ខេត្តសៀមរាប ៖ ក្មេងទំនើង២ក្រុមកាប់ចាក់គ្នានៅកណ្តាលក្រុងសៀមរាប បង្កឱ្យមានការភ្ញាក់ផ្អើលពេញក្រុង បណ្តាលឱ្យអ្នកចាញ់ដេកពេទ្យ ចំណែកអ្នកឈ្នះគេចខ្លួនបាត់ ត្រូវបានកម្លាំងជំនាញរបស់កងរាជអាវុធហត្ថខេត្តសហការជាមួយកម្លាំងមូលដ្ឋានស្រុកអង្គរធំ និងកម្លាំងមូលដ្ឋានក្រុងសៀមរាប ដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បានចុះឃាត់ខ្លួនជនសង្ស័យចំនួន២នាក់ និងវត្ថុតាងយកមកសួរនាំនៅទីបញ្ជាការដ្ឋាននកងរាជអាវុធហត្ថខេត្ត ដើម្បីរៀបចំកសាងសំណុំរឿងទៅតុលាការចាត់ការបន្តតាមច្បាប់ ។
ហេតុការណ៍កាប់ចាក់គ្នាខាងលើបានកើតឡើងនាវេលាម៉ោង១១និង១០នាទីយប់ថ្ងៃទី២៤ ខែកញ្ញា ឆ្នាំ២០២០ នៅចំណុចសួនច្បារបឹងកាឡូ ខាងជើងព្រះអង្គចេក ព្រះអង្គចម ស្ថិតនៅភូមិមណ្ឌល២ សង្កាត់ស្លក្រាម ក្រុងសៀមរាប ខេត្តសៀមរាប ។
តាមប្រភពពីមន្ត្រីកងរាជអាវុធហត្ថខេត្តសៀមរាបបានប្រាប់ឱ្យដឹងកាលពីព្រឹកថ្ងៃទី២៨ ខែកញ្ញា ឆ្នាំ២០២០នេះថា ដោយមានការដាក់បទបញ្ជាពីលោកឧត្តមសេនីយ៍ត្រីប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងដោយមានការដឹកនាំបញ្ជាផ្ទាល់ពីលោក វរសេនីយ៍ឯក ថា ដាលុច មេបញ្ជាការងទទួលការងារយុតិធម៌ និងដោយមានការសម្របសម្រួលពី លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប បានឱ្យកម្លាំងបទល្មើសព្រហ្មទណ្ឌនៃកងរាជអាវុធហត្ថខេត្ត ចុះស្រាវជ្រាវ ។
ជនសង្ស័យមិនស្គាល់អត្តសញ្ញាណមានគ្នា២នាក់ជិះម៉ូតូមួយគ្រឿង ប្រដាប់ដោយដាវ បានធ្វើសកម្មភាពកាប់ទៅលើជនរងគ្រោះឈ្មោះ ហ៊ីង ឆាលី ភេទប្រុស អាយុ១៨ឆ្នាំ ទីលំនៅបច្ចុប្បន្ន ភូមិទ្រាំង សង្កាត់ស្លក្រាម ក្រុងសៀមរាប កាប់ចំនួនមួយកាំបិត បណ្តាលឱ្យរងរបួសធ្ងន់ត្រង់ក្បាល ផ្នែកខាងឆ្វេង រយៈហូរឈាមប្រវែង១០សង្ទីម៉ែត្រ ខណៈពេលដែលជនរងគ្រោះជិះម៉ូតូស្របទិសគ្នាជាមួយជនសង្ស័យ ។ ក្រោយកើតហេតុ ជនសង្ស័យបានជិះម៉ូតូគេចខ្លួនបាត់តែម្តង ។
ចំណែកជនរងគ្រោះ ឈ្មោះ ហ៊ីង ឆាលី ភេទប្រុស អាយុ១៨ឆ្នាំ ក៏បានមកដាក់ពាក្យបណ្តឹងនៅការិយាល័យព្រហ្មទណ្ឌ កងរាជអាវុធហត្ថខេត្តសៀមរាប និងជនរងគ្រោះម្នាក់ទៀតជាអ្នកឌុបឈ្មោះ យ៉ា អាយុ១៩ឆ្នាំ រស់នៅភូមិសង្កាត់ជាមួយគ្នា ខណៈពេលនោះជនរងគ្រោះ ឈ្មោះ យ៉ា មិន បានដាក់ពាក្យបណ្តឹងទេ។
បន្ទាប់ពីទទួលបានពាក្យបណ្តឹង កម្លាំងជំនាញក៏ធ្វើការស្រាវជ្រាវ និងដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ទើបនៅវេលាម៉ោង៩ព្រឹកថ្ងៃទី២៧ ខែកញ្ញា ឆ្នាំ២០២០ ស្ថិតនៅចំណុច ភូមិនគរក្រៅ សង្កាត់គោកចក ក្រុងសៀមរាប ខេត្តសៀមរាប ។
កម្លាំងការិយាល័យជំនាញសហការជាមួយកម្លាំងមូលដ្ឋានស្រុកអង្គរធំ និងកម្លាំងមូលដ្ឋានក្រុងសៀមរាប បានចុះឃាត់ខ្លួនជនសង្ស័យចំនួន២នាក់ ៖ ១-ឈ្មោះ សឿន សិទ្ធ ភេទប្រុស អាយុ១៨ឆ្នាំ មុខរបរមិនពិតប្រាកដ ទីលំនៅបច្ចុប្បន្ន ភូមិនគរក្រៅ សង្កាត់គោកចក ក្រុងសៀមរាប ខេត្តសៀមរាប (ជនដៃដល់) និង២-ឈ្មោះ ជន តុលា ហៅ ជុច ភេទប្រុស អាយុ ១៨ឆ្នាំ មុខរបរ មិនពិតប្រាកដ ទីលំនៅបច្ចុប្បន្ន ភូមិនគរក្រៅ សង្កាត់គោកចក ក្រុងសៀមរាប ខេត្តសៀមរាប (ជាអ្នកបើកម៉ូតូ) ។
ក្រោយពីធ្វើការឃាត់ខ្លួនបានជនសង្ស័យខាងលើ កម្លាំងជំនាញបានដកហូតវត្ថុតាងរួមមាន ៖ ដាវចំនួន៣ដើម, កាំបិតខ្វែវ១ដើម, ម៉ូតូចំនួន១គ្រឿង ម៉ាកស៊ុយសាគីស្មាស់រីវ៉ូ ពណ៌ក្រហមលាយខ្មៅ ស៊េរីឆ្នាំ២០០៩ (ម៉ូតូជិះធ្វើសកម្មភាព)។
ជនសង្ស័យទាំង២នាក់ខាងលើបានសារភាពថា ពួកគេពិតជាបានធ្វើសកម្មភាពកាប់ទៅលើជនរងគ្រោះពិតប្រាកដមែន ដោយសារពួកគេធ្លាប់មានទំនាស់ជាមួយក្រុមរបស់ជនរងគ្រោះកាលពីមុនមក។ បច្ចុប្បន្ន កម្លាំងជំនាញបានកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តសៀមរាប ដើម្បីចាត់ការតាមនីតិវិធីច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ