ខេត្តតាកែវ ៖ បើលោកអ្នកធ្វើដំណើរពី រាជធានីភ្នំពេញតែចំងាយ៧៨គីឡូម៉ែត្រប៉ុណ្ណោះ នឹងចូលដល់ក្រុងដូនកែវ ខេត្តតាកែវ ហើយប្រសិនបើលោកអ្នកចង់រកសេវាកំសាន្តស្នាក់អាស្រ័យ ដើម្បីស្វែងរកកន្លែងកំសាន្តផ្សេងៗនោះ លោកអ្នកអាចទៅរកផ្ទះសំណាក់ល្អៗនិងតម្លៃសមរម្យ រួចព្រឹកឡើងទើបត្រលប់ទៅកាន់លំនៅឋានរបស់លោកអ្នកវិញក៏បាន ។ លោកឥន មណ្ឌល អធិការរងប៉ូលិសក្រុងដូនកែវ បានប្រាប់កោះសន្តិភាពថា ទូទាំងក្រុងដូនកែវ សេវាកម្មផ្ទះសំណាក់មាន២២កន្លែង អត់មានសណ្ឋាគារទេ ហើយសេវាកម្មផ្ទះសំណាក់នេះ នៅមានបើកជាបន្តបន្ទាប់ទៀត ។ ចំពោះផ្ទះសំណាក់ទាំង២២នេះមានពាក់កណ្តាលទើបតែបើកសេវាបំរើអតិថិជននៅឆ្នាំ២០១០នេះឯង និងមានតុបតែងសំភារក្នុងបន្ទប់ទំនើបៗថែមទៀតផង ។
បន្ទប់ដែលប្រើកង្ហារតំលៃ៥ដុល្លារ ក្នុងមួយយប់ បន្ទប់ដែលប្រើម៉ាស៊ីនត្រជាក់មួយយប់១០ដុល្លារ បន្ទប់នីមួយៗមានភាពទូលាយ តែគេទទួលស្គាល់ផងដែរថា ផ្ទះសំណាក់មួយចំនួនដែលបំរើសេវាកម្មរាល់ថ្ងៃនេះក្នុងបន្ទប់នីមួយៗក៏មិនសូវមានសំភារទំនើបប៉ុន្មានដែរ ។ មន្ត្រីសាលាខេត្តតាកែវម្នាក់បានឱ្យដឹងថា ចំពោះស្រុកឯទៀតៗដូចជា ស្រុកត្រាំកក់ មានបំរើសេវាកម្មផ្ទះសំណាក់៥កន្លែង គឺនៅឃុំអង្គតាសោម ស្រុកអង្គរបុរី មានសេវាកម្មផ្ទះសំណាក់១កន្លែងនៅផ្សារអង្គរបុរី និងស្រុកគិរីវង់មាន៣កន្លែង ។ សេវាកម្មផ្ទះសំណាក់នៅក្នុងខេត្តតាកែវ ភាគច្រើនមានតំលៃសមរម្យមិនថ្លៃដូចនៅតាមបណ្តាខេត្តផ្សេងៗ ដែលមានតំបន់ទេសចរណ៍សំខាន់ៗនោះទេ ៕
ចែករំលែកព័តមាននេះ