ខេត្តស្វាយរៀង ៖ ជាងជួសជុលរថយន្តម្នាក់បានរងរបួសធ្ងន់ និង២នាក់ទៀតរបួសស្រាលដោយសារបើកបររថយន្តសាកក្រោយពេលជួសជុលរួច សង្ស័យគាំងម៉ាស៊ីនបណ្តាលឲ្យផ្ទុះក្រឡាប់បីបួនត្រឡប់ធ្លាក់ចូលហាវថ្នល់ផ្ងារជើងឡើងលើ។
ហេតុការណ៍នេះបានកើតឡើងកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី៦ មេសា ២០១៥ នៅលើកំណាត់ផ្លូវជាតិលេខ១ចំណុចស្ពានទន្លៀងទីមួយ ស្ថិតនៅភូមិថ្មី សង្កាត់សង្ឃ័រ ក្រុងស្វាយរៀង។ រថយន្តក្រឡាប់នេះម៉ាកឡិចស៊ីសRX៣០០ ពណ៌ស ពាក់ស្លាកលេខស្វាយរៀង២A៣៦៣៧។
បើតាមមន្ត្រីនគបាលក្រុងស្វាយរៀងបានឲ្យដឹងថា មុនពេលកើតហេតុគេឃើញម្ចាស់រថយន្តបើករថយន្តយកទៅជួសជុលនៅការាស់ជួសជុលរថយន្តមួយកន្លែង ក្រោយពីជួសជុលរួចជាងជួសជុលរថយន្ត៣នាក់បាននាំគ្នាឡើងបើកសាករថយន្តចេញពីការាស់ឡើងលើផ្លូវជាតិលេខមួយបើកពីរទិសខាងលិចទៅកើតយ៉ាងលឿន លុះដល់ចំណុចកើតហេតុខាងលើក៏គាំងម៉ាស៊ីនបណ្តាលឱ្យផ្ទុះក្រឡាប់បីបួនត្រឡប់ធ្លាក់ចូលហាវថ្នល់ផ្ងារជើងឡើងលើរងរបួសធ្ងន់ស្រាលតែម្តង។ រីឯរថយន្តខូចយ៉ាងដំណំត្រូវនគបាលចរាចរណ៍ខេត្តហៅរថយន្តមកស្ទួចយកទៅរក្សារទុកនៅការិយាលយ័នគបាលចរាចរណ៍ដើម្បីដោះស្រាយតាមច្បាប់៕
ចែករំលែកព័តមាននេះ