិចរាក់អាចនៅលើគ្រែឬលើផ្ទះបានមិនទាន់ដល់កម្រិតត្រូវចាកចេញនោះទេ ប៉ុន្តែត្រូវមានការប្រុងប្រយ័ត្នជាប់ជានិច្ចគ្មានការធ្វេសប្រហែសឡើយ។
ទន្ទឹមនឹងនេះ ពួកគាត់មានការព្រួយបារម្ភនិងសំណូមបរសូមឲ្យអាជ្ញាធរខណ្ឌដង្កោជួយពិនិត្យមើលនូវស្ថានភាពវត្តសាក់សំពៅផង ព្រោះនៅព្រឹកថ្ងៃទី១២ ខែតុលានេះទឹកបានឡើងលិចផ្លូវជិតខ្លោងទ្វារមុខវត្តនេះ១ចំហៀងផ្លូវទៅហើយ ។ មិនតែប៉ុណ្ណោះផ្លូវនេះមានរថយន្តធុនធំដឹកដី ថ្ម និងខ្សាច់បើកឆ្លងកាត់ជាប់ហូរហែ ប្រសិនបើគ្មានវិធានការទេនោះទឹកនិងបុកផ្ដាច់ផ្លូវហើយហូរជន់លិចវត្តព្រមទាំងលំនៅឋានដែលស្ថិតនៅជិតនោះមិនខានឡើយ៕ (កែសម្រួលដោយ ៖ ធីតា)
ចែករំលែកព័តមាននេះ