ព្រំដែនខេត្តឧត្តរមានជ័យ ៖ មានសេចក្តីរាយការណ៍មកថា ទាហានថៃបានធ្វើសមយុទ្ធដោយចាប់ផ្តើមកាលពីវេលាម៉ោងប្រមាណ៨ព្រឹកថ្ងៃអង្គារ ទី១៥ មីនា នេះ បណ្តាលឱ្យប្រជាពលរដ្ឋខ្មែរដែលរស់នៅក្នុងភូមិជប់គគីរ រហូតដល់ភូមិថ្មដូន ស្ថិតក្នុងឃុំគោកមន ស្រុកបន្ទាយអំពិល មានការភ័យស្លន់ស្លោរត់ចូលត្រង់សេ ខ្លះក្រាបពួននឹងផ្ទាំងថ្ម និងរត់ចុះមកខាងក្រោមភ្នំ ដោយនឹកស្មានថា ជាការប្រយុទ្ធគ្នាជាថ្មីរវាងទាហានកម្ពុជា និងថៃ ។
យោងតាមសេចក្តីរាយការណ៍របស់អ្នកយកព័ត៌មានកោះសន្តិភាពប្រចាំខេត្តឧត្តរមានជ័យ បានបញ្ជាក់ឱ្យដឹងថា ការធ្វើសមយុទ្ធរបស់ទាហានថៃនាពេលនេះ ភាគីថៃមិនបានជូនដំណឹងដល់អាជ្ញាធរខ្មែរនោះទេដោយគេធ្វើនៅក្នុងទឹកដីរបស់គេ ចម្ងាយប្រមាណ៦០០ម៉ែត្រ ពីខ្សែបន្ទាត់ព្រំដែន ។ នៅពេលទាក់ទងតាមទូរស័ព្ទដើម្បីសុំសេចក្តីអត្ថាធិប្បាយពីបញ្ហាការធ្វើសមយុទ្ធរបស់ទាហានថៃដោយមិនបានជូនព័ត៌មានដល់អាជ្ញាធរខ្មែរនាពេលនោះ លោកហុង ចំរើន អធិការស្រុកបន្ទាយអំពិលបានប្រាប់កោះសន្តិភាពថា លោកមិនទាន់បានទទួលព័ត៌មាននេះនៅឡើយទេ ដោយបង្វែរសំណួរឱ្យទៅសួរខាងវរៈព្រំដែនវិញ ។
ដោយឡែកលោកឧត្តមសេនីយ៍នាក់ វង្ស មេបញ្ជាការប្រចាំទិសប្រាសាទតាមាន់ បានមានប្រសាសន៍ថា ពិតជាមានការធ្វើសមយុទ្ធរបស់ទាហានថៃនោះមែន ប៉ុន្តែការធ្វើសមយុទ្ធនោះមិនបានធ្វើនៅតំបន់ជិតប្រាសាទតាមាន់នោះ
ទេ ។ ទោះជាយ៉ាងណា បើតាមសេចក្តីរាយការណ៍បានបញ្ជាក់ឱ្យដឹងដែរថា សមយុទ្ធរបស់ទាហានថៃនេះបានស្ងប់ស្ងាត់វិញហើយ នៅវេលាម៉ោងប្រមាណ៩ព្រឹកថ្ងៃអង្គារនេះ ៕
ចែករំលែកព័តមាននេះ