ខេត្តបន្ទាយមានជ័យ ៖ លោក លី សុវណ្ណារិទ្ធ អភិបាលស្រុកអូរជ្រៅបានប្រាប់នៅរសៀលថ្ងៃទី៧ ខែតុលា ឆ្នាំ២០២០ថា ទឹកជំនន់ដែលធ្លាក់ពីថៃនិងជំនន់ទឹកភ្លៀងបានជន់លិច២ភូមិ រួមមានភូមិប្រាសាទ…
ខេត្តបន្ទាយមានជ័យ ៖ លោក លី សុវណ្ណារិទ្ធ អភិបាលស្រុកអូរជ្រៅបានប្រាប់នៅរសៀលថ្ងៃទី៧ ខែតុលា ឆ្នាំ២០២០ថា ទឹកជំនន់ដែលធ្លាក់ពីថៃនិងជំនន់ទឹកភ្លៀងបានជន់លិច២ភូមិ រួមមានភូមិប្រាសាទ និងភូមិអូរបីជាន់ ឃុំអូរបីជាន់ ស្រុកអូរជ្រៅ បណ្តាលឱ្យរងផលប៉ះពាល់ជាង២០០គ្រួសារ ក្នុងនោះត្រូវបានជម្លៀសរកទីទួលសុវត្ថិភាពចំនួន៩១គ្រួសារ ដែលស្មើនឹងចំនួន៣៤៦នាក់ ក្នុងនោះស្រី១៦៥នាក់។
លោកបានបញ្ជាក់ថា ទឹកជំនន់ជន់លិចចាប់ថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី៧ ខែតុលា ឆ្នាំ២០២០ ហើយស្ថានភាពបានស្រកចុះ២ទៅ៣តឹក ហើយបើគ្មានភ្លៀងធ្លាក់ទេអាចស្រកទៀត បើសិនជាមានភ្លៀងបន្តធ្លាក់អាចលិចលង់ច្រើនបន្ថែមទៀត និងប៉ះពាល់ផ្ទះសំបែង ព្រមទាំងផលដំណាំកសិកម្ម ។ ជាក់ស្តែងកាលពីរសៀលថ្ងៃទី៧ ខែតុលា ឆ្នាំ២០២០នេះ អំណោយសង្គ្រោះបន្ទាន់ត្រូវបានចែកជូនប្រជាពលរដ្ឋចំនួន៩១គ្រួសារដែលជំលៀសនៅទួលសុវត្ថិភាពឃុំអូរបីជាន់ស្រុកអូរជ្រៅ។
លោក ឌៀប ឈួន អភិបាលស្រុកថ្មពួកបានបញ្ជាក់ប្រាប់កាលពីរសៀលថ្ងៃនេះថា ស្រុកថ្មពួកប៉ះពាល់ដោយទឹកជំនន់មានចំនួន២ឃុំ ស្មើ១៥ភូមិ ដែលប៉ះពាល់មានចំនួន៣៨គ្រួសារទឹកលិចសាលារៀន៣កន្លែង និងវត្ត២កន្លែង ខូចខាតផ្លូវប្រវែង៤២០ម៉ែត្រទឹកហូរច្រុះដាច់ផ្លូវ និងដំណាំកសិកម្មដំឡូងមីមានផ្ទៃដី៦៨៧ហិកតា ដំណាំស្រូវមានផ្ទៃដី៧៥ហិកតា។
ដោយឡែកនៅស្រុកស្វាយចេករហូតដល់រសៀលថ្ងៃទី៧ ខែតុលា ឆ្នាំ២០២០នេះ អភិបាលស្រុកលោក លឿង សុភ័ក្តិ ថា នៅមជ្ឈមណ្ឌលអភិវឌ្ឍន៍យោធិនពិការ៣១៧តេជោភ្នំឆ័ត្រដែលលិចរយៈពេលខ្លីត្រូវបានស្រកអស់វិញហើយ នៅឃុំស្លរក្រាម ភូមិក្លែងព័រ និងភូមិទ័ពសៀម មានផ្ទះសំបែងប៉ះពាល់ និងផ្លូវមួយចំនួនកំពុងគម្រាមកំហែងដោយទឹកហូរកាត់ខ្លៈហើយ ។ ស្រុកម៉ាឡៃវិញអភិបាលស្រុកលោក អែម សុខា ថារហូតដល់ពេលពេលនេះទឹកបានស្រកអស់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ