ខេត្តកំពត ៖ ពលរដ្ឋជាច្រើនគ្រួសារដែលងាយរងគ្រោះក្នុងសម័យកូវីដ១៩ ដែលមានប័ណ្ណក្រប្រភេទ១ និងប្រភេទ២ បាននាំគ្នាមកពីភូមិផ្សេងៗ ក្នុងឃុំត្រពាំងភ្លាំង ស្រុកឈូក ខេត្តកំពត កាលពីព្រឹកថ្ងៃទី២៩…
ខេត្តកំពត ៖ ពលរដ្ឋជាច្រើនគ្រួសារដែលងាយរងគ្រោះក្នុងសម័យកូវីដ១៩ ដែលមានប័ណ្ណក្រប្រភេទ១ និងប្រភេទ២ បាននាំគ្នាមកពីភូមិផ្សេងៗ ក្នុងឃុំត្រពាំងភ្លាំង ស្រុកឈូក ខេត្តកំពត កាលពីព្រឹកថ្ងៃទី២៩ ខែកញ្ញា ២០២០ ដើម្បីសុំឱ្យអាជ្ញាធរឃុំត្រពាំងភ្លាំង ជួយដល់ពួកគាត់ ខណៈពេលដែលពួកគាត់បានប័ណ្ណក្រីក្រ ដែលអាជ្ញាធរទទួលដឹងឮថាគ្រួសារគាត់ក្រីក្រហើយ ពេលទៅបើកលុយនៅធនាគារឯកជនជាច្រើនដង គេមិនបើកលុយឱ្យទេ ។
ស្ត្រីម្នាក់ឈ្មោះ ប៉ាក់ ពៅ អាយុ៥៤ឆាំ្ន មកពីភូមិព្រៃពាយ ឃុំត្រពាំងភ្លាំង បាននិយាយកាលពីព្រឹកថ្ងៃទី២៩ ខែកញ្ញានេះថា គាត់មានប័ណ្ណក្រីក្រប្រភេទ១ ពេលទៅបើកលុយពីធនាគារឯកជន ដែលនៅជិតផ្ទះគាត់ជាច្រើនដងនៅតែបើកមិនបាន ។ គាត់និយាយរៀបរាប់ថា គាត់ពិតជាក្រីក្រណាស់មានទាំងប័ណ្ណហើយបើកលុយមិនបាន ។ ស្ត្រីរូបនោះបាននិយាយថាប្ដីរបស់គាត់ត្រូវរន្ទះបាញ់ស្លាប់ កាលពីឆ្នាំមុន ហើយឆាំ្នបន្ទាប់មកទៀតគាត់ក៏ត្រូវពស់ចឹកបន្តទៀតតែមិនស្លាប់ ។
ប្រជាពលរដ្ឋម្នាក់ទៀតឈ្មោះ ផាន់ ស៊ន នៅភូមិព្រៃពាយ ឃុំត្រពាំងភ្លាំង មានប័ណ្ណសមធម៌របស់រាជរដ្ឋាភិបាលដែរ ហើយអាជ្ញាធរមូលដ្ឋានក៏បានពិនិត្យនិងទទួលស្គាល់ថា គ្រួសារគាត់ពិតជាក្រីក្រប្រាកដមែន ។ ពលរដ្ឋរូបនោះបាននិយាយរអូ៊រទាំថា ខ្លួនមានតែប័ណ្ណសមធម៌ តែទៅបើកលុយ មិនដែលបាន ទើបមកកាន់សាលាឃុំឱ្យខាងមន្ត្រីឃុំបញ្ជាក់ពីមូលហេតុ ។
មន្ត្រីជំនួយការឱ្យរដ្ឋបាលសាលាឃុំត្រពាំងភ្លាំង លោក ហែម ម័យ និយាយថាប័ណ្ណរបស់ពលរដ្ឋនោះពិតជាអាជ្ញាធរមូលដ្ឋានទទួលស្គាល់ប៉ុន្តែពួកគាត់មានការផ្ទៀងផ្ទាត់សាជាថ្មីជាមួយនិងលេខកូដនៅតាមធនាគារឯកជន ។
លោក ហែម ម័យ និយាយថា លោកនឹងយកបញ្ហានេះទៅដាក់ជួនខាងមន្ទីរជំនាញឱ្យគាត់ជួយចាត់ចែងក្នុងរឿងនេះ ។
ពលរដ្ឋដែលនាំគ្នារកអន្តរាគមន៍ពីអាជ្ញាធរឃុំនេះមានគ្នាប្រមាណ៨០នាក់ ដែលអ្នកខ្លះថាធ្លាប់បើកបាន ខ្លះថាបើកមិនបាន ដោយសារតែបញ្ហាផ្តល់លេខកូដមិនច្បាស់លាស់ ។ តាមមន្ត្រីឃុំថា ពលរដ្ឋមានបញ្ហាតែនៅឃុំត្រពាំងភ្លាំងនេះមួយទេ ក្នុងខេត្តកំពត ៕
ចែករំលែកព័តមាននេះ