រាជធានីភ្នំពេញ ៖ គួរកត់សម្គាល់ឃើញថា នៅម្តុំរោងចក្រឆ្នាំងតាមបណ្តោយផ្លូវរទេះភ្លើង ស្ថិតក្នុងសង្កាត់ស្រះចក ខណ្ឌដូនពេញ ជាចំណុចក្តៅរបស់ក្រុមជននិយមប្រព្រឹត្តគ្រឿងញៀន ដែលត្រូវបានសមត្ថកិច្ចបង្ក្រាបមិនចេះរីងស្ងួត។
ជាក់ស្តែងកាលពីថ្ងៃទី៦ ខែតុលា ឆ្នាំ២០២០ វេលាម៉ោង៤រសៀ ល កម្លាំងសមត្ថកិច្ចនគរបាលជំនាញការិយាល័យប្រឆាំងគ្រឿងញៀន រាជធានីភ្នំពេញ ដឹកនាំដោយលោកស្នងការរងទទួលផែនគ្រឿងញៀន និងលោកវរៈសេនីយ៍ទោ រ៉ឹម ម៉ិច នាយការិយាល័យ ក្រោមការសម្របសម្រួលតាម រយៈទូរស័ព្ទពីសំណាក់លោក សឿន មុនីរ័ត្ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានឲ្យមន្ត្រីអនុវត្តច្បាប់នៃការិយាល័យប្រឆាំងគ្រឿងញៀន សហការជាមួយប៉ុស្តិ៍នគរបាលរដ្ឋបាលស្រះចក ខណ្ឌដូនពេញ ចុះអនុវត្តវិធានញុះញង់បង្ក្រាបករណីជួញដូរ ប្រើប្រាស់គ្រឿងញៀនដោយខុសច្បាប់ នៅចំណុចសំណង់មិនរៀបរយ ផ្លូវបេតុង(R6) ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។
បើតាមលោកវរៈសេនីយ៍ទោ រ៉ឹម ម៉ិច ឲ្យដឹងថា ជំហានដំបូងសមត្ថកិច្ចបានធ្វើការឃាត់ខ្លួនជនសង្ស័យ២នាក់ ម្នាក់ឈ្មោះ ឆន សុពយ ភេទប្រុស អាយុ៣០ឆ្នាំ មុខរបរ មិនពិតប្រាកដ ដកហូតក្រាមពណ៌សថ្លាសង្ស័យជាគ្រឿងញៀនចំនួន២កញ្ចប់តូច និងម្នាក់ឈ្មោះ សាន្ត ស្រីមុំ ភេទស្រី អាយុ២២ឆ្នាំ មុខរបរ មិនពិតប្រាកដ ដកហូត ក្រាមពណ៌សថ្លាសង្ស័យជាគ្រឿងញៀនចំនួន៥កញ្ចប់តូច បន្ទាប់មកបានបន្ដធ្វើរដ្ឋបាល នៅចំណុចម្តុំរោងចក្រឆ្នាំងតាមបណ្តោយផ្លូវរទេះភ្លើង ឈានដល់ការឃាត់ខ្លួនជនសង្ស័យចំនួន១៤នាក់ ទៀត ក្នុងនោះមានស្ត្រី៣នាក់។
ជាលទ្ធផលឃាត់ខ្លួនជនសង្ស័យសរុប១៦ នាក់ និងចាប់យកវត្ថុតាង ៖ ១-ក្រាមពណ៌សថ្លាសង្ស័យជាគ្រឿងញៀនចំនួន០៧កញ្ចប់ថង់តូច។ ២-ម៉ូតូចំនួន០៣គ្រឿង។ ជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕ ដោយ ៖ ឃឹម ប៊ុនណាក់
ចែករំលែកព័តមាននេះ