ខេត្តព្រះសីហនុ ៖ ថ្មីៗនេះមានការចែកចាយនូវវីដេអូឃ្លីបមួយដែលអតិថិជនមួយរូបបានទិញក្តាមញីទាំងអស់ ហើយយកទៅស្រុះ ដឹងអីស្រាប់តែក្តាមញីប្រែកាយក្លាយទៅជាក្តាមឈ្មោល រហូតម្ចាស់ក្តាមខឹងចិត្តពេកមកតវ៉ាឈ្លោះគ្នាផ្អើលផ្សារលើ នៅខេត្តព្រះសីហនុ ។
ក្រោយការភ្ញាក់ផ្អើល និងមានការចែកចាយចង់ផ្ទុះបណ្តាញសង្គមដោយអ្នកខ្លះថា អ្នកស្ងោរក្តាមបន្លំដាក់ក្តាមអន់ៗឲ្យគេវិញ ពេលនេះស្ត្រីដែលជាអាជីវកររកស៊ីលក់ក្តាមនៅផ្សារលើ ក្រុង-ខេត្តព្រះសីហនុ បានចេញមកបកស្រាយ និងច្រានចោលទាំងឡាយចំពោះការចោទប្រកាន់របស់អតិថិជន ដែលបានចោទគាត់ថា បានលួចប្តូរក្តាមអន់ៗនៅពេលដែលអ្នកទិញទុកឲ្យស្រុះ។
ការចេញមុខមកបកស្រាយនេះ បានកើតមានឡើងក្រោយពីមានបុរសម្នាក់ និងក្រុមគ្រួសារ បានទៅទិញក្តាមនៅផ្សារលើក្រុងព្រះសីហនុ និងបានចោទថា ស្ត្រីអាជីវករលក់ក្តាមលួចប្តូរក្តាម អន់ៗឲ្យគាត់ នៅពេលដែលគាត់បានទុកឲ្យស្រុះ ដោយជាប់ទៅទិញទំនិញផ្សេងទៀត។
វីដេអូឈ្លោះទាស់គ្នាផ្អើលពេញផ្សារលើ ក្រុងព្រះសីហនុនេះ ត្រូវបានគេចែកចាយតាមសង្គមហ្វេសប៊ុកយ៉ាងខ្លាំង កាលពីថ្ងៃទី៩ ខែតុលា ឆ្នាំ២០២០ និងមានការបញ្ចេញមតិយោបល់ផ្សេងៗ ដោយអ្នកខ្លះគាំទ្រអ្នកទិញ និងអ្នកខ្លះទៀតការពារអ្នកលក់។
ក្រោយមានហេតុការណ៍ឈ្លោះទាស់ទែងបែកផ្សែងបែបនេះ និងត្រូវបានគេចែកចាយវីដេអូតាមបណ្តាញសង្គមយ៉ាងផុល ទ្រាំលែងបានអភិបាលខេត្តព្រះសីហនុ លោក គួច ចំរើន បានណែនាំមន្ត្រីភ្លាមៗ សហការជាមួយប្រធានផ្សារ អញ្ជើញស្ត្រីអាជីវករ និងអ្នកដែលជាប់ពាក់ព័ន្ធនៅក្នុងជម្លោះទាំងនោះ មកសួរនាំ និងធ្វើការបកស្រាយឡើងវិញពីដំណើរឿង។
យោងតាមការបកស្រាយបំភ្លឺនៅចំពោះមុខលោក រស់ សុគីម ប្រធានផ្សារក្រុងព្រះសីហនុ ដោយមានកំណត់ហេតុភ្ជាប់ បានឲ្យដឹងថា អតិថិជនដែលទិញក្តាមគាត់នោះ គឺច្រឡំយកថង់ក្តាមផ្សេង មិនមែនជាក្តាមដែលគាត់ទិញនោះឡើយ ហើយរហូតម៉ោង២រសៀលថ្ងៃដដែល ទើបអតិថិជនរូបនោះត្រឡប់មកវិញ ដើម្បីរករឿងតែម្តង ព្រោះនៅនៅព្រឹកថ្ងៃទី៩ តុលា មានភ្ញៀវចំនួន២នាក់បានយកក្តាមមកឱ្យស្ងោរ ហើយបានឈរចាំរហូតស្ងោឆ្អិន បន្ទាប់មកភ្ញៀវនោះបានភ្ញៀវក្តាមនៅតូបរបស់គាត់ដោយដើរទិញទឹកត្រីបន្ថែម ស្របពេលជាមួយគ្នានោះក៏មានភ្ញៀវទៀតបានមកស្ងោក្តាមដូចគ្នា ហើយបានដាក់ ថង់ក្តាមនៅជិតគ្នា នៅពេលពួកគាត់ទាំងមកវិញក៏យកថង់ក្តាមរបស់ភ្ញៀវផ្សេង ហើយបានដើរចេញបាត់ទៅ រហូតនៅរសៀលថ្ងៃដដែលទើបពួកគាត់យកក្តាមមកបោះនៅតូបរបស់គាត់ហើយចោទថា ពួកគាត់រកស៊ីបោកប្រាស់ភ្ញៀវដូចនេះ គាត់សូមបដិសេធថា វាជារឿងមិនពិតដូចការចោទប្រកាន់នោះទេ។
ជុំវិញករណីនេះ បានអោយមានការចាប់អារម្មណ៏យ៉ាងខ្លាំង លើបណ្តាញសង្គមហ្វេសប៊ុក ហើយពុំមាននរណាម្នាក់ អាចវាយតម្លៃថា ភាគីណាត្រឹមត្រូវនោះទេ ព្រោះភាគីម្ខាងៗសុទ្ធតែអះអាងយកត្រូវរៀងៗខ្លួន ប៉ុន្តែឆ្លងកាត់ករណីមួយនេះរួច គឺជាមានរៀនមួយដ៏ល្អសម្រាប់គ្រប់ភាគី ទាំងភាគីម្ចាស់ ឥវ៉ាន់ នឹងភាគីអ្នកទទួលសេវាស្ងោរ ត្រូវពិនិត្យអោយបានច្បាស់ មុននឹងអោយគេបំរើសេវាកម្ម និងយកចេញពីតូបនោះ ។
សូមរម្លឹកថា រឿងរ៉ាវចោទប្រកាន់ថាបន្លំក្តាមល្អរបស់ភ្ញៀវ ហើយឲ្យគេវិញនូវក្តាមអន់ៗនោះ បានបង្កឲ្យមានការភ្ញាក់ផ្អើលខ្លាំងតែម្តង ព្រោះគេឃើញអតិថិជនតវ៉ានឹងអាជីវករស៊ីឈ្នួលស្រុះក្តាមនៅផ្សារលើ (កំពង់សោម) រហូតក្លាយជាជម្លោះតឹងសរសៃ.កដាក់គ្នា សឹងតែក្លាយជាហិង្សាទៅហើយ ។
យ៉ាងណាមិញ បើតាមបងប្រុសម្នាក់ដែលអះអាងថា គាត់ជាជនរងគ្រោះនៃការការលួចបន្លំក្តាមបានប្រាប់ឲ្យដឹងថា គាត់ក៏បានទិញក្តាមញីសុទ្ធល្អៗ៣គីឡូ (ស្មើ ១២ ម៉ឺនរៀល) ពីកន្លែងតូបផ្សេង និងយកមកស្រុះនៅកន្លែងមួយដែលធ្លាប់មកស្រុះរាល់ដង ហើយពេលស្រុះរួចក៏ស្រាប់តែរកឃើញលួចបន្លំដូចៗមុនតែម្តង ដោយក្តាមញីប្តូរទៅជាក្តាមឈ្មោលទាំងអស់ ទើបទ្រាំមិនបានត្រូវតែទារយកក្តាមញីល្អៗរបស់ខ្លួនវិញ ។
តាមរយៈវីដេអូឃ្លីបបង្ហោះ និងចែកចាយពេញហ្វេសប៊ុក បានបង្ហាញឲ្យឃើញថា ពេលមកតវ៉ា អ្នកស្រុះក្តាមបានប្រកែកថា គាត់ (អតិថិជន) យកក្តាមស្រុះរួចផ្សេងច្រឡំដោយខ្លួនឯង ប៉ុន្តែគាត់ក៏បានបញ្ជាក់ទៅវិញថា គាត់យកពីអ្នកស្រុះហុចឲ្យដោយផ្ទាល់ដៃ ច្បាស់ណាស់ កុំចង់មកប្រកែកថាច្រឡំឲ្យសោះ ព្រោះលួចបន្លំច្រើនដងហើយ តែគាត់មិនមាត់។ គាត់ថា « ៣ គីឡូ ទេ វាមិនណាស់ណាទេ ប៉ុន្តែ គាត់ស្អប់អាទង្វើលួចបន្លំហ្នឹង…» ។ ចុងក្រោយ គេក៏បានឃើញថា ម្ចាស់តូបស្រុះក្តាមក៏ព្រមសងលុយទៅបុរសជាម្ចាស់ក្តាមវិញផងដែរ ៕
ចែករំលែកព័តមាននេះ