រាជធានីភ្នំពេញ៖ បានកត់សម្គាល់ឃើញថា ថ្មីនេះកម្លាំងសមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃបានបើកយុទ្ធនាការ កិច្ចប្រតិបត្តិការ បង្ក្រាបករណីជួញដូរគ្រឿងញៀនខុសច្បាប់ ជាបន្តបន្ទាប់នៅភូមិសាស្ត្រ រាជធានីភ្នំពេញ ដោយចាប់យកថ្នាំញៀនរាប់គីឡូ និងចាប់ឈ្មួញរកស៊ីគ្រឿងញៀនមានខ្មែរ មានជនបរទេសទៀតផង ។
ជាក់ស្តែង នៅវេលាម៉ោង៨ និង៤០នាទីយប់ថ្ងៃទី០៧ ខែតុលា ឆ្នាំ២០២០ កម្លាំងជំនាញការិយាល័យទី៩ នៃមន្ទីរប្រឆាំងគ្រឿងញៀន ដឹកនាំដោយលោកនាយករង យិន បញ្ញារិទ្ធ ក្រោមការសម្របសម្រួលពីលោក អ៊ុំ សុភត្តិ ព្រះរាជអាជ្ញារងអមសាលាដំបូងរាជធានីភ្នំពេញ បានបើកកិច្ចប្រតិបត្តិការបង្ក្រាបករណីជួញដូរគ្រឿងញៀនខុសច្បាប់ មួយករណីស្ថិតនៅចំណុចផ្លូវបេតុង ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
លទ្ធផលចាប់ខ្លួន ជនសង្ស័យម្នាក់ឈ្មោះ ឈន មករា ភេទប្រុស អាយុ ៣១ឆ្នាំ មានទីលំនៅ ផ្ទះលេខ ៨៦E ផ្លូវ បេតុង ភូមិកន្ទោកជើង សង្កាត់កន្ទោក ខណ្ឌ កំបូល រាជធានីភ្នំពេញ និងម្នាក់ឈ្មោះ តែម ជីមី ភេទប្រុស អាយុ ២៦ឆ្នាំ មានទីលំនៅបន្ទប់ជួលគ្មានលេខ ភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល ។ ជាមួយគ្នានោះសមត្តកិច្ចធ្វើការដកហូតវត្ថុតាង ថ្នាំញៀនប្រភេទម៉េតំហ្វេតាមីន(ICE)ចំនួន១០កញ្ចប់ ទម្ងន់សុទ្ធ៩៩៩.៩៥ក្រាម ជញ្ជីងថ្លឹងគ្រឿងញៀនន១គ្រឿង ទូរស័ព្វ០៤គ្រឿង និងសំភារះប្រើប្រាស់វេចខ្ចប់មួយចំនួន ។
ក្រោយឃាត់ខ្លួនសមត្ថកិច្ចបានកសាងសំណុំរឿង បញ្ជូនជនសង្ស័យទាំង២នាក់ និងថ្នាំទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ