ខេត្តកណ្ដាល ៖ បើតាមសេចក្តីរាយការណ៍បឋមបានឲ្យដឹងថា មានបុរសជាជនជាតិវៀត ណាម្នាក់ធ្វើសកម្មភាពថតឃ្លីបវីដេអូមួយ ដោយដៃកាន់ដាវ ហើយប្រើពាក្យសំដីគំរាមកំហែងថា នឹងសម្លាប់ទៅលើបុរសជនជាតិឥណ្ឌូនេស៊ីដែលមានទំនាក់ទំនងស្នេហាជាមួយនារីជនជាតិវៀតណាមម្នាក់ដែលត្រូវជាសង្សាររបស់ខ្លួន ព្រោះតែការប្រច័ណ្ឌ ប៉ុន្តែទីបំផុតបុរសវៀតណាមរូបនេះត្រូវសមត្ថកិច្ចចាប់ខ្លួនបាននៅថ្ងៃទី៨ ខែតុលា ឆ្នាំ២០២០ ដើម្បីកសាងសំណុំរឿងនាំឲ្យទៅដេកក្នុងពន្ធនាគារតែម្តង ។
សេចក្តីរាយការណ៍បន្តថា ជនសង្ស័យខាងលើឈ្មោះ ង្វៀង យ៉ាំងឡឺយ ភេទប្រុស អាយុ២៦ឆ្នាំ ជាជនជាតិវៀតណាម មានទីលំនៅភូមិជ្រៃធំ ឃុំសំពៅពូន ស្រុកកោះធំ ខេត្តកណ្តាល មុខរបរបើកបរម៉ូតូកង់បី ។ ចំណែកជនរងគ្រោះឈ្មោះ FERRY ភេទប្រុស អាយុ២០ឆ្នាំ ជាជនជាតិឥណ្ឌូនេស៊ី ស្នាក់នៅភូមិជ្រៃធំ ឃុំសំពៅពូន ស្រុកកោះធំ ខេត្តកណ្តាល មុខរបរបុគ្គលិកក្រុមហ៊ុនកាស៊ីណូមួយកន្លែង (ផ្នែកអនឡាញ) ។
ប្រភពដដែលបន្តថា បន្ទាប់ពីឃាត់ខ្លួនជនសង្ស័យបានហើយ ក៏បានឆ្លើយសារភាពនៅចំពោះមុខសមត្ថកិច្ចថា កន្លងមក ខ្លួនបានស្រឡាញ់នារីម្នាក់ឈ្មោះ គីម ង៉ុក អាយុ២៩ឆ្នាំ ជាជនជាតិវៀតណាមដូចគ្នា ដែលនាងមានទីលំនៅប្រទេសវៀតណាម ។ ក្រោយមកខ្លួនបានដឹងដំណឹងថា ឈ្មោះ គីម ង៉ុក ជាសង្សារបានមានការទំនាក់ទំនងស្នេហាជាមួយឈ្មោះ FE RRY ជាជនជាតិឥណ្ឌូនេស៊ី ទើបពេលនោះខ្លួនកើតមានចិត្តខឹងប្រច័ណ្ឌក៏ផ្តើមគំនិតថតជាឃ្លីបវីដេអូមួយ ដាក់ចូលក្នុងទូរស័ព្ទដៃដោយដៃកាន់ដាវ ហើយបាននិយាយជាភាសាខ្មែរផង និងជាភាសាវៀតណាមផង គំរាមថា នឹងសម្លាប់ទៅលើជនរងគ្រោះ ។
ចម្លើយសារភាពរបស់ជនសង្ស័យបន្តថា បន្ទាប់ពីថតឃ្លីបវីដេអូហើយ ខ្លួនបានផ្ញើឃ្លីបនោះទៅឲ្យជនរងគ្រោះតាមរយៈឆាតក្នុងហ្វេសប៊ុក ដើម្បីជាសារគំរាមកំហែងឲ្យជនរងគ្រោះដឹងខ្លួន និងឈប់ទាក់ទងសង្សាររបស់ខ្លួន ។
ក្រោយមកជនរងគ្រោះបានឃើញរូបភាពក្នុងវីដេអូនៅព្រឹកថ្ងៃទី២៦ ខែកញ្ញា ឆ្នាំ២០២០ ទើបបានទៅប្តឹងសមត្ថកិច្ចប៉ុស្តិ៍នគរបាលរដ្ឋបាលសំពៅពូន អំពីសកម្មភាពនេះ ដើម្បីឲ្យសមត្ថកិច្ចជួយស្វែងរក និងតាមចាប់ខ្លួនជនសង្ស័យជាមុខសញ្ញាពីបទ.គំរាមកំហែងថា នឹងសម្លាប់នោះ ។
បន្ទាប់ពីទទួលបានពាក្យបណ្តឹងនោះ កម្លាំងនគរបាលប៉ុស្តិ៍ បានធ្វើការស៊ើបអង្កេត និងស្រាវជ្រាវរហូតតាមចាប់ឃាត់ខ្លួនជនសង្ស័យបាននៅថ្ងៃទី៨ ខែតុលា ឆ្នាំ២០២០ និងកំពុងកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ