នរណាៗក៏ចង់មានអាជីពដែលល្អច្បាស់លាស់មួយដែរ ហើយនរណាៗក៏ចង់បានស្ថេរភាពហិរញ្ញវត្ថុផងដែរ។ ប៉ុន្តែការសម្រេចបានគោលដៅទាំងនេះមិនពិបាកទេប្រសិនបើអ្នកបានកំណត់នូវគោលដៅ និងផ្លូវដែលអ្នកត្រូវដើរដើម្បីសម្រេចវាបានច្បាស់លាស់។ ខាងក្រោមគឺជាវិធីសាស្ត្រដែលអាចជួយឲ្យអ្នកកំណត់គោលដៅក្នុងអាជីពដោយជោគជ័យបាន៖
១. ចាប់ផ្តើមពីអ្វីដែលធំៗ
រឿងភាគច្រើនក្នុងជីវិតទាមទារឲ្យអ្នកចាប់ផ្តើមពីចំណុចដំបូង ប៉ុន្តែក្នុងការកំណត់គោលដៅក្នុងអាជីព អ្នកគួរតែចាប់ផ្តើមពីលទ្ធផលដែលអ្នកចង់បានវិញ។ តើអ្នកចង់បានអ្វីឲ្យពិតប្រាកដ? ការធ្វើដូច្នេះនឹងជួយឲ្យអ្នករកឃើញផ្លូវដែលអ្នកត្រូវដើរបានច្បាស់លាស់ ខណៈដែលជំរុញទឹកចិត្តអ្នកឲ្យព្យាយាមសម្រេចវាផងដែរ ព្រោះអ្នកតែងតែដឹងពីអ្វីដែលអ្នកចង់បាន និងការងារដែលអ្នកត្រូវធ្វើដើម្បីទទួលបានវា។
២. បំបែកវាមកគោលដៅតូចៗ
បន្ទាប់ពីបានចាប់ផ្តើមពីគោលដៅចុងក្រោយហើយ អ្នកអាចចាប់ផ្តើមបំបែកវាឲ្យក្លាយជាគោលដៅតូចៗដែលអ្នកអាចងាយសម្រេចជាង។ ឧទាហរណ៍ថា អ្នកមានគោលដៅក្លាយជាប្រធាននាយកដ្ឋានរបស់អ្នកនៅចុងឆ្នាំនេះ ដូច្នេះអ្នកត្រូវតែកំណត់គោលដៅប្រចាំខែ និងប្រចាំសប្តាហ៍ដែលអ្នកត្រូវបំពេញដើម្បីសម្រេចបានគោលដៅធំនោះ។
៣. ប្រើការវាយតម្លៃនៅកន្លែងការងារ
ប្រសិនបើកន្លែងការងាររបស់អ្នកមានការវាយតម្លៃការងារបុគ្គលិកនោះ អ្នកនឹងមានភាពងាយស្រួលជាងអ្នកដទៃព្រោះអ្នកនឹងអាចមើលឃើញនូវអ្វីដែលអ្នកពូកែធ្វើ និងអ្វីដែលអ្នកត្រូវកែសម្រួល ឬខិតខំប្រឹងប្រែងបន្ថែម។ ព័ត៌មានទាំងនេះមានសារៈសំខាន់ណាស់ក្នុងការកែសម្រួលគោលដៅរបស់អ្នកដើម្បីបង្កើនឱកាសជោគជ័យ។
៤. អ្នកតែងតែមានអ្វីអាចរៀនសូត្របន្ថែមបាន
ប្រសិនបើអ្នកមានអារម្មណ៍ថាអ្នកជាប់នឹងមួយកន្លែងមិនអាចដើរទៅមុខបាននោះ វាអាចជាលទ្ធផលមកពីការវាយតម្លៃលើសមត្ថភាពខ្លួនខុស។ ប្រសិនបើអ្នកចង់បន្តអភិវឌ្ឍន៍ខ្លួនរហូតនោះអ្នកត្រូវតែប្រកាន់ខ្ជាប់នូវផ្នត់គំនិតថាអ្នកបើកទូលាយក្នុងការទទួលចំណេះដឹងថ្មីៗជានិច្ច។
អ្នកត្រូវចងចាំថាអ្នកមិនអាចចេះដឹងគ្រប់យ៉ាងបានទេ ព្រោះតែងតែមានអ្វីថ្មីដែលអ្នកអាចរៀនសូត្រជារៀងរាល់ថ្ងៃ។ ប្រសិនបើអ្នកចង់ជោគជ័យ អ្នកមិនត្រូវបោះបង់ការរៀនសូត្រឡើយ ៕
ចែករំលែកព័តមាននេះ