ខេត្តមណ្ឌលគិរី ៖ មេឈ្មួញស្រីប្រុសចំនួន២នាក់ជួញដូរគ្រឿងញៀន ត្រូវនគរបាលឃាត់ខ្លួនបានហើយ ព្រមទាំងឆែកឆេរក្នុងម៉ូតូ និងបន្ទប់ជួលរបស់ជនសង្ស័យផងដែរ កាលពីម៉ោង៦ល្ងាច ថ្ងៃទី៣០ ខែកញ្ញា ឆ្នាំ២០២០…
ខេត្តមណ្ឌលគិរី ៖ មេឈ្មួញស្រីប្រុសចំនួន២នាក់ជួញដូរគ្រឿងញៀន ត្រូវនគរបាលឃាត់ខ្លួនបានហើយ ព្រមទាំងឆែកឆេរក្នុងម៉ូតូ និងបន្ទប់ជួលរបស់ជនសង្ស័យផងដែរ កាលពីម៉ោង៦ល្ងាច ថ្ងៃទី៣០ ខែកញ្ញា ឆ្នាំ២០២០ នៅចំណុចផ្ទះជួល ស្ថិតក្នុងភូមិចំការតែ សង្កាត់ស្ពានមានជយ័ ក្រុងសែនមនោរម្យ ខេត្តមណ្ឌលគិរី។
ប្រតិបត្តិការខាងលើនេះ ដឹកនាំកម្លាំងផ្នែកជំនាញការិយាលយ័ប្រឆាំងគ្រឿងញៀនសហការជាមួយកម្លាំងនៃអធិការដ្ឋាននគរបាលក្រុងសែនមនោរម្យ និងកម្លាំងប៉ុស្ដិ៍នគរបាលរដ្ឋបាលស្ពានមានជ័យ ដឹកនាំដោយលោកឧត្តមសេនីយ៍ត្រី ស៊ុម សោភ័ណ្ឌ ស្នងការរងទទួលផែនការងារប្រឆាំងគ្រឿងញៀន បានចុះបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន ដោយមានការសម្របសម្រួលពីលោក ម៉ម វ៉ាន់ដា ព្រះរាជអាជ្ញារងអមសាលាដំបូងខេត្ត នៅចំណុចផ្ទះជួល ស្ថិតក្នុងភូមិចំការតែ សង្កាត់ស្ពានមានជយ័ ក្រុងសែនមនោរម្យ ខេត្តមណ្ឌលគិរី និងបានធ្វើការឃាត់ខ្លួនជនសង្ស័យ២នាក់ ព្រមទាំងឆែកឆេរក្នុងម៉ូតូ និងបន្ទប់ជួលរបស់ជនសង្ស័យផងដែរ ។
ជនសង្ស័យខាងលើ ១- ឈ្មោះ ដា រី ហៅម៉ាប់ ភេទប្រុស អាយុ៣២ឆ្នាំ ជនជាតិខ្មែរឥស្លាម មុខរបរមិនពិតប្រាកដ មានស្រុកកំណើតភូមិព្រែកទន្លាប់ ឃុំព្រែកទន្លាប់ ស្រុកកណ្ដាលស្ទឹង ខេត្តកណ្ដាល បច្ចុប្បន្នស្នាក់នៅភូមិចំការតែ សង្កាត់ស្ពានមានជ័យ ក្រុងសែនមនោរម្យ និង២-ឈ្មោះ ជា ផាលីណែត ភេទស្រី អាយុ ២៥ឆ្នាំ ជនជាតិខ្មែរ មុខរបរមិនពិតប្រាកដ មានស្រុកកំណើតនៅភូមិអូរបែកក្អម សង្កាត់ទឹកល្អក់២ ខណ្ឌទួលគោក ទីលំនៅបច្ចុប្បន្នភូមិចំការតែ សង្កាត់ស្ពានមានជ័យ ក្រុងសែនមនោរម្យ ។
ក្នុងប្រតិបត្តិការបង្ក្រាបគ្រឿងញៀនខាងលើនេះ សមត្ថកិច្ចបានរកឃើញសម្ភារៈ និងវត្ថុតាងសារធាតុសង្ស័យថា ជាសារធាតុញៀនមានសណ្ឋានជាក្រាមពណ៌សថ្លា (ម៉ាកទឹកកក) ចំនួន២២កញ្ចប់ ក្នុង៦កញ្ចប់ធំ; ៧កញ្ចប់ធំល្មម និង៩កញ្ចប់តូច (មិនទាន់ថ្លឹង)។
ចំណែកឧបករណ៍ និងសម្ភារៈ ព្រមទាំងមធ្យោបាយ ដែលដកហូតបានមាន ១- អាវុធចំនួន១ដើមម៉ាក់ G19 AUSTRIA WET 5168 ផលិតនៅតៃវ៉ាន់ ( ប្រើហ្គាសបាញ់គ្រាប់កង់ ) ២-ទូរស័ព្ទដៃចំនួន២គ្រឿង, ៣- ដែកកេសចំនួន៨, ៤-កាបូបចំនួន២, ៥- អត្តសញ្ញាណបណ្ណ័សញ្ជាតិខ្មែរចំនួន២សន្លឹក, ៦-ប័ណ្ណសំគាល់យានយន្តចំនួន១សន្លឹក, ៧- ដបសម្រាប់ជក់ថ្នាំញៀនចំនួន៣, ៨-កែវសម្រាប់ជក់ថ្នាំញៀនចំនួន៦, ៩-ថង់សម្រាប់វេចខ្ចប់ និងទុយោមួយចំនួនធំ, ១០- ប្រាក់រៀលចំនួន១៣៩,៥០០រៀល, ១១-ម៉ូតូចំនួន២គ្រឿង ( ម៉ាក KTM DUKE 200 ១គ្រឿង ស្លាកលេខភ្នំពេញ 1 CS–1228 ; និងម៉ាក TODAY ១គ្រឿង គ្មានស្លាកលេខ) ។
បច្ចុប្បន្នជនសង្ស័យទាំង២នាក់ ព្រមទាំងសម្ភារៈ និងមធ្យោបាយទាំងអស់ត្រូវបានកម្លាំងជំនាញប្រឆាំងគ្រឿងញៀនខេត្ត និងកម្លាំងអធិការដ្ឋាននគរបាលក្រុងសែនមនោរម្យ កំពុងថែរក្សា និងកសាងសំណុំរឿង ដើម្បីចាត់ការតាមនីតិវិធីច្បាប់ហើយ៕
ចែករំលែកព័តមាននេះ