រាជធានីភ្នំពេញ ៖ ទិវាអូទីស្សឹមពិភពលើកឆ្នាំ២០១៥នេះ ជាលើកទី៨ ហើយតែសម្រាប់កម្ពុជាទិវានេះ ទើបតែបង្កើតបានជាលើកទី២ប៉ុណ្ណោះ ហើយទិវាអូទីស្សឹមឆ្នាំ២០១៥នេះ នៅកម្ពុជាក្នុងគោលបំណងដើម្បីលើកម្ពស់ដល់បងប្អូនជនពិការខ្សោយបញ្ញាចូលរួមក្នុងសង្គមអោយបានកាន់តែច្រើនឡើងៗ ។នៅថ្ងៃទី០២ ខែមេសា ឆ្នាំ២០១៥ ទិវានេះ បានធ្វើឡើងដោយមានការចូលរួមជាអធិបតីពីសំណាក់លោក សែម សុខា រដ្ឋលេខាធិការ និងជាអនុប្រធានក្រុមប្រឹក្សាសកម្មភាពជន នៅមជ្ឈមណ្ឌលសហប្រតិបត្តិការកម្ពុជា-ជប៉ុន ហើយក៏មានការអញ្ជើញចូលរួមពីសំណាក់ថ្នាក់ដឹកនាំ មន្ត្រីរាជការ សមាជិក នៃក្រុមប្រឹក្សាសកម្មភាពជនពិការ អង្គការដៃគូពាក់ព័ន្ធជាតិ និងអន្តរជាតិ និងបងប្អូនជនពិការខ្សោយសតិបញ្ញ សរុបប្រមាណ ៥០០ នាក់ ។
លោកឯម ច័ន្ទមករា អគ្គលេខាធិការ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ មានប្រសាសន៍ថា នៅកម្ពុជាទិវានេះ គឺត្រូវបានរៀបចំឡើងជាលើកទី២ហើយ ក្នុងគោលបំណងដើម្បីលើកកម្ពស់ការចូលរួមរបស់បងប្អូនជនពិការខ្សោយសតិបញ្ញា-អូទីស្សឹម ឲ្យកាន់តែច្រើនឡើងៗ ទាំងថ្នាក់ជាតិ ថ្នាក់ក្រោមជាតិ និងបន្តការផ្សព្វផ្សាយដល់សាធារណៈជន បានយល់បន្ថែមអំពីផលវិបាក នៃបងប្អូនជនពិការខ្សោយសតិបញ្ញា-អូទីស្សឹមនេះ ព្រោះថាជនពិការគ្រប់ប្រភេទនេះតែងមានអារម្មណ៍ឯកោ មានការខ្មាស់អៀន ចំពោះមជ្ឈដ្ឋានទូទៅ ពិសេសយល់ថាខ្លួនបាត់បង់ឱកាសក្នុងការទទួលការអប់រំដូចជនមិនពិការដទៃទៀត ។
លោកបានបន្តទៀតថា ក្រុមប្រឹក្សាសកម្មភាពជនពិការ តែងតែបានយកចិត្តទុកដាក់គិតគូរអំពីការវិវឌ្ឍន៍របស់កុមារខ្សោយសតិបញ្ញា ហើយលើកទឹកចិត្តដល់ប្អូនៗទាំងអស់ ត្រូវបន្តការខិតខំប្រឹងប្រែង តស៊ូបន្ថែមទៀត ដោយត្រូវមានភាពក្លាហាន និងមានជំនឿលើខ្លួនឯងផ្ទាល់ ជាជាងការដាក់ខ្លួនពឹងផ្អែកលើព្រេង វាសនា ។ លោកអគ្គលេខាធិការ បានបញ្ជាក់ឲ្យដឹងទៀតថា អ្នកជម្ងឺខ្សោយសតិបញ្ញា-អូទីស្សឹម គឺមានបញ្ហាលំបាកក្នុងការនិយាយ ការធ្វើចលនា ដែលទាមទារឲ្យយកចិត្តទុកដាក់ និងបញ្ហាសុខភាពរាងកាយ ដូចជាការគេង និងការរំខាន នៃក្រពះពោះវៀន ។ ហើយនៅប្រទេសកម្ពុជា ចំនួនជនពិការខ្សោយសតិបញ្ញា និងពិការខួរក្បាលមានចំនួនរហូតដល់ ១២,៥៣% នៃចំនួនជនពិការ សរុប ២,០៦ % ។ ភាគច្រើន នៃជនពិការប្រភេទខ្សោយសតិបញ្ញា និងពិការខួរក្បាលនេះ គឺរស់នៅខេត្តបាត់ដំបង កំពង់ចាម និងព្រៃវែង ។
លោក សែម សុខា រដ្ឋលេខាធិការ បានសម្តែងការកោតសរសើរ និងវាយតម្លៃខ្ពស់ ចំពោះក្រុមប្រឹក្សាសកម្មភាពជនពិការ មូលនិធិជនពិការ ក្រសួង ស្ថាប័នពាក់ព័ន្ធ អង្គការដៃគូធ្វើការលើវិស័យពិការភាពនៅកម្ពុជា និងដៃគូអភិវឌ្ឍន៍នានា ដែលបានចូលរួមសហការគ្នាអនុវត្តការងារពាក់ព័ន្ធពិការភាពនេះ ដោយសម្រេចបាននូវសមិទ្ធផលជាច្រើនគួរជាទីមោទនៈ ។ លោក បានគូសបញ្ជាក់ថា ការប្រារព្ធទិវានាពេលនេះ ពិតជាមានសារៈសំខាន់ណាស់ ពោលគឺបង្ហាញពីការចូលរួមចំណែករបស់រាជរដ្ឋាភិបាលកម្ពុជាក្នុងការលើកកម្ពស់ និងគោរពសិទ្ធជនពិការ ស្របតាមច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ដែលបានដាក់អោយប្រើប្រាស់កាលពីថ្ងៃទី ០៣ ខែកក្កដា ឆ្នាំ២០០៩ ។ លើសពីនេះ គឺបង្ហាញអំពីឆន្ទៈ និងការប្តេជ្ញាចិត្តរបស់រាជរដ្ឋាភិបាល ក្នុងការបន្តកិច្ចការពារ និងលើកកម្ពស់សិទ្ធិជនពិការ ជាពិសេសការប្រកាសឲ្យអនុវត្តទសវត្សរ៍ជនពិការប្រចាំតំបន់អាស៊ី និងប៉ាស៊ីហ្វិក ឆ្នាំ២០១៣-២០២២ យុទ្ធសាស្ត្រអ៊ីនឈាន់ “ ធ្វើឲ្យសិទ្ធិក្លាយជាការពិត “ ៕
ចែករំលែកព័តមាននេះ