ខេត្តកំពង់ឆ្នាំង ៖ ស្ថិតលើផ្លូវជាតិលេខ 5 ត្រង់ចំណុចស្ពានពោ ឃុំសេដ្ឋី ក្នុងខេត្តកំពង់ឆ្នាំងមានការកកស្ទះចរាចរណ៍ ដោយសារតែជំនន់ទឹកភ្លៀងធ្លាក់ខ្លាំងចុះមកពីផ្នែកខាងលើទឹកហូរកាត់លើផ្លូវយ៉ាងខ្លាំង ។ នៅក្នុងស្ថានភាពបែបនេះ មានក្រុមសមត្ថកិច្ចចម្រុះចុះអន្តរាគមន៍និងជួយសម្រួលចរាចរណ៍ ដែលមកដល់ពេលនេះជាងរយៈពេល3ម៉ោងទើបអាចធ្វើដំណើរជាធម្មតាបានវិញ ។
លោក នន ស៊ីណាត អធិការនគរបាលស្រុកកំពង់ត្រឡាច មានប្រសាសន៍តាមទូរស័ព្ទនៅយប់ថ្ងៃទី០៩ តុលា នេះថា ជំនន់ទឹកភ្លៀងបានហូរធ្លាក់មកពីផ្នែកខាងលើជាខ្លាំង បានបណ្តាលឱ្យលិចផ្លូវជាតិលេខ5 ត្រង់ចំណុច ស្ពានពោធិ៍ ឃុំសេដ្ឋី ដែលធ្វើឲ្យរថយន្តមិនអាចចរាចរណ៍បានមានការកកស្ទះចរាចរណ៍ផងដែរ ។
ក្រុមការងាររបស់នគរបាលស្រុកកំពង់ត្រឡាច ស្រុកសាមគ្គីមានជ័យ សហការជាមួយនឹងនគរបាលចរាចរណ៍ខេត្តកំពង់ឆ្នាំង ដោយមានកិច្ចសហការចូលរួមពីក្រុមអង្គការ JICA របស់ជប៉ុន បូករួមទាំងមន្ទីរសាធារណការខេត្តផងនោះ បានធ្វើកំណាយលូរំដោះទឹកជាបន្ទាន់ ដែលគិតមកដល់ពេលនេះជាងរយៈពេលជាង3ម៉ោងហើយ ទើបស្ថាន ភាពបានធូរស្រាល។ លោកអធិការនគរបាលស្រុកកំពង់ត្រឡាចបានបន្តថា បើគ្មានកិច្ចសហប្រតិបត្តិការ តាមគ្រប់បណ្ដាអង្គភាពដូចដែលបានរៀបរាប់ខាងលើនោះទេ គឺពុំអាចធ្វើចរាចរណ៍បានឡើយ។
យ៉ាងនេះក្តី លោក អធិការនគរបាលស្រុកកំពង់ត្រឡាច បានបញ្ជាក់ថារយៈពេលជាងមួយ 3ម៉ោង ដោយសារតែក្រុមអន្តរាគម មានកម្លាំងចំនួនច្រើន បូកផ្សំនិងគ្រឿងចក្រផង បានធ្វើការកាយលូរំដោះទឹកទាន់ពេលវេលាដែលគិតត្រឹមម៉ោង 9 និង 30 នាទីយប់ថ្ងៃទី 9 តុលានេះ ចរាចរណ៍អាចធ្វើដំណើរបានឡើងវិញហើយ ៕
ចែករំលែកព័តមាននេះ