ខេត្តសៀមរាប ៖ ផ្ទះប្រជាពលរដ្ឋមួយខ្នងមានទំហំ៧ម៉ែត្រគុណនឹង១២ម៉ែត្រសង់អំពីឈើលើ ថ្មក្រោម ប្រក់ដំបូលក្បឿង និងទ្រព្យសម្បត្តិរួមមានប្រាក់៥០០០ដុល្លារ ប្រាក់រៀលចំនួន៣០លានរៀល ព្រមទាំងសម្ភារគ្រឿងសង្ហារឹម និងសម្ភារប្រើប្រាស់មួយចំនួនធំ ត្រូវអគ្គិភ័យឆាបឆេះអស់ទាំងស្រុង តែមិនបានឆេះរាលដាលដល់ផ្ទះអ្នកជិតខាង និងពុំបណ្តាលឱ្យមនុស្សណាម្នាក់រងគ្រោះថ្នាក់ឡើយ ។
ហេតុការណ៍ខាងលើនោះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៩និង ៣០នាទីព្រឹកថ្ងៃទី៣០ ខែកញ្ញា ឆ្នាំ២០ ២០ ស្ថិតនៅក្នុងភូមិបេង ឃុំជីក្រែង ស្រុកជីក្រែង ខេត្តសៀមរាប។
ម្ចាស់ផ្ទះរងគ្រោះខាងលើឈ្មោះ បូ វុទ្ឋី ភេទប្រុស អាយុ៥១ឆ្នាំ រស់នៅក្នុងភូមិឃុំកើតហេតុខាងលើ។
បើតាមសមត្ថកិច្ចមូលដ្ឋានបានឱ្យដឹងថា ករណីអគ្គិភ័យឆាបឆេះផ្ទះប្រជាពលរដ្ឋមួយខ្នងខាងលើនោះ គឺបណ្តាលមកពីឆ្លងចរន្តអគ្គិសនី ហើយធ្លាក់កម្ទេចផ្កាភ្លើងមកឆាបឆេះដល់ធុងហ្គាស បណ្តាលឱ្យឆេះរាលដាលដល់ផ្ទះទាំងមូលតែម្តង។
នៅក្នុងហេតុការណ៍ខាងលើនេះ កម្លាំងជំនាញនៃអធិការដ្ឋាននគរបាលស្រុក យករថយន្តពន្លត់អគ្គីភ័យចំនួន១គ្រឿង មកជួយអន្តរាគមន៍បាញ់ទឹកពន្លត់ ក្នុងនោះប្រើប្រាស់ទឹកអស់ចំនួន៣គ្រឿង ទើបភ្លើងរលត់ទៅវិញ ប៉ុន្តែផ្ទះទាំងមូលត្រូវភ្លើងឆាបឆេះអស់ទាំងស្រុង តែមិនមានប៉ះពាល់ដល់អាយុជីវិតប្រជាពលរដ្ឋណាម្នាក់ ឬឆេះឆ្លងរាលដាលដល់ផ្ទះអ្នកជិតខាងឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ