រាជធានីភ្នំពេញ ៖ និស្សិតប្រុសម្នាក់ជិះម៉ូតូធុនធំ១គ្រឿងក្នុងល្បឿនទៅដល់ចំណុចផ្លូវកោងបត់មិនទាន់ក៏បានជ្រុលទៅបុកផ្ទះលក់ទូរស័ព្ទមួយកន្លែង បណ្ដាលឲ្យដួលបោកក្បាលផ្ទប់របងផ្ទះបាត់បង់ជីវិតភ្លាមៗនៅនឹងកន្លែង ដោយជើងគងលើម៉ូតូ។
ហេតុការណ៍គ្រោះថ្នាក់ខាងលើនេះបានកើតឡើងកាលពីវេលាម៉ោង៥ព្រឹកថ្ងៃទី២៩ ខែកញ្ញាឆ្នាំ២០២០ នៅតាមផ្លូវបេតុងរោងចក្រឃ្យូអឹមអាយ ត្រង់ចំណុចផ្ទះលេខ៣៦ លក់ទូរស័ព្ទយីហោ«រ៉ាវី២» ក្រុមទី៣ ភូមិត្រពាំងពោធិ៍ សង្កត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
និស្សិតដែលបាត់បង់ជីវិតខាងលើនេះឈ្មោះកាយ មករា ភេទប្រុសអាយុ២៤ឆ្នាំ មានទីលំនៅក្នុងភូមិស្រម៉ សង្កាត់កំបូល ខណ្ឌកំបូល រាជធានីភ្នំពេញ ជាអ្នកបើកបរម៉ូតូ១គ្រឿងម៉ាកហុងដា XR-250CC ពណ៍សពាក់ស្លាកលេខតាកែវ1L-1080 ។
អ្នកឃើញហេតុការណ៍បាននិយាយថា នៅមុនពេលកើតហេតុ យុវជនរងគ្រោះបានជិះម៉ូតូ១គ្រឿងនោះធ្វើដំណើរក្នុងទិសដៅពីកើតទៅលចក្នុងល្បឿនលឿន លុះពេលទៅដល់ត្រង់ចំណុចកើតហេតុខាងលើដែលជាចំណុចផ្លូវកោង បត់អត់ទាន់ក៏បានជ្រុលចង្កូតទៅបុកផ្ទះផ្ទះលេខ៣៦ លក់ទូរស័ព្ទយីហោ«រ៉ាវី២» បណ្ដាលឲ្យដួលបោកផ្ទប់របងផ្ទះនោះបែកក្បាលបាត់បង់ជីវិតភ្លាមៗនៅនឹងកន្លែងដោយគងជើងលើម៉ូតូ។ ខណៈនោះបានបង្កឲ្យមានការភ្ញាក់ផ្អើលទាំងព្រឹក ហើយភ្លាមៗនោះសពមិនត្រូវបានគេស្គាល់អត្តសញ្ញាណនោះទេ រហូតដល់វេលាម៉ោង៩ព្រឹកថ្ងៃដដែល ទើបស្គាល់ បន្ទាប់ពីនគរបាលស្វែងរកក្រុមគ្រួសារជនរងគ្រោះឃើញ។
នគរបាលបាននិយាយថា ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី៣សហការណ៍ជាមួយកម្លាំងនគរបាលចរាចរណ៍ខណ្ឌពោធិ៍សែនជ័យបានចុះទៅពីនិត្យស្ថានភាពជាក់ស្ដែង និងសាកសួរសាក្សីជុំវិញកន្លែងដែលបានឃើញហេតុការណ៍ ទើបបានដឹងច្បាស់ថា និស្សិតរូបនេះបាត់បង់ជីវិតដោយសារគ្រោះថ្នាក់ចរាចរណ៍ជិះម៉ូតូលឿនបុកផ្ទះលក់ទូរស័ព្ទខាងលើ បន្ទាប់មកបានធ្វើការស្រាវជ្រាវរកក្រុមគ្រួសារដើម្បីទទួលយកសពទៅចាត់ចែងធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ