រាជធានីភ្នំពេញ ៖ បានកត់សម្គាល់ឃើញថា ថ្មីៗនេះ កម្លាំងសមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃបានបើកយុទ្ធនាការកិច្ចប្រតិបត្តិការបង្ក្រាបករណីជួញដូរគ្រឿងញៀនខុសច្បាប់ ជាបន្តបន្ទាប់នៅភូមិសាស្ត្រ រាជធានីភ្នំពេញ ដោយចាប់យកថ្នាំញៀនរាប់គីឡូ និងចាប់ឈ្មួញរកស៊ីគ្រឿងញៀនមានខ្មែរ មានជនបរទេសទៀតផង ។
ជាក់ស្តែងកាលពីវេលាម៉ោង៨និង៤០នាទីយប់ថ្ងៃទី៧ ខែតុលា ឆ្នាំ២០២០ កម្លាំងជំនាញការិយាល័យទី៩ នៃមន្ទីរប្រឆាំងគ្រឿងញៀន ដឹកនាំដោយលោកនាយករង យិន បញ្ញារិទ្ធ ក្រោមការសម្របសម្រួលពីលោក អ៊ុ សុភត្តិ ព្រះរាជអាជ្ញារងអមសាលាដំបូងរាជធានីភ្នំពេញ បានបើកកិច្ចប្រតិបត្តិការបង្ក្រាបករណីជួញដូរគ្រឿងញៀនខុសច្បាប់មួយករណីស្ថិតនៅចំណុចផ្លូវបេតុង ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
លទ្ធផលចាប់ខ្លួន ជនសង្ស័យម្នាក់ឈ្មោះ ឈន មករា ភេទប្រុស អាយុ ៣១ឆ្នាំ មានទីលំនៅ ផ្ទះលេខ ៨៦E ផ្លូវ បេតុង ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ និងម្នាក់ទៀតឈ្មោះ តែម ជីមី ភេទប្រុស អាយុ២៦ឆ្នាំ មានទីលំនៅបន្ទប់ជួលគ្មានលេខ ភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល ។ ជាមួយគ្នានោះសមត្ថកិច្ចធ្វើការដកហូតវត្ថុតាងថ្នាំញៀនប្រភេទម៉េតំហ្វេតាមីន(ICE)ចំនួន១០កញ្ចប់ ស្មើនឹងជិត១គីឡូក្រាម ជញ្ជីងថ្លឹងគ្រឿងញៀន១គ្រឿង ទូរស័ព្ទចំនួន៤គ្រឿង និងសំភារប្រើប្រាស់សម្រាប់វេចខ្ចប់មួយចំនួន ។
ក្រោយឃាត់ខ្លួន សមត្ថកិច្ចបានកសាងសំណុំរឿងបញ្ជូនជនសង្ស័យទាំង២នាក់ និងថ្នាំទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ