ក្រុងប៉ោយប៉ែត ៖ នៅវេលាម៉ោង៣ និង៣០នាទីរសៀលថ្ងៃទី២៨ កុម្ភៈ មានកម្មករអូសរទេះដឹកត្រីមួយក្រុមប្រហែល៤០នាក់បាននាំគ្នាមកតវ៉ាដល់សាលាក្រុងប៉ោយប៉ែតសុំមិនចូលចំណតរបស់ក្រុមហ៊ុននាំត្រីមួយកន្លែង ដោយសុំលើកដាក់ត្រីមុននាំចេញទៅទឹកដីថៃនៅកន្លែងដើមវិញ ។ កម្មករដែលនាំគ្នាមកតវ៉ានេះមួយចំនួនជាជនពិការ ហើយអះអាងថា ពួកគាត់ស្ថិតក្នុងសមាគមកម្មករអូសរទេះជនពិការ ។
ក្រុមកម្មករទាំងនេះនិយាយថា ហេតុដែលពួកគាត់នាំគ្នាមកតវ៉ាដល់សាលាក្រុងនេះ ព្រោះតែកាលពីវេលាម៉ោងប្រហែល៩ព្រឹកថ្ងៃទី២៨ កុម្ភៈ នោះលោកអាន វណ្ណៈ អភិបាលរងក្រុងបានទៅហាមឃាត់ពួកគាត់មិនឱ្យផ្ទេរ ឬលើកត្រីពីរថយន្តនៅចំណុចដែលពួកគាត់ធ្លាប់រកស៊ីជាយូរមកហើយនៅខាងលិចផ្សារ ស្ថិតក្នុងភូមិក្បាលស្ពាន សង្កាត់ប៉ោយប៉ែត ។ កន្លែងដែលពួកគាត់លើកដាក់ត្រីពីរថយន្តផ្ទេរទៅរទេះមុននាំចេញទៅទឹកដីថៃនោះគឺមានទីធ្លាធំទូលាយ ហើយក៏មិនប៉ះពាល់ដល់ផ្លូវសាធារណៈដែរ ផ្ទុយទៅវិញ អាជ្ញាធរក្រុមបានតម្រូវឱ្យពួកគាត់នាំត្រីទៅផ្ទេរនៅចំណតក្រុមហ៊ុនថូគឹមស្រ៊ាង ដែលមានចម្ងាយពីដងផ្លូវជាតិជិត១០០ម៉ែត្រ ។
បើតាមបុរសឈ្មោះភា សាអែម អាយុ៥៦ឆ្នាំ តំណាងឱ្យក្រុមកម្មករអូសរទេះ ជនពិការថា គោលបំណងដែលពួកគាត់នាំគ្នាមកតវ៉ាដល់សាលាក្រុងនេះ គឺស្នើសុំលើកដាក់ត្រីមុននាំចេញទៅថៃនៅកន្លែងដើមមិនប្តូរទៅកន្លែងផ្សេង និយាយរួមគឺមិនចូលទៅចំណតផ្ទេរត្រីរបស់ក្រុមហ៊ុនថូ គឹមស្រ៊ាង ទេ ព្រោះក្រុមកម្មករអូសរទេះជនពិការនេះបានទិញច្បាប់នាំត្រីចេញពីក្រុមហ៊ុនហុក ជ្រា រួចហើយ ។ ឯចំពោះការចូលទៅចំណតដែលអាជ្ញាធរតម្រូវឱ្យចូលនោះត្រូវគេតម្រូវឱ្យបង់លុយសម្រាប់ការនាំត្រីចេញ ទើបក្រុមកម្មកររបស់ពួកគាត់មិនព្រមចូល ។ ម្យ៉ាងទៀតការចូលទៅចំណតផ្ទេរត្រីរបស់ក្រុមហ៊ុនខាងលើ គឺគេតម្រូវឱ្យអូសតាមរទេះធំៗរបស់ក្រុមហ៊ុន ម៉្លោះហើយកម្មករទាំងអស់ប្រាកដជាដាច់បាយ ទើបមិនព្រមចូលតាមការទាមទាររបស់សាលាក្រុងនោះ ។
ការតវ៉ានេះបើតាមការឱ្យដឹងពីកម្មករថា មិនមែនគ្រាន់តែសុំមិនចូលចំណតរបស់ក្រុមហ៊ុនថូ គឹមស្រ៊ាងប៉ុណ្ណោះទេ គឺតវ៉ាតាំងពីបញ្ហាវេចខ្ចប់ផងដែរ ដោយសារការវេចខ្ចប់មិនអាចធ្វើបាន១០០%ទេ គឺអាចជួយបានត្រឹម៦០ ទៅ៧០%ប៉ុណ្ណោះ ព្រោះត្រីដែលនាំចេញគឺដាក់ទឹកកកម៉្លោះហើយតែងមានសំណើមពីទឹកកក ទើបមានការស្រក់ទឹកតាមដងផ្លូវ ។ នៅល្ងាចថ្ងៃទី២៨ កុម្ភៈ លោកអាន វណ្ណៈ អភិបាលរងក្រុងពុំអាចទាក់ទងសុំការបំភ្លឺបានទេ ដោយទូរស័ព្ទរបស់លោកចុចចូលគ្មានអ្នកទទួល ៕
ចែករំលែកព័តមាននេះ