អ្នកនាំពាក្យម្នាក់របស់ពួកបះបោរលីប៊ីថ្លែងកាលពីថ្ងៃទី២០ មីនា តាមទូរទស្សន៍អាល់ហ្សាហ្ស៊ីរ៉ាថា ពលរដ្ឋលីប៊ីជាង៨.០០០នាក់ដែលតស៊ូក្នុងជួរពួកបះបោរបានត្រូវស្លាប់តាំងពីចាប់ផ្តើមបដិវត្តន៍ប្រឆាំងរបបលោកមូអាម៉ា កាដាហ្វីមក។ អ្នកនាំពាក្យរូបនេះ លោកអាប់ដែល ហាហ្វីសហ្គោហ្គា និយាយថា យើងជំរឿនឃើញមនុស្សរបស់យើងស្លាប់ជាង៨.០០០នាក់។ ម្យ៉ាងទៀតអ្នកនាំពាក្យរូបនេះបានរិះគន់អគ្គលេខាធិការសម្ព័ន្ធអារ៉ាប់ លោកអាមរ៍មូសាដែលបានសំដែងការប្រឆាំងចំពោះអន្តរាគមន៍តាមអាកាស និងតាមដែនសមុទ្ររបស់ពួកលោកខាងលិចនៅលីប៊ី។ លោកអាមរ៍ មូសាមានប្រសាសន៍ថា អ្វីដែលកើតមាននៅលីប៊ីវាខុសនឹងទិសដៅបង្កើតតំបន់ហាមការហោះហើរមួយពីលើប្រទេសលីប៊ី ហើយអ្វីដែលយើងចង់បាននោះ គឺការពារជនសីុវិល ពុំមែនការទំលាក់គ្រាប់បែកថែមទៀតលើជនសីុវិលនោះឡើយ។
អ្នកនាំពាក្យរបស់ពួកបះបោរបានតបចំពោះពាក្យទាំងនោះវិញថា ការពោលបែបនោះរបស់លោកអគ្គលេខាធិការសម្ព័ន្ធអារ៉ាប់ធ្វើឱ្យខ្ញុំមានការភ្ញាក់ផ្អើល ៕
ចែករំលែកព័តមាននេះ