ខេត្តបាត់ដំបង ៖ ប្រជាពលរដ្ឋម្នាក់ភ័យស្ទើរសល់ព្រលឹង នៅពេលគាត់ប្រទះឃើញគ្រាប់មីនមួយគ្រាប់ជាប្រភេទមីនប្រឆាំងមនុស្ស ដែលផុសចេញពីក្នុងដីនៅក្បែរសសរផ្ទះរបស់ខ្លួន កាលពីវេលាម៉ោង៩ព្រឹកថ្ងៃទី២៩ កញ្ញា នេះ ស្ថិតក្នុងភូមិចំការចេក ឃុំស៊ុង ស្រុកសំឡូត។
សមត្ថកិច្ចបានឱ្យដឹងថា ប្រជាពលរដ្ឋឈ្មោះ ហម ដេន ភេទប្រុស អាយុ៣៦ឆ្នាំ ជាអ្នកប្រទះឃើញគ្រាប់មីននោះ ដែលនៅក្បែរចំហៀងផ្ទះរបស់គាត់។ គ្រាប់មីននោះជាប្រភេទមីនប្រឆាំងមនុស្ស ដែលគេស្គាល់ជាគ្រាប់មីនសញ្ញាលេខ(+) ផលិតនៅអតីតសហភាពសូវៀត។
សមត្ថកិច្ចបានបញ្ជាក់ថា ម្ចាស់ផ្ទះបានប្រទះឃើញគ្រាប់មីននោះលេចចេញពីក្នុងដីព្រាលៗ ក្រោយពេលត្រូវទឹកភ្លៀង លុះឆ្កឹះមើលទើបដឹងថា វាជាគ្រាប់មីន ធ្វើឱ្យគាត់មានការភ្ញាក់ផ្អើលស្ទើរសល់ព្រលឹង។
អធិការស្រុកសំឡូត លោក ម៉ែន រីម បានប្រាប់កោះសន្តិភាពថា ម្ចាស់ផ្ទះពិតជាបានប្រទះឃើញគ្រាប់មីននោះផុសចេញពីក្នុងដីក្បែរផ្ទះគាត់មែន។ លោកថា គ្រាប់មីននោះទំនងកប់ក្នុងដីច្រើនឆ្នាំហើយ លុះត្រូវភ្លៀងជោកជាំរាប់ឆ្នាំកន្លងមកទើបធ្វើឱ្យវាផុសឡើង។ ប៉ុន្តែសំណាងល្អដែលគ្រាប់មីននោះខូចគុណភាព បើមិនដូច្នេះទេ មីននោះអាចផ្ទុះយូរហើយ ព្រោះម្ចាស់ផ្ទះដើរជាន់រាល់ថ្ងៃ។ លោកម៉ែន រីម បានបញ្ជាក់ថា គ្រាប់មីនជាគ្រាប់ដែលសេសសល់ពីសម័យសង្គ្រាមច្រើនឆ្នាំហើយ ដែលអ្នកស្រុកសំឡូតតែងប្រទះឃើញជាបន្តបន្ទាប់។
ប៉ុន្តែយ៉ាងទោះជាយ៉ាងណា សមត្ថកិច្ចមូលដ្ឋានបានរាយការណ៍ទៅមន្ត្រីស៊ីម៉ាក ដើម្បីជួយអន្តរាគមន៍យកគ្រាប់មីននោះចេញពីទីតាំងកើតហេតុភ្លាមៗដែរ។ នេះចាត់ទុកជាសំណាងល្អបំផុត ដោយសារតែគ្រាប់មីននោះខូចគុណភាព បើមិនដូច្នេះទេម្ចាស់ផ្ទះប្រាកដជាជួបគ្រោះធ្ងន់ធ្ងរជាមិនខាន៕
ចែករំលែកព័តមាននេះ