ខេត្តបន្ទាយមានជ័យ ៖ កាលពីថ្ងៃទី២ មីនា កន្លងមកគំរោងកម្មវិធីស្បៀងអាហារសហភាពអឺរ៉ុបបានប្រារព្វពិធីចែកធុងដាក់ស្រូវពូជជាកញ្ចប់ក្រោយរដូវប្រមូលផល ដល់ប្រជាពលរដ្ឋក្រីក្រចំនួន៦៧០គ្រួសារក្នុងភូមិចំនួន៨នៃស្រុកស្វាយចេក ដែលស្ថិតនៅក្នុងគម្រោងបង្កើតសន្តិសុខស្បៀងលើគ្រួសារកសិករដែលរងឥទ្ធិពលដោយសារការឡើងថ្លៃស្បៀងអាហារ។ ពិធីនេះមានការចូលរួមពីតំណាងមន្ទីរកសិកម្មខេត្ត និងគំរោងកម្មវិធីស្បៀងអាហារសហភាព ។
លោកសៀក សូលី តំណាងគំរោងកម្មវិធីស្បៀងអាហារសហភាពអឺរ៉ុបមានប្រសាសន៍ថា ដើម្បីជួយដល់ប្រជាពលរដ្ឋក្រីក្រឱ្យមានលទ្ធភាពក្នុងការបង្កើនសន្តិសុខស្បៀង គំរោងកម្មវិធីស្បៀងអាហារសហភាពអឺរ៉ុបបានជួយដល់ប្រជាពលរដ្ឋជាង៥ម៉ឺនគ្រួសារនៃខេត្តចំនួន១០នូវសំភារកសិកម្ម គ្រាប់ពូជដែលផ្តល់ទិន្នផលខ្ពស់ និងផ្តល់នូវជំនាញបច្ចេកទេសថ្មីៗសំរាប់ដាំដុះដំណាំកសិកម្ម វារីវប្បកម្ម ជំនាញក្នុងការផ្តល់អាហារូបត្ថម្ភដល់កុមារតូច ព្រមទាំងស្តារប្រព័ន្ធស្រោចស្រពដែលមានស្រាប់ក្នុងតំបន់គោលដៅឱ្យដំណើរការកាន់តែប្រសើរឡើង។
លោកប៉ាង វណ្ណសេដ្ឋ អនុប្រធានមន្ទីរកសិកម្មខេត្ត បានថ្លែងអំណរគុណចំពោះគំរោងកម្មវិធីស្បៀងអាហារសហភាពអឺរ៉ុបដែលបានបង្កើតឱ្យមានសន្តិសុខស្បៀងសំរាប់គ្រួសារក្រីក្រនេះឡើង។ លោកបញ្ជាក់ថា គំរោងនៅស្រុកស្វាយចេកនេះទទួលបានពូជបន្លែ សំភារកសិកម្ម ជី សំភាររៀបចំអាហារូបត្ថម្ភ សំពត់តង់ហាលស្រូវ ហើយថ្ងៃនេះទទួលបានធុងដាក់ស្រូវពូជជាកញ្ចប់ក្រោយរដូវប្រមូលផល និងនៅពេលឆាប់ៗខាងមុខនេះនឹងទទួលបានសំភារថែទាំប្រព័ន្ធធារាសាស្ត្រ និងពូជស្រូវដែលមានគុណភាពខ្ពស់។ លោកបានសំណូមពរដល់ប្រជាពលរដ្ឋដែលទទួលសំភារក៏ដូចជាពូជពីគំរោងនេះត្រូវចេះប្រើប្រាស់ឱ្យចំទិសដៅ សំដៅលើកកំពស់គុណភាពជីវិតឱ្យកាន់តែប្រសើរឡើង៕
ចែករំលែកព័តមាននេះ