ខេត្តព្រះសីហនុ ៖ លោកជាវ វិជ្ជៈ អភិបាលរងខេត្តព្រះសីហនុ ស្នើអោយស្ថាប័ណ្ណជំនាញពាក់ព័ន្ឋផ្នែកគ្រប់គ្រងយានដ្ឋាន ស្រង់ទិន្នន័យអោយបានច្បាស់លាស់ ដោយតម្រូវអោយបិទជាបណ្តោះអាសន្ននូវយានដ្ឋានណាដែលអត់ច្បាប់។
លោកជាវ វិជ្ជៈ អភិបាលរងខេត្តព្រះសីហនុ បានមានប្រសាសន៍បែបនេះ នៅក្នុងកិច្ចប្រជុំពិភាក្សាស្តីអំពីកិច្ចសហការវិធានការទប់ស្កាត់ និងបិទទីតាំងយានដ្ឋានណាដែលពុំមានលិខិតអនុញ្ញាតអោយធ្វើអាជីវកម្មជុសជុលនិងទីតាំងកែច្នៃ ដំឡើងយានយន្តគ្រប់ប្រភេទ ដោយលោកបានស្នើអោយមន្ត្រីពន្យល់អំពីនិតិវិធីច្បាប់ពាក់ព័ន្ឋទៅនឹងការសុំបើកអាជីវកម្ម ដោយតម្រូវអោយគ្រប់យានដ្ឋានទាំងអស់ដែលពុំទាន់មានច្បាប់ត្រូវផ្អាកអាជីវកម្មជាបណ្តោះអាសន្នសិន រហូតមានច្បាប់អនុញ្ញាតធ្វើអាជីវកម្មទើបអាចដំណើរការបានវិញ។
ថ្លែងក្នុងឱកាសនោះផងដែរ លោក នុត លី អនុប្រធានមន្ទីសាធារណការ និងដឹកជញ្ជូនខេត្តព្រះសីហនុ បានអោយដឹងថា នៅខេត្តព្រះសីហនុ ភាគច្រើនជាអាជីវកម្មលក្ខណៈគ្រួសារ (អាជីវកម្មខ្នាតតូច) ប៉ុន្តែក្រុមការងារបានចុះអប់រំណែនាំមួយជំហាន និងបានណែនាំអោយពួកគាត់បានទៅសុំច្បាប់អោយបានត្រឹមត្រូវ ក្នុងនោះដែរ ក្រុមការងារក៏បានធ្វើកិច្ចសន្យាជាមួយយានដ្ឋានចំនួន៩យានដ្ឋានរួចហើយដែរ ។ ដោយឡែកសម្រាប់ខេត្តព្រះសីហនុ ពុំមានយានដ្ឋានកែច្នៃដំឡើងយានយន្តនោះទេ។
ដោយឡែក លោកឧត្តមសេនីយ៍ អី សុខា ស្នងការរងទទួលផែនការសណ្តាប់ធ្នាប់នៃស្នងការដ្ឋាននគរបាលខេត្ត ក៏បានស្នើអោយកិច្ចប្រជុំចាត់វិធានការអោយបានតឹងរឹងបំផុត គ្រប់យានដ្ឋាន ជុសជុលរថយន្ត និងយានដ្ឋានកែច្នៃទាំងអស់ ព្រោះកត្តាទាំងនេះ ក៏ជាចំណែកមួយក្នុងការបង្ករការគ្រោះថ្នាក់ចរាចរណ៍ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ