ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា ដោយសារតែភ្លើងប្រចណ្ឌ ធ្វើឱ្យខាងប្រុសខឹងជាមួយនឹងខាងស្រីដែលបានសែនព្រេនជាមួយគ្នា ហើយខាងស្រីបានចូលទៅផឹកស៊ីជាមួយប្រុសផ្សេង ក៏ធ្វើឱ្យខាងប្រុសខឹងរួចទៅយកកាំបិតចាក់ចំនារីរងគ្រោះអស់ជាច្រើនកន្លែង បណ្តាលឱ្យដួលបាត់បង់ជីវិតនៅក្នុងថ្លុកឈាមតែម្តង រួចជនសង្ស័យក៏បានជិះម៉ូតូសំដៅទៅប៉ុស្តិ៍នគរបាលរដ្ឋបាលអំពៅព្រៃ ដើម្បីចូលទៅសារភាពប្រាប់សមត្ថកិច្ចនូវទោសកំហុសរបស់ខ្លួនផងដែរ ។
ហេតុការណ៍បង្កឱ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ នាថ្ងៃទី១ ខែតុលា ឆ្នាំ២០២០ នៅចំណុចផ្លូវលេខ២១៥ ស្ថិតក្នុងភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល។
សេចក្តីរាយការណ៍បន្តថា ជនរងគ្រោះឈ្មោះកៅ ស្រីកែវ ភេទស្រី អាយុ២៧ឆ្នាំ មានទីលំនៅក្នុងភូមិកំពង់ពោធិ៍ ឃុំក្រាំងយ៉ូវ ស្រុកស្អាង ខេត្តកណ្តាល មុខរបរនៅផ្ទះ ។ ចំណែកជនសង្ស័យឈ្មោះ សុខ សោភ័ណ្ឌ ភេទប្រុស អាយុ៣៨ឆ្នាំ មានទីលំនៅភូមិជើងព្រៃ២ ឃុំអំពៅព្រៃ ស្រុកកណ្តាលស្ទឹងខេត្តកណ្តាល មុខរបរកសិករ។
បើតាមលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់ឱ្យដឹងថា ៖ មុនពេលកើតហេតុ ជនរងគ្រោះ និងជនសង្ស័យបានទំនាក់ទំនងស្រឡាញ់គ្នាអស់រយ:ពេលប្រហែល៨ខែមកហើយ ដោយបានរៀបចំសែនព្រេនចាស់ទុំបងប្អូនខាងស្រី (ជនរងគ្រោះ) បានដឹងឮ។
លោកអធិការនគរបាលក្រុងតាខ្មៅបន្តថា ក្រោយមកទាំងពីរនាក់បានមកជួលបន្ទប់ស្នាក់នៅក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ដើម្បីស្នាក់នៅជាមួយគ្នាម្តងម្កាល ដោយភាគីខាងប្រុសមានប្រពន្ធកូនរួចហើយនៅឯភូមិជើងព្រៃ ។ ក្នុងការស្នាក់នៅជាមួយគ្នានេះ ភាគីខាងប្រុស (ជនសង្ស័យ) មានការប្រចាន់ទៅខាងស្រី (ជនរងគ្រោះ) ព្រោះតែមានការសង្ស័យថា នាងមានប្រុសថ្មីទៀត។
ប្រភពដដែលបន្តថា លុះដល់ថ្ងៃកើតហេតុ ពេលភាគីខាងប្រុសមកដេកនៅបន្ទប់ជួល ភាគីខាងស្រីចេះតែដេញឱ្យទៅផ្ទះខុសប្លែកពីសព្វដងធ្វើឱ្យជនសង្ស័យកាន់តែសង្ស័យខ្លាំងឡើងៗ ទើបមិនព្រមទៅផ្ទះនៅភូមិជើងព្រៃទេ គឺនៅចាំឃ្លាំមើល បន្ទាប់មកជនរងគ្រោះបានប្រាប់ឱ្យជនសង្ស័យឌុបទៅសួរសុខទុក្ខអ្នកនៅបន្ទប់ជួលជិតគ្នាដែលឆ្លងទន្លេនៅគ្លីនីក លុះពេលមកដល់ពេទ្យ ជនរងគ្រោះដេញជនសង្ស័យឱ្យទៅផ្ទះទៀត។
ប្រភពដដែលបន្តទៀតថា ប៉ុន្តែពេលនោះជនសង្ស័យមិនទៅនោះទេ គឺនៅចាំតាមឃ្លាំមើលនៅជិតនោះដដែល លុះមួយសន្ទុះក្រោយមកស្រាប់តែឃើញជនរងគ្រោះដើរចេញពីគ្លីនិកបណ្តើរ និយាយទូរស័ព្ទបណ្តើរ រួចឡើងជិះម៉ូតូឌុបឆ្ពោះទៅកន្លែងកើតហេតុ ទើបជនសង្ស័យជិះម៉ូតូតាមដានពីក្រោយ រហូតដល់កន្លែងកើតហេតុក៏ឃើញជនរងគ្រោះចូលទៅក្នុងផ្ទះឈើមួយមានមនុស្សប្រុសពីរទៅបីនាក់កំពុងផឹកស៊ីនៅក្រោមសំយ៉ាបមុខផ្ទះ ។
ប្រភពដដែលបន្តថា ពេលនោះជនរងគ្រោះបានអង្គុយផឹកស៊ីជាមួយគេដែរ ដោយឃើញដូចនេះជនសង្ស័យបានចូលទៅហៅជនរងគ្រោះឱ្យចេញទៅផ្ទះវិញ តែជនរងគ្រោះមិនព្រមចេញ ទើបធ្វើឱ្យជនសង្ស័យកាន់តែខឹងខ្លាំងឡើងៗ ស្របពេលនោះឃើញកូនកាំបិតនៅលើតុ ក៏បានយកដាក់ចូលហោប៉ៅខោ រួចនាំជនរងគ្រោះចេញមកក្រៅឱ្យឡើងជិះម៉ូតូជាមួយ តែជនរងគ្រោះមិនព្រមជិះទេ សុខចិត្តដើរ ។
ប្រភពដដែលបន្តទៀតថា ចំណែកឯជនសង្ស័យបានជិះតាមពីក្រោយរហូតដល់កន្លែងកើតហេតុខាងលើ ក៏មានការប្រទាញប្រទង់គ្នា បណ្តាលឱ្យជនសង្ស័យខឹងក៏យកកូនកាំបិតចុងស្រួចចាក់ទៅលើជនរងគ្រោះមួយកាំបិតចំលើដងកាំបិតខាងស្តាំធ្វើឱ្យជនរងគ្រោះដួលផ្កាប់មុខទៅលើថ្នល់តែម្តង។ ភ្លាមៗនោះជនសង្ស័យបានចាក់បន្ថែមចំនួន២កាំបិតទៀត ដោយ១កាំបិតចំខ្នង និង១កាំបិតទៀតកញ្ចឹង.ក រួចហើយជនសង្ស័យក៏បានជិះម៉ូតូសំដៅទៅប៉ុស្តិ៍នគរបាលរដ្ឋបាលអំពៅព្រៃ ដើម្បីចូលទៅសារភាពប្រាប់សមត្ថកិច្ចនូវទោសកំហុសរបស់ខ្លួនតែម្តង។
បន្ទាប់មកជនសង្ស័យត្រូវបានឃាត់ខ្លួន រួចបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងតាមនីតិវិធី។
ចែករំលែកព័តមាននេះ