ខេត្តកណ្តាល ៖ អ្នកដំណើរតាមដងផ្លូវជាតិលេខ១ពីរាជធានីភ្នំពេញ ឆ្ពោះទៅទីប្រជុំជនអ្នកលឿង ពិតជាបានឃើញដើមឈើមួយដើមដែលមានទំហំធំជាងគេនៅប្របផ្លូវជាតិចំណុចចន្លោះគីឡូម៉ែត្រលេខ៤៤-៤៥ ស្ថិតក្នុងភូមិព្រែកត្រែង ឃុំសំរោងធំ ស្រុកកៀនស្វាយ ។ ដើមឈើដ៏ធំ១ដើមនេះ គឺជាដើមត្រាងដែលជាពពួកអំបូររុក្ខជាតិជ្រៃមានពួរធ្លាក់រយីករយាកប្រៀប ដូចវល្លិព័ទ្ធខុសប្លែកពីរុក្ខជាតិនានា ។
អ្នកភូមិមួយចំនួននៅក្នុងមូលដ្ឋាននេះ មានជំនឿទៅលើបារមីពូកែស័ក្តិសិទ្ធិរបស់ដើមត្រាងយក្សនេះ ព្រោះដើមឈើដ៏ធំនេះមានអាយុកាលជាង២០០ឆ្នាំមកហើយ ។ ដោយសារតែមានជំនឿអ្នកភូមិតែងតែនាំគ្នានិមន្តព្រះសង្ឃធ្វើបុណ្យឧទ្ទិសកុសល បួងសួងសូមសេចក្តីសុខនៅក្នុងភូមិករទៅតាមទំនៀមទម្លាប់ព្រះពុទ្ធសាសនា១ឆ្នាំម្តង។
អ្នកស្រី ប៉ែន ស្រី អាយុ៥៩ឆ្នាំ ដែលជាម្ចាស់ដីនិងមានទីលំនៅភូមិ ឃុំខាងលើ បានប្រាប់កោះសន្តិភាព ពាក់ព័ន្ធនឹងប្រវត្តិដើមត្រាងដ៏ធំនេះថា តាមរយៈការដឹងតៗគ្នាពីឪពុកគាត់មក ដើមត្រាងនេះដុះដោយខ្លួនឯងគ្មានអ្នកណាដាំទេ ហើយពេលឪពុកគាត់មានអាយុប្រហែល១០ឆ្នាំ គាត់បានឃើញដើមត្រាងនេះមានទំហំធំ ឱបស្ទើរមិនជុំទៅហើយ ។ ឥឡូវឪពុករបស់គាត់ស្លាប់អស់រយៈពេល៤ឆ្នាំហើយ ។ បើគិតមកដល់
ឆ្នាំ២០២០នេះ ឪពុកគាត់មានអាយុ៩២ឆ្នាំ ។
អ្នកស្រីបន្តថា ដើមត្រាងនេះស្ថិតក្រោមការមើលថែទាំរបស់គ្រួសារគាត់តៗគ្នាតាំងពីជីដូនជីតាមក គឺមានដើមនិងស្លឹកលូតលាស់ស្រស់បំព្រងល្អណាស់ ។ គាត់ថាបើគិតរហូតមកដល់សព្វថ្ងៃ ដើមត្រាងមួយដើមនេះមានទំហំធំ កម្ពស់ប្រហែលជាង៥០ម៉ែត្រ ត្រជាក់ត្រឈឹងត្រឈៃ។ ផ្នែកគល់ខាងក្រោមវិញ មនុស្សជាង១០នាក់ក៏ឱបមិនជុំដែរ និងមានអាយុកាលប្រហែលជាង២០០ឆ្នាំមកហើយ ។ ប៉ុន្តែបច្ចុប្បន្នដើមត្រាងនេះមិនសូវលូតលាស់ល្អដូចពីមុនទេ តែហាក់ដូចជារីកចេញទៅខាងកាន់តែធំនិងសាខាឡើង ។
ការមិនសូវលូតលាស់នេះ ត្រូវបានអ្នកស្រីនិយាយថា ដោយសារកន្លងមកមានរន្ទះបាញ់ម្តងបណ្តាលឱ្យងាប់ចុងមែក ។ អ្នកស្រីបញ្ជាក់ថា តាំងពីដើមមក លោកតា(បារមី)ថែរក្សាដើមត្រាងនេះមានបារមីពូកែស័ក្តិសិទ្ធិណាស់ ។ ពេលបងប្អូនអ្នកភូមិមានធុរៈ ក្រុមគ្រួសារមានជំងឺឈឺថ្កាត់ ឬបាត់សត្វគោក្របី តែងនាំគ្នាមកអុជធូបបែបន់បានជាសះស្បើយ និងរកសត្វពាហនៈឃើញតាមបំណងប្រាថ្នាពិតប្រាកដមែន ។
ដោយសារតែមានជំនឿលើបារមីរបស់លោកតាដើមត្រាងបែបនេះហើយ ទើបបងប្អូនអ្នកភូមិសហការមូលមតិគ្នាសង់អាស្រមសម្រាប់ជាកន្លែងគោរពបូជា និមន្តព្រះសង្ឃសូត្រមន្តបង្សុកូលធ្វើបុណ្យដារជារៀងរាល់ឆ្នាំ ចាប់តាំងពីសម័យដើមមក អត់តែជំនាន់ប៉ុល ពត ប៉ុណ្ណោះ ។ តាមរយៈការធ្វើបុណ្យដារឧទ្ទិសកុសលបួងសួង១ឆ្នាំម្តងនេះ អ្នកភូមិក៏តែងតែជួបសេចក្តីសុខ មិនដែលមានរឿងអ្វីកើតឡើងទេ សូម្បីតែមែកឈើពុកៗទាល់តែយប់ជ្រៅស្ងាត់មនុស្សទើបជ្រុះបាក់ធ្លាក់មកដីម្តងៗមិនដែលប៉ះពាល់ដល់អ្នកភូមិទេ ។
នៅតាមដងផ្លូវជាតិនានា កម្រមានដើមឈើធំដូចដើមត្រាងនេះណាស់ ។ ការអភិរក្សដើមឈើដែលមានអាយុកាលរាប់រយឆ្នាំបែបនេះ គឺជារឿងដ៏ល្អ ព្រោះតែរុក្ខជាតិធំៗពិតជាមានសោភ័ណភាពទាក់ទាញបំផុត ៕
ចែករំលែកព័តមាននេះ