ខេត្តកណ្តាល ៖ បុរសម្នាក់ត្រូវបានសមត្ថកិច្ចក្រុងតាខ្មៅឃាត់ខ្លួន ដោយយោងតាមពាក្យបណ្តឹងរបស់ជនរងគ្រោះថា បានដាល់គាត់ចំនួន២ដៃ បណ្តាលអោយឈាមច្រមុះ និងជាំក្រោមភ្នែក ដោយសារជនសង្ស័យប្រច័ណ្ឌប្រពន្ធជាមួយជនរងគ្រោះ ។ ហេតុការណ៌ខាងលើនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី២៩…
ខេត្តកណ្តាល ៖ បុរសម្នាក់ត្រូវបានសមត្ថកិច្ចក្រុងតាខ្មៅឃាត់ខ្លួន ដោយយោងតាមពាក្យបណ្តឹងរបស់ជនរងគ្រោះថា បានដាល់គាត់ចំនួន២ដៃ បណ្តាលអោយឈាមច្រមុះ និងជាំក្រោមភ្នែក ដោយសារជនសង្ស័យប្រច័ណ្ឌប្រពន្ធជាមួយជនរងគ្រោះ ។
ហេតុការណ៌ខាងលើនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី២៩ ខែកញ្ញា ឆ្នាំ២០២០ ចំណុចផ្លូវលំ ភូមិក្បាលកោះ សង្កាត់កោះអន្លង់ចិន ក្រុងតាខ្មៅ ខេត្តកណ្តាល។
ជនរងគ្រោះឈ្មោះលួត សុខរស់ ភេទប្រុស អាយុ២៦ឆ្នាំ មុខរបរកសិករ ។ ចំណែកជនសង្ស័យឈ្មោះសឿន ច្រូច ភេទប្រុស អាយុ៣២ឆ្នាំ មុខរបរមិនពិតប្រាកដ ។ អ្នកទាំង២រស់នៅភូមិឃុំកើតហេតុខាងលើ ។
សមត្ថកិច្ចបានអោយដឹងថា មុនពេលកើតហេតុ នៅពេលដែលជនរងគ្រោះកំពុងតែជិះកង់តែម្នាក់ឯង ពេលនោះស្រាប់តែឃើញជនសង្ស័យជិះកង់បញ្ច្រាសទិសគ្នាមកពីមុខ លុះមកដល់ទន្ទឹមគ្នា ក៏បានធ្វើសកម្មភាពដាល់មុខជនរងគ្រោះចំនួន២ដៃ បណ្តាលអោយហូរឈាមច្រមុះនិងជាំក្រោមភ្នែកខាងឆ្វេងដោយសាររឿងប្រច័ណ្ឌប្រពន្ធរបស់ខ្លួនជាមួយជនរងគ្រោះ រួចហើយជនសង្ស័យជិះកង់គេចខ្លួនបាត់ទៅ។
ក្រោយពេលកើតហេត ជនរងគ្រោះបានមកប្តឹងសមត្ថកិច្ចប៉ុស្តិ៍កោះអន្លង់ចិនឱ្យជួយធ្វើការស្រាវជ្រាវឃាត់ខ្លួនជនសង្ស័យបញ្ជូនមកកាន់អធិការដ្ឋាននគរបាលក្រុងតាខ្មៅដើម្បីធ្វើការសាកសួរនិងកសាងសំណុំរឿងតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ