រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា នៅពេលឆាប់ៗខាងមុខនេះរាជរដ្ឋាភិបាល ចាំបាច់ត្រូវបង្កើតច្បាប់ស្តីពីការគ្រប់គ្រងអង្គការក្រៅរដ្ឋាភិបាល ។ កន្លងទៅ បញ្ហាមិនប្រក្រតីរបស់អង្គការក្រៅរដ្ឋាភិបាលមួយចំនួន បានធ្វើសកម្មភាពខូចកិត្តិយសដល់ប្រទេសជាតិ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍បែបនេះនាព្រឹកថ្ងៃទី៥ មេសាក្នុងឱកាសដែលសម្តេច និងសម្តេចកិត្តិព្រឹទ្ធបណ្ឌិតអញ្ជើញជាអធិបតីភាពក្នុងពិធីសម្ពោធអគារផ្កាម្លិះគាំទ្រចិត្តសាស្ត្រសង្គម និងសួរសុខទុក្ខកុមារកំព្រា កុមារពិការភ្នែក កុមារគថ្លង់នៃសាលាគ្រួសារថ្មី និងមណ្ឌលភ្នំពេញថ្មី ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
ទាក់ទិននឹងបញ្ហាខាងលើ សម្តេចតេជោនាយករដ្ឋមន្ត្រី បានលើកពីបញ្ហាមិនប្រក្រតីរបស់អង្គការក្រៅរដ្ឋាភិបាលខ្លះថា មានខ្លះកន្លងទៅជាស្ត្រីខូចសិប្បនិម្មិតថា គេចាប់រំលោភតាំងពីនៅកុមារ រួចហើយទៅកៀរគររកជំនួយពីបរទេស ហើយបង្កើតជាអង្គការក្នុងស្រុកខ្មែរ។ មានអ្នកខ្លះ ប្រឹងប្រែងជេររាជរដ្ឋាភិបាលពីការគាបសង្កត់សិទ្ធិមនុស្ស ដើម្បីឱ្យគេឱ្យលុយមកធ្វើអង្គការសិទ្ធិមនុស្ស ។ ដើរតួជាស្រីខូចយកឈ្មោះកម្ពុជាទៅលក់ដើម្បីបានលុយ នៅមានអង្គការមួយចំនួនទៀតពាក់ព័ន្ធនឹងហិរញ្ញប្បទាន… ។
សម្តេចតេជោនាយករដ្ឋមន្ត្រី បានរំឭកពីកាលសម្តេចជួបពិភាក្សាជាមួយលោកអគ្គលេខាធិការអង្គការសហប្រជាជាតិ (អ.ស.ប) បាន គីមូន នៅសេនដាយ ប្រទេសជប៉ុន ថា កាលពីឆ្នាំ២០០៥ ប្រជុំអាស៊ាននៅញូវយ៉ក សម្តេចបានប្រាប់លោក កូហ្វីអាណាន់ ថា «ខ្ញុំមិនរំពឹងថា មានរបាយការណ៍ល្អពីសិទ្ធិមនុស្សនៅកម្ពុជាទេ ព្រោះបើសិនជាមានរបាយការណ៍ល្អនៅកម្ពុជា ស្តីពីសិទ្ធិមនុស្សនៅកម្ពុជា ពួកអ្នកធ្វើការខាងសិទ្ធិមនុស្សលែងមានការងារធ្វើហើយ នេះជារឿងពិត» ។
ដូច្នេះ រាជរដ្ឋាភិបាលត្រូវតែធ្វើច្បាប់ដើម្បីគ្រប់គ្រងអង្គការក្រៅរដ្ឋាភិបាលទៅតាមនីតិវិធីច្បាប់ ។
សម្តេចបានរិះគន់អស់លោកដែលជាអង្គការក្រៅរដ្ឋាភិបាលទាំងឡាយថា សូមកុំខ្លាច បើយើងតម្លាភាព គឺត្រូវដាក់លើតុ ។
អស់លោកដឹងហើយ របាយការណ៍ហិរញ្ញវត្ថុរបស់រាជរដ្ឋាភិបាល ត្រូវចេញរាល់ឆ្នាំ គ្រាន់តែចេញយឺត គឺមានការបន្ទោស ។ ចំណែកអង្គការក្រៅរដ្ឋាភិបាល ញញើតអ្វីនឹងការរៀបចំបង្កើតច្បាប់ រាជរដ្ឋាភិបាលធ្វើច្បាប់ មិនមែនរារាំងអង្គការក្រៅរដ្ឋាភិបាលទេ ប៉ុន្តែរាជរដ្ឋាភិបាលចង់ឱ្យមានតម្លាភាព ទាំងអង្គការក្រៅរដ្ឋាភិបាលក្នុងស្រុក អង្គការក្រៅរដ្ឋាភិបាលក្រៅស្រុក បើសិនបរទេសគេជួយលុយមកអង្គការក្រៅរដ្ឋាភិបាល តើយកទៅធ្វើអ្វី?បញ្ចេញរបាយការណ៍ឱ្យរាជរដ្ឋាភិបាលដើម្បីមានសិទ្ធិចុះទៅអូឌីត ពិនិត្យមើល ។ បើឆ្លើយមិនត្រូវ តើយ៉ាងដូចម្តេច ?
សម្តេចតេជោរិះគន់ថា ឱ្យតែខាងរាជរដ្ឋាភិបាល ខ្លួនឯងចេះពិនិត្យ ឯដល់ខ្លួនឯងវិញ ចេះតែនៅក្រៅច្បាប់រហូតទៅឬ ? សូមអស់លោកអង្គការក្រៅរដ្ឋាភិបាលកុំជ្រួលជ្រើម ល្មមៗបានហើយអស់លោក មិនទាន់មានសិទ្ធិអនុម័តទេ ។
សម្តេចតេជោនាយករដ្ឋមន្ត្រីគូសបញ្ជាក់ថា ពេលវេលានៃការអនុម័តច្បាប់មិនហួសពីខែឧសភាខាងមុខនេះទេ ដាក់ចូលគណៈរដ្ឋមន្ត្រី រួចបញ្ជូនទៅរដ្ឋសភា ចង់អ្នកណាគាំទ្រ ឬមិនគាំទ្រសំឡេងរបស់សមាជិកសភាមានសិទ្ធិអនុម័ត ។ ត្រូវកំណត់នីតិវិធីចុះបញ្ជីជាតិ សូម្បីតែគណបក្សនយោបាយមានសិទ្ធិចូលសភា គេក៏មានបញ្ជីជាតិដែរ ហើយគណបក្សនយោបាយក៏ត្រូវរាយការណ៍អំពីហិរញ្ញវត្ថុរបស់គណបក្សដែរ ។
ចម្លែកត្រង់អង្គការក្រៅរដ្ឋាភិបាល ខ្ញុំសួរថា តើមូលហេតុអ្វីបានជាអ្នកខ្លះខ្លាចច្បាប់ តើមានអាថ៌កំបាំងអ្វីនៅពីក្រោយខ្នង ។ សម្តេចមានប្រសាសន៍ថា តាមខ្ញុំដឹងខ្លះៗ អង្គការក្រៅរដ្ឋាភិបាលដែលទទួលលុយពីបរទេសមុននឹងនិយាយ ត្រូវទៅស្ថានទូតប្រទេសនោះសិន ។
អស់លោកកុំស្មានថា គេមិនដឹងហើយមិនយល់ ។ ដូច្នេះអស់លោកល្មមៗបានហើយ សិទ្ធិអស់លោកគ្រាន់តែតែងតាំងដោយខ្លួនឯង ធ្វើអ្វីក៏ខ្លួនឯង ។ ដូច្នេះការបង្កើតច្បាប់នេះដើម្បីមានច្បាប់គ្រប់គ្រង មិនមែនរារាំងសកម្មភាពទេ ក៏ប៉ុន្តែទាំងអស់គ្នាត្រូវតម្លាភាព ។
សម្តេចតេជោបានរិះគន់អ្នកវិភាគឯករាជ្យ បើអ្នកឯងមិនគាំទ្រហីទៅ ឥឡូវអំណាចមិនមែនអំណាចរបស់អស់លោកទេ បើអស់លោកមិនចុះបញ្ជី សាកមើល អស់លោកគង់នឹងដឹង… ។
លោក ប៉ា សុជាតិវង្ស អភិបាលរាជធានីភ្នំពេញ និងជាប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ មានប្រសាសន៍ថា អគារផ្កាម្លិះគាំទ្រចិត្តសាស្ត្រសង្គមដែលដាក់សម្ពោធនេះ គឺជាសមិទ្ធផលថ្មីថែមមួយទៀតរបស់កាកបាទក្រហមកម្ពុជា ក្នុងការចូលរួមអបអរសាទរខួបលើកទី៦០ នៃការបង្កើតកាកបាទក្រហមកម្ពុជា និងស្របពេលដែលកាកបាទក្រហមកម្ពុជាកំពុងត្រៀមរៀបចំប្រារព្ធខួបទី១៥២ របស់ចលនាកាកបាទក្រហម អឌ្ឍចន្ទក្រហម ក្រោមប្រធានបទ «កម្លាំងមនុស្សធម៌ ៖ គោលការណ៍គ្រឹះក្នុងសកម្មភាព»។
ក្នុងស្មារតីនេះ ដើម្បីបន្តនិរន្តរភាពអគារផ្កាម្លិះគាំទ្រចិត្តសាស្ត្រសង្គមឱ្យដំណើរការទៅមុខដោយរលូនដូចដែលអនុវត្តកន្លងមក គណៈកម្មាធិការសាខាកាកបាទក្រហមកម្ពុជារាជធានីភ្នំពេញប្តេជ្ញាពង្រឹង និងពង្រីកសកម្មភាពអ្នកស្ម័គ្រចិត្តបន្ថែមទៀតក្នុងការលើកទឹកចិត្ត ពង្រឹងផ្នែកផ្លូវចិត្តដល់អ្នករស់នៅជាមួយមេរោគអេដស៍ ជំងឺអេដស៍ អ្នកដែលទទួលរងផលប៉ះពាល់ដោយសារមេរោគអេដស៍នៅក្នុងរាជធានីភ្នំពេញ ឱ្យមានក្តីសង្ឃឹម និងមានភាពកក់ក្តៅ ។
ក្នុងឱកាសនោះ សម្តេចតេជោ និងសម្តេចកិត្តិព្រឹទ្ធបណ្ឌិតបានប្រគល់ ៖
-កុមារពិការភ្នែក កុមារគថ្លង់ និងកុមារកំព្រា សរុបទាំងអស់៧៨៧នាក់ ក្នុងម្នាក់ៗទទួលបានឃីត១កញ្ចប់ និងទឹកប្រាក់៥ម៉ឺនរៀល ។
-លោកគ្រូ អ្នកគ្រូ និងបុគ្គលិក សរុបទាំងអស់១៨៨នាក់ ក្នុងម្នាក់ៗទទួលបានឃីត១កញ្ចប់ និងទឹកប្រាក់១០ម៉ឺនរៀល ។
-មណ្ឌលកុមារកំព្រាភ្នំពេញថ្មី (ASPECA) មណ្ឌលគាំពារកុមារតាខ្មៅ មណ្ឌលផ្ទះអចិន្ត្រៃយ៍ ខ្ពបវែងតាខ្មៅ មណ្ឌលកុមារងាយរងគ្រោះផ្សារដេប៉ូ រាជធានីភ្នំពេញ និងមណ្ឌលកុមារងាយរងគ្រោះចំការមន រាជធានីភ្នំពេញ សរុបចំនួន៥មណ្ឌល មណ្ឌលនីមួយៗទទួលបានមី៥កេស ត្រីខ២កេស ប៊ីចេង២គីឡូក្រាម ស្ករស៥គីឡូក្រាម ទឹកក្រូច៥កេស ទឹកបរិសុទ្ធ៥កេស និងទឹកប្រាក់ចំនួន២លានរៀល ។
-សាលាគថ្លង់ច្បារអំពៅផ្តល់ មី២០កេស ត្រីខ៥កេស ប៊ីចេង៥គីឡូក្រាម ស្ករស២៥គីឡូក្រាម ទឹកក្រូច២០កេស ទឹកបរិសុទ្ធ២០កេស និងទឹកប្រាក់៣លានរៀល ។
-មណ្ឌលអគារផ្កាម្លិះគាំទ្រចិត្តសាស្ត្រសង្គម និងសាលាកុមារពិការភ្នែក គថ្លង់ភ្នំពេញថ្មី ផ្តល់មី២០កេស ត្រីខ៥កេស ប៊ីចេង៥គីឡូក្រាម ស្ករស២៥គីឡូក្រាម ទឹកក្រូច២០កេស ទឹកបរិសុទ្ធ២០កេស និងទឹកប្រាក់ចំនួន៥លានរៀល ។
នៅក្នុងឱកាសនោះ ក៏បានរៀបចំជូននូវអាហារថ្ងៃត្រង់ផងដែរ ៕
ចែករំលែកព័តមាននេះ