ពួកជីវពលកុលសម្ព័ន្ធស្និទ្ធប្រធានាធិបតីយេម៉ែនលោក ABD RABBO MANSOUR HADI និងពួកឧទ្ទាមស៊ីអីុតហ៊ូធី បានបន្តការប្រយុទ្ធគ្នាយ៉ាងខ្លាំងក្លាកាលពីថ្ងៃទី៧ មេសានៅតាមវិថីនានា
ពួកជីវពលកុលសម្ព័ន្ធស្និទ្ធប្រធានាធិបតីយេម៉ែនលោក ABD RABBO MANSOUR HADI និងពួកឧទ្ទាមស៊ីអីុតហ៊ូធី បានបន្តការប្រយុទ្ធគ្នាយ៉ាងខ្លាំងក្លាកាលពីថ្ងៃទី៧ មេសានៅតាមវិថីនានាដើម្បីដណ្តើមត្រួតត្រាទីក្រុងកំពង់ផែអាដេន នៅភាគខាងត្បូងយេម៉ែន បណ្តាលឱ្យមនុស្សស្លាប់យ៉ាងតិច១៦នាក់ ។
កាកបាទក្រហមអន្តរជាតិ CICR កាលពីថ្ងៃទី៧មេសាបានចេញការប្រកាសអាសន្នពីសភាពការណ៍មនុស្សធម៌ប្រកបដោយគ្រោះមហន្តរាយនៅទីក្រុងអាដេនខណៈទីក្រុងធំទី២នោះរបស់ប្រទេសជាទីលាននៃការប្រយុទ្ធគ្នារាល់ថ្ងៃរវាងពួកឧទ្ទាមហ៊ូធីស្និទ្ធអីុរ៉ង់ និងពួកអ្នកគាំទ្រប្រធានាធិបតីលោក HADI គាំទ្រដោយអារ៉ាប៊ីសាអ៊ូឌីត ។
អ្នកនាំពាក្យរបស់ CICR នៅទីក្រុងសាណាលោកស្រី MARIE CLAIRE FEGHALI ថ្លែងថា កាកបាទក្រហមសង្ឃឹមលើការចុះនាថ្ងៃទី៨ មេសា នូវយន្តហោះដឹកជំនួយមនុស្សធម៌១គ្រឿងដំបូងនៅក្រុងសាណាដែលយន្តហោះនោះដឹកថ្នាំពេទ្យ១៦តោនហោះមកពីហ្ស៊កដានី។ ជំនួយទម្ងន់៣២តោនអាចបញ្ជូនមកនាថ្ងៃទី៩ មេសា ។ លោកស្រីបន្តថា ជំនួយនោះ រង់ចាំបំផុតនៅយេម៉ែនដែលសភាពការណ៍មនុស្សធម៌អាក្រក់ខ្លាំងណាស់ ។ សភាពការណ៍រិតតែអាក្រក់នៅទីក្រុងអាដេនដោយនៅទីនោះសង្គ្រាមកើតមាននៅគ្រប់កន្លែងនៃទីក្រុង ។ មកពីការប្រយុទ្ធគ្នាប្រជាជនទីក្រុងនោះប្រមាណជា៨០០.០០០នាក់ពុំអាចរត់ភៀសខ្លួនចេញបាន។ សាកសពមនុស្សនៅចោលរាយប៉ាយជួនកាលលើផ្លូវថ្នល់ព្រោះគ្មាននរណាម្នាក់ហ៊ានផ្សងព្រេងទៅទាញយកចេញឡើយ ។ សភាពការណ៍កាន់តែអាក្រក់នៅតាមមន្ទីរពេទ្យនានាដែលសំណើរបស់កាកបាទក្រហមសុំឱ្យមានការផ្អាកបាញ់គ្នាមនុស្សធម៌ដើម្បីបញ្ជូនជំនួយពុំមានការឆ្លើយតប ។
កាលពីថ្ងៃទី៧ មេសា ប្រតិបត្តិការជម្លៀសជនបរទេសចេញពីយេម៉ែននៅបន្ត ។ ក្នុងទីក្រុងសាណា ។ យន្តហោះឥណ្ឌា៣គ្រឿងបានដឹកមនុស្សចេញ៦០៤នាក់ ក្នុងនោះមានជនជាតិយេម៉ែនប្រមាណជា១០០នាក់ផងទៅកាន់ប្រទេសហ្ស៊ីប៊ូទី ។ ចំណែកកងម៉ារីនប៉ាគីស្ថានក៏ប្រកាសដែរនាថ្ងៃទី៧ មេសា នោះពីការជម្លៀសតាមនាវានូវជនជាតិប៉ាគីស្ថាន១០០នាក់ និងជនបរទេស៣០នាក់ទៀត ។
ការប្រយុទ្ធគ្នានានាដែលប្រមូលផ្តុំរយៈពេលប៉ុន្មានថ្ងៃចុងក្រោយនោះនៅភាគខាងត្បូងយេម៉ែនចាប់តាំងពីថ្ងៃទី៥ មេសាមក បណ្តាលឱ្យមនុស្សស្លាប់យ៉ាងតិច១៥៩នាក់ក្នុងនោះ៦៣នាក់នៅក្រុងអាដេន ។
កាលពីថ្ងៃទី៧ មេសា កងយន្តហោះរបស់ក្រុមចម្រុះនាំមុខដោយអារ៉ាប៊ីសាអ៊ូឌីតបានវាយប្រហារប្រឆាំងទីតាំង១កន្លែងរបស់ពួកហ៊ូធី នៅជាយក្រុងអាដេន ដោយសម្លាប់ពួកនោះ៨នាក់ និងប្រឆាំងបណ្តាជំរំយោធានៅខេត្ត TAEZ បណ្តាលឱ្យមនុស្សស្លាប់និងរបួសជាច្រើននាក់។
អង្គការសុខភាពពិភពលោក WHO ប្រកាសនាថ្ងៃទី៧ មេសាថា មនុស្សយ៉ាងតិច៨៤០នាក់ ស្លាប់និង១៧០០នាក់របួសនៅយេម៉ែន ចាប់តាំងពីថ្ងៃទី១៩ មីនាមក ។ ចំណែកអង្គការយូនីសេហ្វរាយការណ៍ពីកុមារយ៉ាងតិច៧៤នាក់ស្លាប់ និង៤៤នាក់របួសចាប់តាំងពីថ្ងៃទី២៦ មីនាមក ។ ចំណែកមនុស្សជាង១០០.០០០នាក់បានរត់ភៀសខ្លួនមកពីសង្គ្រាម ៕
ចែករំលែកព័តមាននេះ