រាជធានីភ្នំពេញ ៖ តាមសេចក្តីរាយការណ៍បឋមនាព្រឹកថ្ងៃទី១២ តុលា ឆ្នាំ២០២០ នេះបានឱ្យដឹងថា នៅផ្លូវជាតិលេខ៤ ត្រង់ចំណុចមុខសាលាក្តីខ្មែរក្រហម ស្ថិតក្នុងភូមិអង្គ សង្កាត់ចោមចៅទី៣…
រាជធានីភ្នំពេញ ៖ តាមសេចក្តីរាយការណ៍បឋមនាព្រឹកថ្ងៃទី១២ តុលា ឆ្នាំ២០២០ នេះបានឱ្យដឹងថា នៅផ្លូវជាតិលេខ៤ ត្រង់ចំណុចមុខសាលាក្តីខ្មែរក្រហម ស្ថិតក្នុងភូមិអង្គ សង្កាត់ចោមចៅទី៣ ខណ្ឌពោធិសែនជ័យ គេសង្កេតឃើញថា មានការជន់លិចប្រមាណជាកន្លះខែមកហើយ មិនទាន់ស្រកនៅឡើយទេ ខណៈមានភ្លៀងធ្លាក់កាលពីថ្ងៃទី១១ តុលា ឆ្នាំ២០២០ ធ្វើឱ្យចំណុចខាងលើនេះមានការជន់លិចកាន់តែខ្លាំង ។
តាមសេចក្តីការណ៍បានបន្តថា ទឹកភ្លៀងបានជន់លិចតាមផ្លូវជាតិលេខ៤ មានចម្ងាយប្រមាណជាង២គីឡូម៉ែត្រ គឺលិចចាប់ពីម្តុំមុខផ្សារកំបូល សង្កាត់កំបូល ខណ្ឌកំបូល រហូតដល់ភូមិកន្ទោកជើង សង្កាត់កន្ទោក ខណ្ឌកំបូល ដោយគេសង្កេតឃើញថា ការជន់លិចនៅចំណុចទាំងនេះមើលទៅដូចជាទឹកស្ទឹងទៅហើយ ។
តាមសេចក្តីរាយការណ៍បានបន្តទៀតថា ដោយឡែកនៅតាមផ្លូវបេតុងផ្សេងៗ និងតាមភូមិ-សង្កាត់ក្នុងខណ្ឌកំបូល និងខណ្ឌពោធិសែនជ័យ ដែលមិនធ្លាប់មានការជន់លិចពីមុនមក ត្រូវបានទឹកជន់លិចស្ទើរគ្រប់ទីកន្លែង បន្ទាប់ពីមានភ្លៀងធ្លាក់កាលពីវេលាម៉ោងជាង២រសៀលរហូតដល់យប់ថ្ងៃទី១១ តុលា កន្លងមកនេះ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ