ក្រុងបាដាដប្រកាសកាលពីថ្ងៃទី៣១មីនាពីការរំដោះទីក្រុងទីគ្រីតពីកណ្តាប់ដៃក្រុមរដ្ឋអ៊ិស្លាមតែយោងតាមក្រុមចម្រុះអន្តរជាតិដែលជួយទ្រទ្រង់តាមអាកាសសម្រាប់ការវាយលុកលើទីក្រុងនេះចាប់តាំងពី១ខែមកហើយនិយាយថា ពួករដ្ឋអ៊ិស្លាមនៅមានទីតាំងមួយចំនួនក្នុងទីក្រុងនោះនៅឡើយ ។
ការវាយលុករំដោះក្រុងទីគ្រីតជាការវាយលុកយ៉ាងធំបំផុតរបស់ក្រុងបាដាដប្រឆាំងពួកជីហាដ ប្រមូលផ្តុំទាហាន ប៉ូលិស និងពួកជីវពលជាច្រើនម៉ឺននាក់ ។
ប្រទេសអីុរ៉ង់និងសហរដ្ឋអាមេរិកក៏ចូលរួមដៃក្នុងយុទ្ធនាការវាយរំដោះទីក្រុងទីគ្រីតដែលពួករដ្ឋអ៊ិស្លាមដណ្តើមកាន់កាប់ពីថ្ងៃទី១១ មិថុនាមកដែរទោះបីប្រទេសទាំង២ជាច្រើនលើកប្រកាសថា ពុំបានចូលរួមដៃក្នុងការប្រយុទ្ធក្តី ។
ក្នុងសារមួយផ្សាយតាម TWITTER ប្រមុខរដ្ឋាភិបាលអីុរ៉ាក់លោកហៃអីុឌ័រអាល់ អាបាឌី ប្រកាសពីការរំដោះទីក្រុងទីគ្រីត ហើយសរសើរដល់កងកម្លាំងសន្តិសុខអីុរ៉ាក់និងពួកអ្នកស្ម័គ្រចិត្តចំពោះការសម្រេចដំណាក់កាលដ៏ចម្បងនេះ ។
ទោះបីបែបនោះភ្លាមៗក្រោយការប្រកាសនេះវរសេនីយ៍ទោ KIM MICHELS អ្នកនាំពាក្យរបស់ក្រុមចម្រុះអន្តរជាតិអះអាងថា តំបន់មួយចំនួននៃក្រុងទីគ្រីតស្ថិតក្រោមការត្រួតត្រារបស់ពួករដ្ឋអ៊ិស្លាមនៅឡើយរួចនៅមានការងារច្រើនទៀតត្រូវធ្វើ ។
ចំណែកអ្នកនាំពាក្យរបស់ប្រមុខរដ្ឋាភិបាលអុីរ៉ាក់អះអាងថា កងកម្លាំងអីុរ៉ាក់បានលុកចូលដល់កណ្តាលក្រុងយកទង់របស់ក្រុមរដ្ឋអ៊ិស្លាមចេញ ហើយពេលនេះកំពុងឈរជើងពិតប្រាកដនៅទីគ្រីត ។ ទង់ជាតិអីុរ៉ាក់ត្រូវបានលើកជាថ្មី នៅតាមអគារជាច្រើននៃទីក្រុងមានពួកស៊ុននីតភាគច្រើននោះ ៕
ចែករំលែកព័តមាននេះ