ខេត្តបាត់ដំបង ៖ កម្លាំងយោធភូមិទី៥ជួរមុខបាននិងកំពុងប្រឹងប្រែងយ៉ាងខ្លាំង ដើម្បីជួយចម្លងពលរដ្ឋខ្មែររាប់សិបនាក់ ដែលឆ្លងដែនទៅធ្វើការ ដោយខុសច្បាប់ក្នុងទឹកដីប្រទេសថៃ ហើយឆ្លងអូរព្រំដែនមិនរួច ពេលវិលត្រប់ចូលមកកាន់ប្រទេសកំណើតវិញ នៅព្រឹកថ្ងៃទី១១ តុលានេះ តាមច្រករបៀងមួយកន្លែង ត្រង់ចំណុចភូមិគីឡូ១៣ ឃុំសន្តិភាព ស្រុកសំពៅលូន។
នេះបើតាមការផ្ដល់ព័ត៌មានបឋមពីមន្ត្រីយោធភូមិភាគទី៥ ដែលកំពុងធ្វើការជួយសង្គ្រោះពលរដ្ឋខ្មែរទាំងនោះ។ មន្ត្រីយោធាបានរាយការណ៍បានឲ្យដឹងថា កិច្ចប្រតិបត្តិការជួយសង្គ្រោះនោះ ដឹកនាំដោយលោកឧត្តមសេនីយ៍ទោ ច័ន្ទ រដ្ឋា មេបញ្ជាការរងយោធភូមិភាគទី៥ ទទូលបន្ទុកការងារព្រំដែន។
បើតាមប្រភពដដែលបានប្រាប់ថា ពលករខ្មែរមានប្រុស មានស្រីទាំងនោះ មានរាប់សិបនាក់ដែលបានលួចឆ្លងដែនទៅធ្វើការនៅទឹកថៃ ដោយគ្មានច្បាប់ លុះដល់ថ្ងៃវិលត្រឡប់មកស្រុកវិញ ក៏ជួបនឹងជំនន់ទឹកភ្លៀងដែលកំពុងហក់ឡើងខ្លាំងតាមអូរព្រំដែន ទើបមិនអាចឆ្លងរួចជាប់គាំងនៅត្រើយម្ខាង នៃទឹកដីថៃ ហើយត្រូវបានកម្លាំងយោធភូមិភាគទី៥ ជួរមុខរកវិធីជួយសង្គ្រោះបានដោយសុវត្តិភាពជាបន្តបន្ទាប់។
គិតត្រឹមវេលាម៉ោង៣រសៀលថ្ងៃដដែលនេះ បើតាមមន្ត្រីផ្នែកព័ត៌មាន នៃយោធភូមិភាគទី៥ បានឲ្យដឹងថា កម្លាំងយោធា បានជួយចម្លងពលករខ្មែរដែលជាប់គាំងទាំងនោះ បានចំនួន២០នាក់ហើយ តែនៅរាប់សិបនាក់ទៀត មិនទាន់អាចឆ្លងរួច ព្រោះទឹកអូរព្រំដែនកំពុងជោជន់ខ្លាំងនៅឡើយ។ ប៉ុន្តែមន្ត្រីដដែលបានបញ្ជាក់ថា ពលករខ្មែរដែលនៅសេសសល់ជាប់គាំងនៅត្រើយម្ខាង នៃទឹកដីថៃ ពេលនេះលោកឧត្តមសេនីយ៏ទៅ ច័ន្ទ រដ្ឋា កំពុងទំនាក់ទំនងទៅខាងសមត្ថកិច្ចថៃ ដើម្បីសុំជួយសម្រូលឲ្យពលករខ្មែរឆ្លងដែនខុសច្បាប់ទាំងនោះ ចេញតាមច្រកអន្តរជាតិ « ភ្នំដី» ស្រុកសំលូនវិញ។
ពាក់ព័ន្ធនឹងពលករខ្មែរឆ្លងដែនខុសច្បាប់ កំពុងជាប់គាំងនៅទឹកដីថៃ ដោយសារជំនន់ទឹកភ្លៀងតាមអូរព្រំដែនខាងលើនេះ បើតាមប្រភពព័ត៏មានថា ក្រុមពលរដ្ឋខ្មែរទាំងនោះ បានលួចឆ្លងដែនចេញទៅធ្វើការនៅទឹកដីថៃ តាមច្រករបៀងនានា តាំងពីអំឡុងមិនទាន់មានទឹកជំនន់តាមអូរព្រំដែន ដោយមានការឃុំឃិតពីមន្ត្រីការពារព្រំដែន ប្រចាំតាមច្រករបៀងទាំងនោះ។
ប៉ុន្តែពេលពលរដ្ឋខ្មែរទាំងនោះត្រឡប់មកប្រទេសកំណើតវិញ តាមច្រករបៀងដដែលនេះ ឆ្លងអូរព្រំដែនមិនរួច ស្រាប់តែបាត់មុខមន្ត្រីការពារច្រករបៀងទាំងនោះអស់ បែរជាលេចមុខកម្លាំងយោធភូមិភាគទី៥ ចុះអន្តរាគមន៏ជួយសង្គ្រោះពលរដ្ឋខ្មែរទាំងនោះទៅវិញ ? ប៉ុន្តែយ៉ាងណាក៏ដោយ ពេលនេះកម្លាំងយោធភូមិភាគទី៥ កំពុងព្យាយាមរកវិធីដោះស្រាយជាមួយភាគីថៃ ដើម្បីជួយអន្តរាគមន៏ជួយរំដោះពលរដ្ឋខ្មែរទាំងនោះឲ្យត្រឡប់មកស្រុកវិញ ដោយសុវត្ថិភាព។
ចែករំលែកព័តមាននេះ