ប្រទេសជប៉ុន ៖ នៅក្នុងអំឡុងនៃសន្និសីទពិភពលោកលើកទី៣របស់អង្គការសហប្រជាជាតិស្តីពីការកាត់បន្ថយហានិភ័យគ្រោះមហន្តរាយដែលប្រារព្ធធ្វើនៅទីក្រុងសេនដាយកាលពីថ្ងៃទី១៤ដល់ថ្ងៃទី១៨
ប្រទេសជប៉ុន ៖ នៅក្នុងអំឡុងនៃសន្និសីទពិភពលោកលើកទី៣របស់អង្គការសហប្រជាជាតិស្តីពីការកាត់បន្ថយហានិភ័យគ្រោះមហន្តរាយដែលប្រារព្ធធ្វើនៅទីក្រុងសេនដាយកាលពីថ្ងៃទី១៤ដល់ថ្ងៃទី១៨ មីនា ២០១៥ នៅសារមន្ទីរទីក្រុងសេនដាយក៏មានរៀបចំពិព័រណ៍ផលិតផលប្រពៃណី វប្បធម៌ជប៉ុនផងដែរ ក្នុងគោលបំណងផ្សព្វផ្សាយឲ្យពិភពលោកបានដឹង វប្បធម៌ អក្សរសាស្ត្រ សម្លៀកបំពាក់ប្រពៃណី ជាពិសេសគឺទំនៀមទម្លាប់នៃការឆុងតែបៃតងរបស់ជនជាតិជប៉ុន ។
តាមរយៈអ្នកបកប្រែលោកស្រី Miyako Tannowa ឲ្យដឹងថា តែបៃតងបានដិតជាប់ក្នុងផ្នត់គំនិតប្រជាជនជប៉ុនអស់រយៈពេលជាយូរមកហើយ និងត្រូវបានគេស្គាល់ថា «តែបៃតងជប៉ុន» ។ តែបៃតងជប៉ុនមិនគ្រាន់តែជាភេសជ្ជៈសម្រាប់បំបាត់ការស្រេកទឹកប៉ុណ្ណោះទេ តែបានក្លាយជាទំនៀមទម្លាប់ក្នុងជីវិតរស់នៅប្រចាំថ្ងៃរបស់ជនជាតិជប៉ុនទៅហើយ។ ជាទូទៅជនជាតិជប៉ុនពិសាតែបៃតងនៅពេលព្រឹកក្រោយពេលក្រោកពីដំណេក បន្ទាប់ពីសម្រាក់ពេលថ្ងៃត្រង់ និងសម្រាប់ទទួលរាក់ទាក់ភ្ញៀវ ។ ជនជាតិជប៉ុនភាគច្រើនតែងតែពិសាតែបៃតងជាប្រចាំ សូម្បីតែនៅសណ្ឋាគារ ភោជនីយដ្ឋាន ឬក្នុងការិយាល័យធ្វើការ ក៏មានប៉ាន់តែ និងបំពង់ទឹកក្ដៅសម្រាប់ឆុងជាប្រចាំ ។
តែបៃតងជប៉ុន មានច្រើនប្រភេទដូចជា តែបៃតងRyokucha តែបៃតង Matcha តែបៃតង Konacha តែបៃតង Hojicha និងតែបៃតងGenmaichaជាដើម ។ តែបៃតងជប៉ុនមានក្លិន និងរសជាតិ ផ្សេងៗគ្នា ដែលត្រូវបានគេចាត់ថ្នាក់ទៅតាមគុណភាព និងតំបន់ដាំដុះ ក៏ដូចជាដំណើរការនៃការផលិត ។ ទោះបីជាបែបណាក្តី តែបៃតងដែលល្អបំផុត ដាំដុះនៅតំបន់ Yam ខេត្ត Fukuoka និងតំបន់ Uji ខេត្តក្យូតូ ប្រទេសជប៉ុន ដោយផលិតតែបៃតងតាំងពី៤០០ឆ្នាំមុននៃកកើតរចនាសម្ព័ន្ធខេត្តទាំងនោះមកម្ល៉េះ ។
ប្រវត្តិនៃការតែបៃតងជប៉ុន គឺបាននាំមកពីប្រទេសចិន ដោយលោកអាចារ្យ Myoan Eisai ជាអ្នកកាន់សាសនាព្រះពុទ្ធ នៅក្នុងអំឡុងឆ្នាំ១១៩១ ។ ក្រោយមកលោក អាចារ្យបានប្រគល់ពូជតែនេះទៅឲ្យលោកអាចារ្យម្នាក់ទៀតឈ្មោះ Myoe Shopin និងបានដាំនៅតំបន់ Uji ខេត្តក្យូតូ ប្រទេសជប៉ុនតរៀងមកដល់សព្វថ្ងៃ ។
នៅក្នុងសៀវភៅដែលមាន២ភាគ ចងក្រង និងសរសេរដោយលោកអាចារ្យ Myoan Eisai បានចាប់ផ្ដើមឡើងដោយពាក្យថា « តែជាឱសថសម្រាប់ជំនួយផ្លូវចិត្ត និងមានសមត្ថភាពធ្វើឲ្យជីវិតមនុស្សកាន់តែមានន័យ និងពោរពេញដោយភាពស្រស់ស្រាយ »។
បច្ចុប្បន្នតែបៃតងជប៉ុន មិនត្រឹមតែជាភេសជ្ជៈទំនៀមទម្លាប់ក្នុងជីវិតប្រចាំថ្ងៃរបស់ជនជាតិជប៉ុនប៉ុណ្ណោះទេ តែបានអភិវឌ្ឍន៍ជាតែបៃតងដប និងកញ្ចប់សម្រាប់នាំចេញដ៏ពេញនិយមលក់នៅលើទីផ្សារទូទាំងសាកលោកទៀតផង ដោយសារវាមានភាពងាយស្រួលផឹក និងយកតាមខ្លួន ជាពិសេសគឺផឹកដើម្បីថែរក្សាសុខភាព ៕
ចែករំលែកព័តមាននេះ