លោករ៉យ អេហ្វ បូមីស្ទើ (Roy F. Baumeister) ដែលជាអ្នកចិត្តវិជ្ជាមួយរូបបាននិយាយក្នុងសៀវភៅរបស់លោកក្រោមចំណងជើង Willpower ថា ការគម្រាមកំហែងធំជាងគេរបស់ការគ្រប់គ្រងខ្លួនឯង និងគោលដៅក្នុងជីវិតគឺការនឿយហត់នឹងការធ្វើការសម្រេចចិត្ត។ ក្នុងពេលដែលមនុស្សមានពេលវេលាមិនច្រើន និងមានតម្រូវការឲ្យមានការធ្វើការសម្រេចចិត្តលឿនកាន់តែច្រើន សហគ្រិន និងអ្នកនយោបាយភាគច្រើនជួបនូវសម្ពាធទាំងនេះ។
ការធ្វើការសម្រេចចិត្តនីមួយៗទាមទារឲ្យមានការចំណាយពេលវេលា និងកម្លាំង។ ការស្រាវជ្រាវដែលបានចេញផ្សាយក្នុង Journal Of Experimental Social Psychology បានប្រទះឃើញថាការនឿយហត់នឹងការធ្វើការសម្រេចចិត្តបង្កឲ្យបាត់បង់ជំនឿទុកចិត្ត និងប៉ះពាល់ដល់ការរៀបចំផែនការផងដែរ។
សហគ្រិនដែលមានទ្រព្យសម្បត្តិរាប់ប៊ីលានដុល្លារ និងអ្នកនយោបាយដ៏ល្បីអាចទប់ទល់នឹងសម្ពាធទាំងនេះបានដោយយ៉ាងដូចម្តេច? សម្រាប់លោកបារ៉ាក់ អូបាម៉ា (Barack Obama) ដែលជាអតីតប្រធានាធិបតីអាមេរិក និងលោកម៉ាក ហ្សាក់កាបឺក (Mark Zuckerberg) ដែលជានាយកប្រតិបត្តិរបស់ Facebook ព្រមទាំងបុគ្គលដែលជោគជ័យជាច្រើនទៀតមានទម្លាប់មួយ គឺការស្លៀកពាក់សម្លៀកបំពាក់ដូចៗគ្នាជារៀងរាល់ថ្ងៃ។ មូលហេតុគឺមកពីពួកគេអាចជៀសវាងការធ្វើការសម្រេចចិត្តលើសម្លៀកបំពាក់បានដែលអនុញ្ញាតឲ្យពួកគេទុកកម្លាំងនិងពេលវេលាសម្រាប់កិច្ចការធំៗវិញ។
លោកហ្សាក់កាបឺកធ្លាប់បាននិយាយនៅឆ្នាំ ២០១៤ ថា «ខ្ញុំចង់ធ្វើឲ្យជីវិតមានភាពងាយស្រួលដើម្បីឲ្យខ្ញុំធ្វើការសម្រេចចិត្តតិចបំផុតពីរឿងដែលមិនពាក់ព័ន្ធនឹងការងារដែលជួយដល់សហគមន៍។»
ក្រៅពីនេះហើយ អ្នកក៏អាចជៀសវាងការនឿយហត់ក្នុងការធ្វើការសម្រេចចិត្តតាមវិធីផ្សេងៗទៀតដែរដូចជាការរកជំនួយសម្រាប់កិច្ចការប្រចាំថ្ងៃ ដូចជាការកម្ម៉ង់អាហារថ្ងៃត្រង់ និងរកជំនួយការសម្រាប់ចាត់ចែងកិច្ចការតូចៗជាដើម។
ប្រសិនបើអ្នកចាំបាច់ត្រូវប្រើភាពច្នៃប្រឌិតក្នុងការងាររបស់អ្នកនោះ ការធ្វើការសម្រេចចិត្តច្រើនពេកអាចនឹងប៉ះពាល់ដល់អ្នកដែរ។ អ្នកគួរតែកំណត់ពេលវេលាឲ្យបានច្បាស់លាស់ដើម្បីធានាថាអ្នកមិនធ្វើការសម្រេចចិត្តច្រើនពេក ៕
ចែករំលែកព័តមាននេះ