រាជធានីភ្នំពេញ ៖ រាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រជាតិស្តីពីពិការភាពឆ្នាំ ២០១៤-២០១៨ ដោយបានចែងយ៉ាងច្បាស់អំពីការផ្តល់ជូនជនពិការ នូវសេវាសុខភាពប្រកបដោយគុណភាព
រាជធានីភ្នំពេញ ៖ រាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រជាតិស្តីពីពិការភាពឆ្នាំ ២០១៤-២០១៨ ដោយបានចែងយ៉ាងច្បាស់អំពីការផ្តល់ជូនជនពិការ នូវសេវាសុខភាពប្រកបដោយគុណភាព និងសមត្ថភាពព្រមទាំងស្តារលទ្ធភាពពលកម្ម កាយសម្បទា និងសតិបញ្ញា ។នេះជាប្រសាសន៍របស់លោកឯម ច័ន្ទមករា អគ្គលេខាធិការ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ បានអញ្ជើញបិទសិក្ខាសាលាស្តីពីការចងក្រងបណ្តាញជនខ្សោយសតិបញ្ញានៅកម្ពុជា នៅមជ្ឈមណ្ឌលសហប្រតិបត្តិការកម្ពុជា-ជប៉ុន រសៀលថ្ងៃទី០១ ខែមេសា ឆ្នាំ២០១៥ ។
លោក បានមានប្រសាសន៍ថា សិក្ខាសាលានេះ បានឆ្លុះបញ្ចាំងឲ្យឃើញអំពីឆន្ទៈនយោបាយដ៏មោះមុតរបស់ក្រុមប្រឹក្សាសកម្មភាពជនពិការ ដែលជាសេនាធិការដ៏សំខាន់របស់រាជរដ្ឋាភិបាលកម្ពុជាក្នុងការប្តេជ្ញាចិត្តលើកកម្ពស់ការចូលរួមរបស់បងប្អូនជនពិការ សង្គមស៊ីវិល អង្គការមិនមែនរដ្ឋាភិបាល ពាក់ព័ន្ធនឹងវិស័យពិការភាព ពិសេសអង្គការដែលធ្វើការពាក់ព័ន្ធបញ្ហាជនពិការខ្សោយសតិបញ្ញា និងអូទីស្ស៊ឹម ។ លើសពីនេះ ការចងក្រងបណ្តាញនេះ គឺពិតជាមានផលប្រយោជន៍ណាស់សម្រាប់បងប្អូនពិការខ្សោយសតិបញ្ញា និងអូទីស្ស៊ឹម ព្រោះថាកន្លងមកនៅពុំទាន់មានអ្នកតំណាងអង្គការនោះទេ ។ លោកបានចាត់ទុកថា នេះគឺជាជំហានចាប់ផ្តើមមួយដ៏មានសារៈសំខាន់ និងជាគំរូដល់បណ្តាញអង្គការមិនមែនរដ្ឋាភិបាលដទៃទៀត ដែលធ្វើការពាក់ វិស័យពិការភាព ដើម្បីចាប់ផ្តើមជ្រើសរើសអង្គការជាតំណាងលើវិស័យនេះឲ្យក្លាយជាដៃគូដ៏ល្អក្នុងការសន្ទនា និងរួមគ្នាជាមួយរាជរដ្ឋាភិបាលកម្ពុជា ជាពិសេសក្រុមប្រឹក្សាសកម្មភាពជនពិការក្នុងការជម្រុញអនុវត្តច្បាប់លិខិតបទដ្ឋានគតិយុត្តនានា យុទ្ធសាស្ត្រជាតិ និងអន្តរជាតិ ជុំវិញវិស័យពិការភាព ពិសេសផែនការយុទ្ធសាស្ត្រជាតិស្តីពីពិការភាព ឆ្នាំ ២០១៤ -២០១៨ ។
លោក ឯម ច័ន្ទមករា អគ្គលេខាធិការ បានគូសបញ្ជាក់បន្ថែមទៀតថា រាជរដ្ឋាភិបាលបានបង្ហាញនូវការគាំទ្រក្នុងការពង្រឹង និងពង្រីកសេវាស្តារលទ្ធភាពពលកម្មកាយសម្បទាតាមសហគមន៍ សេវាពិគ្រោះយោបល់លើការព្យាបាលជម្ងឺផ្លូវចិត្តនិងសតិបញ្ញាខ្សោយសម្រាប់ជួយដល់ជនពិការ ពិសេសគឺជំរុញការអនុវត្តរបបគោលនយោបាយចំពោះជនពិការក្រីក្រនៅតាមសហគមន៍ ។ ជាមួយគ្នានេះ រាជរដ្ឋាភិបាលកម្ពុជា ក៏បានដាក់ចេញនូវយុទ្ធសាស្ត្របង្កើនការជួយបណ្តុះបណ្តាលគ្រួសារដែលមានសមាជិកពិការ ជនពិការ និងអ្នកស្ម័គ្រចិត្តអំពីវិធីថែទាំ និងបច្ចេកទេសស្តារលទ្ធភាពពលកម្ម តាមប្រភេទពិការនីមួយៗ ដើម្បីឲ្យគ្រួសារដែលមានសមាជិកជនពិការមានលទ្ធភាពស្តារកាយសម្បទា និងសតិបញ្ញាជនពិការ ៕
ចែករំលែកព័តមាននេះ