ខេត្តមណ្ឌលគិរី ៖ មន្ត្រីជំនាញ អះអាងថា មានស្ថានីយ៏ប្រេងសាំងមួយចំនួន ក្នុងក្រុងសែនមនោរម្យ ខេត្តមណ្ឌលគិរី បានធ្វើខុសគោលការច្បាប់ ដោយមានស្ថានីយ៏ខ្លះ លក់ប្រេងសាំងមិនគ្រប់ចំណុះ…
ខេត្តមណ្ឌលគិរី ៖ មន្ត្រីជំនាញ អះអាងថា មានស្ថានីយ៏ប្រេងសាំងមួយចំនួន ក្នុងក្រុងសែនមនោរម្យ ខេត្តមណ្ឌលគិរី បានធ្វើខុសគោលការច្បាប់ ដោយមានស្ថានីយ៏ខ្លះ លក់ប្រេងសាំងមិនគ្រប់ចំណុះ និងស្ថានីយ៏ខ្លះទៀតបន្លំសាំងធម្មតា ដាក់ជាសាំងស៊ុបពែរ ។
ជាក់ស្តែងនៅព្រឹកថ្ងៃទី២៨ កញ្ញា ២០២០នេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានសហការជាមួយ មន្ទីរពាណិជ្ជកម្មខេត្តមណ្ឌលគិរី ចុះពិនិត្យតាមដានគ្រប់ស្ថានីយ៏ប្រេងសាំង ក្នុងក្រុងសែនមនោរម្យ ដើម្បីការពារកុំឲ្យម្ចាស់ស្ថាននីយ៏ប្រេងសាំង ខិលខូចលក់កេងបន្លំអតិថិជន ដែលនាំដល់ការខាតបង់ ដល់ផលប្រយោជន៏អ្នកប្រើប្រាស់ ។
លោក ម៉ក់ ពេជ្ជរុណ អនុប្រធាន នាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឲ្យដឹងថា ក្រុមការងារ ចុះត្រួតពិនិត្យគុណភាព បរិមាណ និងតម្លៃលក់រាយ នៅតាមស្ថានីយ៍ប្រេងឥន្ធនៈ ចំនួន០៥ នៅក្រុងសែនមនោរម្យ។
ក្នុងការចុះត្រួតពិនិត្យគុណភាព បរិមាណ និងតម្លៃលក់រាយ ប្រេងឥន្ធនៈ នៅតាមស្ថានីយ៍ និងដេប៉ូចែកចាយនីមួយៗ ក្នុងក្រុងសែនមនោរម្យ ដោយប្រើប្រាស់រថយន្តពិសោធន៍ចល័ត ផ្នែកប្រេងឥន្ធនៈ របស់អគ្គនាយកដ្ឋានកាំកុងត្រូល ដែលបំពាក់ដោយឧបករណ៍វិភាគ និងឧបករណ៍រង្វាស់រង្វាល់ ធ្វើព្យាសកម្មត្រឹមត្រូវ ដើម្បីធ្វើតេស្តជៀសវាងការក្លែងបន្លំ ។
ជាលទ្ធផលផ្នែកគុណភាពប្រេងសាំងធម្មតា សាំងស៊ុបពែរ ប្រេងម៉ាស៊ូត និងតម្លៃលក់រាយ គឺត្រឹមត្រូវតាមស្តង់ដា ។ ហើយចំពោះបរិមាណចំណុះ ដែលស្ថានីយ៏ខ្លះមានការខ្វះខាត មន្ត្រីជំនាញបានឲ្យម្ចាស់ធ្វើកិច្ចសន្យាកែសម្រួលម៉ាស៊ីន ចាក់ប្រេងទាំងនោះឡើងវិញ ។ បើសិន ថ្ងៃក្រោយរកឃើញកំហុសដដែល និងធ្វើការពិន័យតាមច្បាប់ ៕
ចែករំលែកព័តមាននេះ